Stap Amamas Wantaim God Bilong Amamas

“Ol brata, [“wok yet long amamas,” NW] . . . na God, em i save givim bel bilong en long yupela na givim bel isi long yupela, em bai i stap wantaim yupela.”​—⁠2 KORIN 13:⁠11.

1, 2. (a) I gat wanem as na planti man i no stap amamas? (b) Pasin bilong amamas em i wanem samting? Yumi inap kisim olsem wanem?

LONG dispela taim nogut bilong nau, planti man i no amamas. Taim bikpela hevi i painim ol o wanpela ol i laikim em tumas, ating ol i pilim wankain olsem Jop, em i tok: “Mipela ol manmeri i save stap sotpela taim tasol long graun, na stat long taim mama i karim mipela, ol kain kain trabel i save kamap long mipela.” (Jop 14:⁠1) Ol hevi bilong dispela taim bilong “planti hevi” inap painim ol Kristen tu, na yumi no ken kirap nogut olsem sampela taim ol gutpela boi bilong Jehova i bel hevi.​​—⁠2 Timoti 3:⁠1.

² Tasol ol Kristen inap stap amamas, maski hevi i painim ol. (Aposel 5:​40, 41) Bilong yumi ken save olsem wanem ol inap stap amamas, pastaim yumi mas save, pasin bilong amamas em i wanem samting. Pasin bilong amamas “em samting bel inap pilim taim yumi kisim o wetim gutpela samting.”a Olsem na sapos yumi lusim liklik hap taim bilong tingim ol gutpela samting yumi kisim pinis na yumi tingim tingim ol amamas yumi inap kisim long nupela taim God bai kamapim, orait yumi inap amamas.

3. Olsem wanem yumi ken tok olgeta man i gat sampela samting ol i ken amamas long en?

³ Yumi olgeta i gat sampela samting yumi ken tenkyu long en. Tingim wanpela papa ol i pinisim em long wok. Em i tingting planti. Em i laik lukautim gut famili bilong em. Tasol sapos skin bilong em i strong na em i no gat sik, orait em i ken tenkyu long dispela. Sapos bihain em i kisim wok mani, orait em inap wok strong. O ating wanpela meri Kristen i kisim wanpela bikpela sik i wok long daunim strong bilong em. Tasol sapos ol gutpela pren na famili i sambai long em na helpim em long strongim bel na karim dispela hevi, orait em i ken tenkyu long dispela. Olgeta Kristen tru, maski ol i gat wanem kain sindaun, ol inap amamas olsem ol i save long Jehova, em i God bilong “amamas,” na Jisas Krais, “em i as bilong pasin tru bilong amamas.” (1 Timoti 1:​11; 6:​15) Tru tumas, God Jehova na Jisas Krais ol i stap amamas tru. Na ol i bin holimpas dispela amamas bilong ol, maski ol samting long graun i narapela kain long ol samting Jehova i gat laik long en long pastaim tru. Pasin bilong tupela inap lainim yumi long rot bilong holimpas amamas bilong yumi.

Ol i No Lusim Amamas Bilong Ol

4, 5. (a) Taim namba wan man na meri i bikhet, Jehova i mekim wanem? (b) Olsem wanem Jehova i holim stretpela tingting long ol manmeri?

⁴ Long gaden Iden, Adam na Iv i gat gutpela skin tru na tingting bilong ol i gutpela olgeta. Ol i gat gutpela wok long mekim na ol i stap long gutpela ples bilong mekim dispela wok. Na samting i win tru, oltaim ol inap toktok wantaim Jehova. God i laik bai tupela i stap amamas oltaim long bihain. Tasol tupela tumbuna bilong yumi bilong pastaim ol i no amamas long ol dispela gutpela samting​—⁠ol i laikim sampela samting moa​—⁠olsem na ol i stilim prut tambu long “diwai bilong givim gutpela save long wanem samting i gutpela na wanem samting i nogut.” Dispela pasin bilong sakim tok i as bilong olgeta hevi em yumi ol tumbuna bilong ol i save kisim long nau.​​—⁠Stat 2:​15-​17; 3:6; Rom 5:​12.

