Pastaim Komanda Bilong Ami, Bihain “Soldia Bilong Krais”

Stori bilong Mark Lewis

“Moning Bikman.” “Apinun Praim-Minista.” Em sampela bilong ol tok mi save mekim taim mi mekim wok olsem pailot na Komanda Ofisa bilong wanpela lain ami i save ronim ol balus (Royal Australian Air Force). Mi save kisim ol bikman bilong kantri na ol bikman bilong gavman long balus i go long olgeta hap bilong Australia na long ol narapela narapela hap bilong graun. Tasol long nau, mi mekim wanpela wok mi kisim bikpela amamas moa long en. Bai mi stori long dispela.

MAMA i karim mi long 1951, long Perth, Westen Australia, na mi kamap bikpela insait long wanpela famili bilong ami. Taim mi gat 15 krismas, mi joinim wanpela klap em ol i save ronim wanpela samting olsem balus tasol i no gat ensin. Na dispela i kirapim laik bilong mi long ronim balus, em wanpela wok mi save laikim tru.

I no longtaim papa na mama bilong mi i no stap wantaim moa, na famili i bruk. Wanpela komanda bilong Ea-fos i save ronim balus jet na famili bilong em ol i kisim mi na mi stap wantaim ol inap mi pinisim haiskul. Ol toktok na pasin bilong em i kirapim laik bilong mi long kamap wanpela trening soldia long kolis bilong Royal Australian Air Force Academy.

Mi Kamap Pailot

Inap olsem sikspela yia bihain, mi grediuet olsem wanpela Ea-fos ofisa na mi kisim digri long saiens na kamap pailot. Namba wan wok mi kisim em long ronim balus bilong ami i save karim ol masin samting, kaikai, na ol man i go long ol narapela narapela hap bilong Australia, Saut Pasifik, na Saut-is Esia. Planti taim mipela i flai namel long ol maunten i antap tru na go daun namel long ol bikpela baret na pundaun long ol liklik ples balus em gras tasol. Em wanpela wok man inap kisim bagarap long en. Long ol dispela yia sampela balus bilong mipela i bin pundaun na bagarap na ol gutpela wokman i dai. Tasol wok bilong mipela i helpim ol man i save sindaun long hap longwe long ol biktaun. Mipela i save karim i go ol samting bilong wokim ol bris, ol liklik buldosa bilong wokim ol rot, ol kaikai bilong ol man em bikpela bagarap i painim ol, na ol dokta na nes. Na tu, mipela i save go karim ol man i sik o kisim bagarap i go long haus sik samting.

Long 1978, mi winim ol mak bilong kamap tisa bilong ol pailot na mi go bek long kolis bilong Ea-fos na wok wantaim ol narapela tisa. Long dispela hap mi bungim gen Diane, wanpela yangpela wido i gat liklik pikinini meri i gat 3-pela krismas. Man bilong Diane em wanpela wanklas bilong mi long kolis na em i bin i dai long wanpela eksiden bilong balus. Taim mi askim Diane long maritim mi, em i tokim mi long givim taim long em i ken skelim. Em i gat tupela tingting, em bai maritim gen narapela pailot, o nogat.

Taim mi wetim bekim bilong em, mi kisim wanpela wok olsem namba wan helpim bilong Gavena-Jeneral bilong Australia, dispela wok em bilong 12-pela mun tasol. Laip insait long Haus Bilong Gavman long Canberra i mekim na nau tingting bilong mi i op long ol samting bilong politik i wok olsem wanem na pasin bilong ol long wok wantaim ol bikman bilong gavman, ami, na lotu. Taim dispela 12-pela mun i pinis, mi go bek long wok bilong skulim ol pailot. I no longtaim bihain mitupela Diane i marit, long 1980.

Long 1982, ol i salim mi i go wok wantaim Ea-fos bilong Amerika tupela yia bilong kisim trening olsem ofisa bilong lukautim seifti bilong balus na skelim eksiden i painim balus. Dispela wok i kisim mi i go long ol narapela narapela hap bilong Amerika na i go longwe long hap bilong Noten Aialan. Mi mas skelim ol eksiden i kamap long balus, skelim ol samting bilong balus, na wok bilong ronim balus bambai mi ken save long wanem ol samting ol mas stretim bilong balus i ken ron gut na eksiden i no ken kamap.

