Samting i Pulim Mi i Go Long Ol Witnes Bilong Jehova

Stori Bilong Tomás Orosco

Namba wan taim mi bin go long miting bilong ol Witnes long Haus Kingdom bilong ol, wanpela liklik boi i bin mekim tok long pletfom. Maski em i sotpela na i aninit long longpela bilong podium, em i sanap stret na mekim gut tok. Mi kirap nogut tru long dispela.

MI LUKIM olsem odiens i putim gut yau long em. Mi bin mekim wok olsem komanda bilong lain ami, na helpim bilong presiden, na long Amerika mi bin wok olsem mausman bilong lain ami bilong Bolivia, olsem na ol man i save rispek tru long mi. Tasol rispek ol i soim long dispela mangi i kirapim mi long skelim gen ol mak mi bin putim long i stap bilong mi.

Long 1934, papa bilong mi i dai long Pait Chako, em pait i stap namel long ol Paragwai na ol Bolivia. Bihain long dispela, ol i salim mi i go long wanpela boding-skul bilong ol Katolik. Inap planti yia, mi save go long Misa long olgeta de we mipela i mekim ol singsing lotu, harim ol tok bilong katekismo, na kolim kolim ol wankain beten planti taim. Mi mekim wok tu long alta na mi insait long singsing kwaia. Tasol mi no bin ritim Baibel​—⁠na i no gat wanpela taim bipo mi bin lukim wanpela Baibel.

Mi amamas long ol de holi bilong lotu, long wanem, ol i olsem ol de bilong pati na em samting mipela i no save mekim long olgeta de. Tasol ol pris na ol narapela tisa bilong lotu, ol i save mekim hatpela pasin. Pasin bilong ol i mekim na mi no laikim lotu. Na mi pilim olsem mi no laik insait moa long ol samting bilong lotu.

Wok Ami i Pulim Tingting Bilong Mi

Wanpela taim, tupela yangpela man soldia i bilas gut na ol i kam long taun mi kamap bikpela long en, em Tarija. Ol i kisim malolo long wok bilong ol long La Paz, em biktaun bilong Bolivia. Ol i wokabaut long taun na ol i luk smat tru. Mi amamas tru long lukim klos na bilas bilong ol olsem ol man em ol narapela i givim rispek long ol. Ol i werim grinpela yunifom, na arere bilong hat bilong ol i lait. Kirap long dispela taim stret mi tingting long kamap wanpela soldia. Mi ting ol soldia i save mekim planti kain kain gutpela wok.

Long 1949, taim mi gat 16 krismas, mi go long kolis bilong ami long Bolivia. Bikpela brata bilong mi i sanap wantaim mi taim mipela i sanap long lain bilong ol yangpela man, em lain i longpela i go inap long geit bilong bareks. Em i tokim lutenant long mi husat na em i askim lutenant long lukautim mi gut. Bihain em i tokim ol long sampela gutpela pasin bilong mi. Taim em i go pinis, ol i mekim pasin long mi olsem ol i save mekim long olgeta man i kam nupela long dispela kolis. Ol i paitim mi i go daun long graun na ol i tokim mi olsem: “Bai yumi lukim husat inap tru long kisim biknem long hia!” Kirap long dispela taim mi kisim save long pasin bilong lain ami long stretim na daunim man. Tasol mi gat strongpela bel, olsem na dispela i no daunim mi tumas.

I no longtaim, mi lain long pait long woa na mi kamap wanpela soldia we ol man i rispek long mi. Tasol ol samting i painim mi i lainim mi olsem gutpela klos na bilas bilong ami inap giamanim man.

Kisim Wok i Gat Namba

Long kirap bilong wok mi mekim, mi raun na kisim trening long woa sip bilong ami bilong Ajentina, nem bilong en General Belgrano, em sip we 1000 man inap raun long en. Paslain long Wol Woa 2, dispela sip i bin stap long Amerika na nem bilong en USS Phoenix, na bihain em i abrusim bagarap taim Japan i tromoi ol bom long Pearl Harbor, Hawaii, long 1941.

Bihain mi kisim ol narapela narapela namba long wok na mi kamap nambatu komanda bilong Nevi Bilong Bolivia, em ol i save was long boda bilong ol wara bilong Bolivia. Sampela bilong ol dispela wara, em ol wara long ples daun bilong Amason, na raunwara Titicaca, em raunwara we i stap antap long maunten na ol sip i save raun long en.