⁵ Adam na Iv i no tenkyu long Jehova, tasol em i no larim dispela long pinisim amamas bilong em. Em i bilip strong olsem bel bilong sampela tumbuna bilong ol bai kirapim ol long mekim wok bilong em. Olsem na taim Adam tupela Iv i no kamapim yet namba wan pikinini, Jehova i tokaut long laik bilong em long kisim bek ol tumbuna pikinini bilong ol i bihainim tok bilong em. (Stat 1:​31; 3:​15) Insait long planti handet yia bihain, planti man i bihainim pasin bilong Adam tupela Iv na ol i bikhet, tasol Jehova i no tingim dispela na givim baksait long olgeta manmeri, nogat. Em i tingim ol man na meri i save mekim em i “belgut tru,” em ol manmeri i wok strong long bihainim pasin em i laikim, long wanem, ol i laikim em tumas.​​—⁠Sindaun 27:11; Hibru 6:​10.

6, 7. Wanem sampela samting i bin helpim Jisas long stap amamas?

⁶ Olsem wanem long Jisas? Em i mekim wanem bilong holimpas amamas bilong em? Taim Jisas i stap long heven olsem spirit i gat bikpela strong, em inap lukim wok bilong ol man na meri long graun. Pasin kranki bilong ol i stap long ples klia, tasol Jisas i laikim ol tumas. (Sindaun 8:​31) Bihain, taim em i kam long graun na “stap namel” long ol manmeri, tingting bilong em long ol i no senis. (Jon 1:​14) Wanem samting i helpim dispela nambawan gutpela Pikinini bilong God long holimpas stretpela tingting long ol sinman?

⁷ Namba wan samting, Jisas i bihainim stretpela tingting taim em i putim mak long samting em i laik mekim na ol samting em i laik bai ol narapela i mekim. Em i save em i no inap kirapim olgeta man long tanim bel. (Matyu 10:​32-​39) Olsem na taim ol man i harim tok bilong Kingdom, em i amamas, maski wanpela man tasol i harim. Sampela taim pasin na tingting bilong ol disaipel bilong em i no gutpela tumas, tasol Jisas i save ol i gat laik tru long bihainim laik bilong God, olsem na em i laikim ol. (Luk 9:​46; 22:​24, 28-​32, 60-​62) Olsem na taim em i beten long Papa bilong em long heven, Jisas i stori long ol gutpela samting ol disaipel i bin mekim. Em i tok: “Ol i bin bihainim gut tok bilong yu.”​​—⁠Jon 17:⁠6.

8. Kolim sampela samting em yumi ken bihainim Jehova na Jisas long en bilong helpim yumi long holimpas amamas bilong yumi.

⁸ Sapos yumi tingim gut pasin God Jehova na Krais Jisas i bihainim long dispela samting, dispela bai helpim yumi. Olsem wanem? Yumi inap bihainim moa yet pasin bilong Jehova, olsem no ken tingting planti tumas taim samting i no kamap wankain olsem yumi laikim? Yumi inap bihainim moa yet pasin bilong Jisas na holimpas stretpela tingting long i stap bilong yumi, na isi long yumi yet na ol narapela, olsem no ken putim mak em yumi na ol narapela i no inap winim? Orait nau yumi ken skelim olsem wanem yumi inap bihainim ol dispela gutpela tok long wanpela wok ol strongpela Kristen long olgeta hap i save laikim tumas, em wok bilong autim tok.