Kam Bek Long Australia

Taim mi kam bek long Australia, mitupela i kamapim wanpela pikinini meri, nem bilong em Kerry, na nau famili bilong mipela em fopela. Mi gat planti wok, olsem na Diane i kamap mama na papa long ol pikinini bilong mipela, olsem na famili i no stap gut. Tripela yia bihain, em namba wan taim ol i makim mi olsem komanda bilong wanpela lain Ea-fos em ol i save ronim balus, olsem mi stori pinis long en. Taim Persian Galf Woa i kirap long 1991, lain ami bilong mi i go sapotim wok bilong Yunaitet Nesen long dispela hap, na bihain helpim ol long ol narapela wok ol i mekim long Pakistan, Afganistan, na long Israel.

Long 1992, mi kisim wok olsem namba tu bilong bikman bilong Defens Fos. Taim mi mekim wok olsem namba tu bilong dispela bikman bilong ami bilong Australia, dispela i mekim na mi kliagut long ol wok samting namel long ol ami, politik na Yunaitet Nesen. Mi kisim save olsem Yunaitet Nesen i no mekim gut planti samting. Tasol i luk olsem em tasol i rot bilong kamapim gutpela sindaun long graun. Bihain, ol samting i kamap insait long famili i mekim na mi skelim gen ol tingting bilong mi.

Diane i Kisim Bekim Bilong Ol Askim Bilong Em

Bihain long namba wan man bilong em i dai, Diane, em wanpela Katolik, em i laik kisim save long bekim bilong ol askim em i gat, tasol nogat. Ol samting i go nogut moa taim bikpela pikinini meri bilong mipela, Renee, i kirap insait long ol wok bilong mekim majik. Taim Diane i stap long haus bilong wanpela pren meri, em i lukim wanpela nius Kirap! i tokaut long narapela nius i kamap bihain, bai i gat stori bilong lotu bilong Satan.a Em i no bin lukim Kirap! bipo. Taim em i wokabaut i go long haus, em i wok long tingting, ‘Olsem wanem mi inap kisim dispela nius?’

Tripela de bihain ol Witnes Bilong Jehova i kam long haus bilong mipela na Diane i kisim dispela nius. Bihain em i orait long ol i mekim Baibel stadi wantaim em na em i kirap i go long ol miting Kristen. Mi amamas long em i stadi long Baibel na mi go wantaim em sampela taim long ol miting tu, tasol mi no ting mi mas insait long en. Mi no tingim mi yet olsem mi lotuman. Mi bilip long God tasol mi bin lukim planti pasin giaman, olsem na mi no tingim tumas lotu. Olsem: Mi no kliagut bilong wanem na ol pater bilong ami i save autim tok long pasin laikim na bel isi, tasol ol i save sapotim woa.

Diane i mekim gutpela pasin na em i save putim ol nius Wastaua na Kirap! long ol narapela narapela hap bilong haus bambai mi ken ritim. Mi ritim sampela na putim gut gen long ples bilong ol. Mi no laik bai em i ting olsem mi laik stadi long Baibel. Taim mi kisim sampela save moa long Baibel, i gat tupela skripsa i mekim mi tingting planti. Wanpela em Kamapim Tok Hait 19:​17, 18, em i tok long ol pisin i kaikai mit bilong “ol kepten bilong ol soldia.” Narapela em Kamapim Tok Hait 17:​3, em i stori long “retpela wel animal.” Ol Witnes Bilong Jehova i tok dispela wel animal i makim Yunaitet Nesen, em wanpela tingting i pait wantaim tingting bilong mi long dispela bikpela oganaisesen.b Tasol mi traim long rausim long tingting ol askim mi gat long en.