Long Me 1980, ol i makim mi na ol narapela bilong i go long Washington, D.C., long Amerika bilong mekim wok olsem mausman bilong ami bilong Bolivia. Ol i makim wanpela bikman long olgeta wan wan dipatmen​—⁠ami, lain ami bilong balus, na Nevi​—⁠na ol i makim mi olsem kodineta bilong dispela lain, long wanem, mi bin stap planti yia long wok ami. Mi stap long Amerika klostu tupela yia na bihain mi kamap helpim bilong presiden bilong Bolivia.

Mi wanpela komanda bilong ami, olsem na mi mas go long lotu long olgeta Sande. Pasin bilong ol pris na pris bilong ami long insait long ol pait bilong kantri na ol woa, dispela i mekim na mi no amamas long lotu. Mi save olsem pasin em lotu i mekim bilong sapotim wok bilong kapsaitim blut, dispela i no stret. Tasol dispela kain pasin bilong lotu long tupela maus i no kirapim mi long lusim lotu, nogat; dispela i kirapim mi long painim lotu i tru. Mi no bin ritim Baibel bipo, olsem na wan wan taim mi kirap kisim na ritim sampela ves.

Pasin Daun Long Haus Kingdom

Mi kirap nogut olsem meri bilong mi Manuela i kirap stadi long Baibel wantaim wanpela Witnes Bilong Jehova, em wanpela misineri nem bilong em Janet. Bihain, Manuela i kirap go long ol miting long Haus Kingdom, em ples bilong ol long lotu. Mi orait long draivim em i go long dispela hap, tasol mi no gat laik long i go lotu. Mi ting olsem ol miting bilong ol bai i gat planti nois na pairap samting.

Wanpela taim Manuela i askim mi sapos i orait long man bilong Janet i ken kam lukim mi. Pastaim mi tok nogat long em. Bihain mi tingting olsem, mi gat save long ol samting bilong lotu na mi inap daunim ol tok bilong em. Taim mi bungim Ian long namba wan taim, mi no tingim tumas ol tok em i mekim, tasol mi tingim tru gutpela pasin bilong em. Em i no tingting long semim mi long rot bilong mekim wok long skul na save bilong em long Baibel, nogat. Em i mekim gutpela pasin rispek.

Long wik bihain, mi go long Haus Kingdom we mi bin harim liklik boi i mekim tok olsem mi bin kamapim long kirap bilong stori. Taim mi harim em i ritim ol ves bilong Baibel long Buk Aisaia na kamapim insait bilong en, mi save mi painim pinis wanpela narakain oganaisesen. Taim mi yangpela, mi laik kamap wanpela soldia em ol man i ken rispek long mi, tasol nau mi laik kamap olsem dispela liklik mangi na skulim ol narapela long tok bilong Baibel. I olsem bel bilong mi i kamap malumalum na mi redi long kisim tok.

Bihain long sampela haptaim, mi kirap nogut tu long pasin bilong ol Witnes long bihainim stret taim na gutpela pasin bilong ol long toktok gut long mi na mekim mi stap isi na amamas. Na tu, mi amamas long pasin bilong ol long pasim klinpela klos na mekim gut skin. Samting mi laikim tru em ol i save bihainim stret sediul bilong mekim ol miting​—⁠sapos sediul i kolim tok bai kamap, orait dispela tok bai kamap long taim stret sediul i makim. Mi inap pilim tru olsem pasin laikim i as na ol i mekim dispela olgeta samting long taim stret bilong en, na i no olsem narapela i pretim ol o daunim ol long mekim olsem.

Bihain long mi bin i go long miting long namba wan taim, mi orait long Ian i ken stadi wantaim mi long Baibel. Mipela i yusim buk Yu Inap i Stap Oltaim Long Paradais Long Grauna bilong mekim stadi long en. Mi ken tingim yet sapta 3, i gat piksa bilong bisop i blesim lain ami paslain long ol i go pait. Mi no gat tupela tingting long dispela samting, long wanem, long ai bilong mi yet mi lukim dispela samting i bin kamap. Long Haus Kingdom, mi kisim buk Toktok Gut Wantaim Ol Man Long Baibel. Taim mi ritim tok Baibel i mekim long no ken insait long pait, mi save i gat sampela senis mi mas mekim. Mi tingting pinis olsem mi no inap i go bek long Misin Katolik, na mi kirap i go oltaim long ol miting long Haus Kingdom. Na tu, mi stretim ol samting bilong ritaia long wok ami.

Kamap Strong na Kisim Baptais

Sampela wik bihain, mi harim olsem kongrigesen bai klinim stediam em ol bai yusim bilong mekim kibung long en. Mi gat laik long i go long dispela kibung, olsem na mi go helpim tu wok bilong klinim stediam. Mi amamas long bung na wok gut wantaim ol arapela long mekim dispela wok. Taim mi wok long brumim plua, wanpela yangpela man i kam na askim mi sapos mi dispela komanda bilong nevi.