Holimpas Stretpela Tingting Long Wok Autim Tok

9. Wanem samting i mekim na Jeremaia i kisim bek amamas bilong em? Pasin bilong em inap helpim yumi olsem wanem?

⁹ Jehova i laik bai yumi amamas long mekim wok bilong em. Maski wanem samting i kamap long dispela wok, yumi inap amamas. (Luk 10:⁠17, 20) Inap planti yia profet Jeremaia i autim tok, tasol ol man i no laik harim. Taim em i putim tingting i go long dispela samting, olsem ol man i no laik harim, amamas bilong em i pinis. (Jeremaia 20:⁠8) Tasol taim em i tingim ol gutpela samting bilong dispela tok yet em i autim, em i kisim bek amamas bilong em. Jeremaia i tokim Jehova: “Yu bin givim tok bilong yu long mi na mi kisim, olsem man i kisim kaikai. Na dispela tok bilong yu i mekim mi i amamas na belgut tru, long wanem, mi bilong yu, God.” (Jeremaia 15:16) Em nau, Jeremaia i amamas long gutpela wok em i kisim long autim tok bilong God. Yumi tu i ken amamas olsem.

10. Sapos ol man long teritori bilong yumi i no laik harim tok bilong gutnius, olsem wanem yumi inap holimpas amamas bilong yumi long wok autim tok?

¹⁰ Maski planti man i nolaik tru long harim tok bilong gutnius, i gat as tru na yumi inap amamas taim yumi mekim wok autim tok. Tingim: Jehova i bin bilip tru olsem bel bilong sampela bai kirapim ol long mekim wok bilong em. Olsem Jehova, yumi tu i no ken les​—⁠yumi mas bilip tru olsem sampela bai pilim bikpela tok i bin kamap long wok king bilong God na kisim tok bilong Kingdom. Sindaun bilong man i save senis​—⁠yumi no ken lusim tingting long dispela. Taim bikpela hevi i painim man, ating em bai kirap na tingim olsem i stap bilong em i gat wanem as bilong en. Olsem wanem? Taim kain man olsem i save em i sot tru long ol samting bilong spirit, bai yu stap bilong helpim em? (Matyu 5:⁠3) Narapela taim yu autim tok long teritori bilong yu, ating wanpela bai redi long harim tok bilong gutnius!

11, 12. Wanem samting i kamap long wanpela taun? Dispela inap skulim yumi long wanem samting?

¹¹ Na tu, senis inap kamap insait long teritori bilong yumi. Olsem: Long wanpela liklik taun, i gat wanpela lain i pas gut wantaim, em ol yangpela marit wantaim ol pikinini bilong ol. Taim ol Witnes Bilong Jehova i go long haus bilong ol, ol dispela marit i save tok, “Mipela no laik harim!” Na taim wanpela i laik harim tok bilong Kingdom, kwiktaim ol narapela i tokim em long em i no ken toktok wantaim ol Witnes. Tru tumas, i gat hatwok long autim tok long kain teritori olsem. Tasol ol Witnes i no les; ol i autim tok yet. Wanem samting i kamap long dispela?

¹² Bihain planti pikinini long dispela taun i go bikpela, na ol i marit na sindaun long haus bilong ol yet. Sampela i pilim olsem sindaun bilong ol i no helpim ol long i stap amamas tru, olsem na ol i wok long painim tok i tru. Ol i painim pinis taim ol i putim yau long tok bilong gutnius ol Witnes i autim. Inap planti yia kongrigesen i bin stap liklik, tasol nau i wok long i go bikpela. Tingim amamas bilong ol pablisa bilong Kingdom ol i no bin les! I gutpela sapos yumi tu i strong long autim gutpela tok bilong Kingdom na kisim amamas long dispela!

Ol Wanbilip Bai Helpim Yu

13. Taim yumi bel hevi, yumi ken go long husat?

¹³ Taim bikpela hevi i painim yu, yu inap go long husat bilong mekim gut bel bilong yu? Planti milion wokboi bilong Jehova i dediket pinis ol i go pastaim long Jehova long rot bilong beten, na bihain ol i go long ol brata sista Kristen bilong ol. Taim Jisas i stap long graun, em i tingim helpim ol disaipel i givim long em i bikpela samting tru. Long apinun paslain long em i dai, em i tokim ol: “Taim ol samting i kamap bilong traim mi, yupela i bin i stap wantaim mi, na yupela i no lusim mi.” (Luk 22:28) Tru, ol dispela disaipel i no gutpela olgeta, tasol ol i bin stap gut long Pikinini bilong God na dispela i bin mekim gut bel bilong em. Yumi tu inap kisim strong long ol wanlotu bilong yumi.