Long 1993, Diane i singautim mi long go lukim em i kisim baptais. Mi no tingim dispela samting, olsem na mi kirap nogut long em i singautim mi. Mi askim em, “Sapos yu mas makim wanpela man, bai yu makim Jehova o mi?” Em i tok: “Jehova. Tasol mi no laik bai dispela samting i kamap. Mi laikim yutupela wantaim.” Mi luksave nau olsem mi mas kisim save long dispela narapela “man” long laip bilong em. Wanpela elda Kristen bilong ol Witnes Bilong Jehova i tokim mi em i laik stadi long mi long Baibel, na mi orait long dispela.

Mi amamas tru long kisim save long ol tok profet bilong Baibel, moa yet em ol tok profet long ol samting bilong wok ami na politik bilong bipo. Olsem: Taim mi wok long trening long kamap pailot bilong Ea-fos, mi bin stadi long pasin bilong ol ami bilong Grik bilong bipo long mekim pait na daunim ol narapela king. Mi kisim save olsem planti bilong ol dispela stori i stap long Daniel sapta 8, ol i bin raitim planti handet yia paslain long ol i kamap. Isi isi dispela tok profet na ol narapela tok profet, i strongim bilip bilong mi olsem God i as bilong ol tok bilong Baibel.

Na tu, mi kirap long skelim gen ol tingting mi bin i gat long Yunaitet Nesen. Mi save olsem wok ami i no inap stretim ol hevi bilong ol man, na bel isi tru i no inap kamap long rot bilong ol woa, na Yunaitet Nesen i no inap stretim hevi bilong politik, lotu, na pasin bilong ol narapela narapela lain man long i no stap wanbel na dispela i kamapim pait. Mi luksave olsem God tasol inap stretim ol hevi bilong ol man. Tru tumas, em i bin mekim olsem pinis namel long lain Witnes Bilong Jehova, em ol i stap olsem brata brata long olgeta hap. (Song 133:1; Aisaia 2:​2-4) Tasol mi tingting: ‘Mi inap long lusim wok ami na mekim wok bilong God?’

Mekim Disisen Long Bihainim Tok Bilong Baibel

Taim i kamap bilong mi mekim disisen bilong mi em long 1994 taim mi go long wanpela kibung distrik bilong ol Witnes Bilong Jehova long Sydney. Wanpela drama bilong Baibel i kamap long dispela kibung i kamapim klia samting ol Israel bilong bipo i mas makim bilong lotuim, ol bai lotu long Jehova o Bal, em god bilong ol Kenan. Profet bilong Jehova, em Elaija, i tokim ol Israel: “Yupela manmeri bilong tupela tingting, wanem taim bai yupela i gat wanpela tingting tasol? Sapos Bikpela em i God tru, orait yupela i mas lotu long em wanpela tasol. Na sapos Bal i God tru, orait yupela i mas lotu long em wanpela tasol.” (1 King 18:21) Dispela tok i sutim tru bel bilong mi. Olsem ol Israel, mi tu mi gat tupela tingting. Mi mas mekim disisen bilong mi: Bai mi mekim wok bilong Jehova o mekim yet wok ami?

Long dispela nait mipela i draiv i go bek long haus mi tokim Diane olsem bai mi lusim wok bilong Ea-fos na kamap wanpela Witnes Bilong Jehova. Em i kirap nogut long mi mekim hariap dispela disisen, tasol em i sapotim mi. Sampela de bihain, tingting bilong mi i no senis, olsem na mi putim pepa bilong pinis long wok.

Long dispela taim, mi stap Komanda Ofisa bilong wanpela lain trening soldia long kolis bilong Defens Fos Bilong Australia long Canberra, em nambawan biktaun bilong Australia. Mi lukautim wok bilong trenim 1,300 pailot na tisa bilong Ami, Nevi, na Ea-fos. Long laspela de bilong skul, mi tokim 400 sumatin na tisa olsem mi pinis long wok ami na bai mi mekim wok autim tok long ol haus na skulim ol man long Baibel, em wanpela wok Kristen i no gat pe. Dispela toksave i mekim na sampela i laik save, olsem na mi inap stori wantaim ol.