Mi tok: “Yes.”

Em i kirap nogut tru na i tok: “Mi no inap bilip olsem wanpela komanda bilong nevi i brumim plua!” Wanpela bikman i gat namba i no inap kisim pepa i pundaun long graun, na moa yet em i no inap tru long brumim plua. Dispela yangpela man i bin wok aninit long mi na em i save draivim mi, nau em i wanpela Witnes Bilong Jehova!

Pasin Laikim i As na Ol i Wok Gut Wantaim

Insait long ami ol i save rispek long namba man i holim, na dispela pasin i pas strong long tingting bilong mi. Olsem na wanpela taim mi bin askim sapos i gat sampela Witnes Bilong Jehova i antap moa winim ol narapela, long wanem, ol i gat namba o ol i holim ol bikpela wok. Tingting mi gat long namba man i holim, dispela i pas strong yet long tingting bilong mi, tasol i no longtaim na bai tingting bilong mi i senis olgeta.

Long dispela taim​—⁠long 1989, mi kisim save olsem wanpela memba bilong Gavening Bodi Bilong Ol Witnes Bilong Jehova long New York bai kam long Bolivia na mekim tok long dispela stediam. Mi laik lukim pasin ol bai mekim bilong welkamim dispela man husat i holim wok i gat namba insait long dispela oganaisesen. Mi ting ol bai mekim sampela bikpela kain bilaspasin bilong kisim kain man i holim wok i gat namba.

Orait taim bung i kirap, i no gat wanpela samting i soim olsem wanpela spesel man i kam, na mi tingting planti. I gat tupela marit em ol i lapun, ol i sindaun klostu long mitupela Manuela. Manuela i luksave olsem sista i gat buk singsing long tok Inglis, olsem na long taim bilong malolo Manuela i toktok wantaim em. Tasol bihain long dispela, tupela marit i lusim dispela hap na i go.

Bihain mitupela i kirap nogut tru taim man bilong dispela sista i go long pletfom bilong mekim bikpela tok bilong kibung! Long dispela taim stret, long tingting bilong mi, ol samting mi bin lainim insait long ami long biknem, rispek, namba, na wok, i senis tru. Bihain mi tok: “Tingim, dispela brata husat i sindaun wantaim mipela long ol kain sia bilong stediam, em i wanpela memba bilong Gavening Bodi!”

Mi smail taim mi tingim hamas taim Ian i bin traim long helpim mi long kliagut long tok bilong Jisas long Matyu 23:​8, olsem: “Yupela olgeta i stap brata brata.”

Autim Tok Long Namba Wan Taim

Taim mi pinis long ol wok ami bilong mi, Ian i singautim mi long i go wantaim em long autim tok. (Aposel 20:20) Mi laik abrusim dispela hap mipela i go long en, long wanem, em ples we haus bilong ol ami i stap long en. Na wanpela jeneral em mi bin tingting tru long abrusim em, em i opim dua. Bel bilong mi i no stap isi na mi pret, na moa yet taim em i luksave long beg na Baibel bilong mi na em i tok, “Wanem samting i kamap long yu?”

Bihain long mi mekim sotpela beten, mi kisim bel isi na mi no pret. Jeneral i harim tok mi autim, na tu, em i kisim sampela nius bilong Baibel. Dispela samting i painim mi i strongim mi long dediketim laip bilong mi long Jehova. Mi kisim baptais long Janueri 3, 1990, bilong kamapim klia dediket bilong mi.

Liklik taim bihain, meri bilong mi, pikinini man na pikinini meri bilong mi, ol tu i kamap Witnes Bilong Jehova. Long nau mi amamas long mekim wok elda long kongrigesen na insait long wok bilong autim gutnius bilong Kingdom Bilong God fultaim. Nambawan gutpela samting mi kisim em mi save long Jehova na Jehova i save long mi. Dispela i winim tru ol biknem na namba em ol man i wok strong long kisim. Tru tumas, pasin bilong tingim gut narapela na mekim pasin isi, dispela em i rot bilong mekim stret ol samting, na i no long rot bilong mekim hatpela pasin na daunim narapela, nogat. Jehova em i God bilong mekim stret ol samting, tasol bikpela samting moa, em i God bilong pasin laikim.​—⁠1 Korin 14:​33, 40; 1 Jon 4:⁠8.

[Futnot]

[Piksa long pes 21]

Mi na brata bilong mi, Renato, long 1950

[Piksa long pes 21]

Mi stap long wanpela bung wantaim ol bikman bilong ami bilong Saina na bilong ol narapela kantri