Autim Tok Bilong God Fultaim

Long de bihain long ol i tok orait long mi lusim wok, mi kirap long autim tok. Tripela mun bihain mi kisim baptais, long Epril 1995. Na taim rot i op, wantu mi insait long wok painia oltaim, olsem mi mas autim tok bilong God fultaim.

Taim mi lusim wok komanda bilong ami na kamap “soldia bilong Krais,” dispela i makim olsem i gat planti samting mi mas senisim. (2 Timoti 2:⁠3) Namba wan wok mi bin kisim em wok bilong karim maikrofon long taim bilong ol miting Kristen. Bipo mi save givim oda, tasol nau nogat, mi mas lain long askim na mekim samting. Nau pasin bilong tingim ol narapela na pasin laikim i kamap bikpela samting moa long mi, winim pasin bilong mekim gut wok na i no westim taim, mani, na strong. Tasol mi save taitim bun yet bilong mekim gut olgeta dispela pasin wantaim. Mi no kisim bikpela pe moa, olsem na mipela famili i mas kisim tasol ol samting inap long lukautim mipela.

Mi save amamas tru long mekim wok autim tok. Wanpela taim mi autim tok wantaim Kerry, liklik gel bilong mipela i gat 9-pela krismas na mi tokim em long luksave long pes bilong ol man mipela autim tok long ol. Mipela i lukim olsem planti man i no laik harim tok, tasol sampela i mekim gutpela pasin na tu ol i harim. Dispela i strongim mitupela wantaim. Narapela pikinini meri bilong mipela i stadi long Baibel inap liklik taim, tasol nau long dispela taim em i no mekim yet wok bilong Jehova.

Mitupela Diane i strongim Kerry long putim mak bilong mekim wok bilong God fultaim. I no longtaim i go pinis, mi amamas long go long Skul Bilong Wok Painia wantaim Kerry. Em namba wan taim bilong em na mi yet em namba tu taim. Mi amamas tru long lukim em na ol narapela yangpela em ol i givim bel tru long pas gut wantaim Jehova na ol i strong long mekim ol wok Kristen!​—⁠Song 110:⁠3.

Planti Blesing

Taim mi tingting i go bek, mi lukim sampela samting long wok ami na stap soldia bilong Krais i wankain. Long tupela wok wantaim, man i mas i stap gut long wok, bihainim tok, bosim em yet, na lusim sampela samting bilong em yet bilong mekim wok. Tasol i gat sampela samting i no wankain. Ating planti soldia i redi long dai bilong helpim kantri na ol pren bilong ol, tasol ol Kristen tru i mas laikim ol birua bilong ol tu. (Matyu 5:​43-​48) Na ol soldia em ol i strongim bel na mekim wanpela bikpela wok wanpela taim tasol ol i save kisim medal. Tasol bilong God i ken orait long ol Kristen, ol i mas strongim bel na stap gut long wok bilong God long olgeta taim​—⁠maski ol man i birua long ol o tok bilas long ol. (Hibru 10:​36-​39) Mi save olsem ol wanlain Kristen ol i gutpela manmeri.

Bipo mi save mekim kain tok olsem mi kolim long kirap bilong dispela stori, tasol long nau mi save tok “Moning Susa,” o “Apinun Brata.” Em gutpela samting tru long mekim ol wok Kristen wantaim ol manmeri husat i laikim tru God! Tasol bikpela samting tru, em yumi mekim wok bilong Jehova, em God Antap Tru! Mi tingim wanpela rot tasol bilong kisim amamas, em long yusim laip bilong mi long mekim wok bilong God.

[Ol Futnot]

[Rait long pes 14]

Ating planti soldia i redi long dai bilong helpim kantri na ol pren bilong ol, tasol ol Kristen tru i mas laikim ol birua bilong ol tu

[Piksa long pes 12, 13]

Mi ronim balus jet bilong Ea-fos antap long Haus Palamen, Canberra

[Piksa long pes 15]

Drama bilong Baibel, 1994 kibung distrik long Sydney, Australia

[Piksa long pes 15]

Mi na Kerry long Skul Bilong Wok Painia

[Piksa long pes 15]

Mi, Diane na Kerry long nau