14, 15. Taim pikinini man bilong tupela marit i dai, wanem samting i helpim ol long karim dispela hevi? Samting i painim tupela i lainim yu long wanem samting?

¹⁴ Tupela marit Kristen, Michel na Diane, i kisim save olsem helpim ol brata na sista i givim long ol em i bikpela samting tru. Pikinini man bilong ol, Jonathan, em i gat 20 krismas, na em i wanpela Kristen. Skin bilong em i gat strong, na gutpela samting inap painim em bihain. Ol dokta i tok em i gat wanpela buk nogut long kru. Ol i wok strong long helpim em, tasol sik bilong em i go bikpela na long wanpela apinun em i dai. Michel na Diane i bel hevi stret. Ol i save Miting Bilong Wok bilong dispela apinun i laik pinis, tasol ol i laik bai sampela i mas mekim gut bel bilong ol, olsem na ol i askim elda i stap wantaim ol long go wantaim ol long Haus Kingdom. Ol i kamap stret long taim kongrigesen i kisim toksave olsem Jonathan i dai pinis. Taim miting i pinis, ol brata sista i holim tupela, em ol i wok long krai, na ol i givim sampela tok bilong mekim gut bel bilong ol. Diane i tok: “Taim mipela i kamap pinis long Haus Kingdom, bel bilong mipela i bagarap stret, tasol ol brata i mekim gut bel bilong mipela! Tru, ol i no inap tekewe dispela hevi, tasol ol i strongim mipela long karim!”​​—⁠Rom 1:​11, 12; 1 Korin 12:​21-​26.

¹⁵ Dispela hevi i kirapim Michel na Diane long go klostu moa long ol brata bilong ol, na i helpim tupela yet long pas gut wantaim. Michel i tok: “Mi lain pinis long laikim moa yet gutpela meri bilong mi. Taim mipela i bel hevi, mipela i save toktok wantaim long tok i tru bilong Baibel na ol samting Jehova i mekim bilong helpim mipela.” Diane i tok: “Nau mipela i tingim moa yet ol gutpela samting Kingdom bai mekim.”

16. Bilong wanem i bikpela samting long yumi yet i kirap na tokim ol brata long ol samting yumi mas kisim helpim long en?

¹⁶ Tru tumas, ol brata sista Kristen inap ‘helpim yumi gut tru’ long taim bilong hevi, na long dispela rot yumi inap holimpas amamas bilong yumi. (Kolosi 4:​11) Ol i no save long tingting bilong yumi, olsem na taim yumi laik bai sampela i mas mekim gut bel bilong yumi, yumi mas kirap na toksave long ol. Samting ol i helpim yumi long en, yumi ken tok tenkyu long ol, na tingim olsem dispela helpim i kam long Jehova.​​—⁠Sindaun 12:25; 17:⁠17.

Lukluk Long Kongrigesen

17. Wanem sampela hevi i painim wanpela mama wanpis? Yumi gat wanem tingting long kain meri olsem?

¹⁷ Taim yu lukluk gut long ol wanbilip, yu bai lain long pilim tru pasin bilong ol na amamas long bung wantaim ol. Lukluk long kongrigesen bilong yu. Yu lukim wanem samting? Yu lukim wanpela mama wanpis i wok strong long helpim ol pikinini long kamap bikpela insait long tok i tru? Yu bin lusim hap taim bilong tingim gutpela piksa em i makim? Traim tingim sampela hevi i painim em. Wanpela mama wanpis, Jeanine, i kolim sampela hevi, olsem: em i no gat poroman, ol man long ples wok i laik gris wantaim em, em i mas skelim gut mani bilong baim ol samting. Tasol samting i gat hatwok tru long en, em wok bilong lukautim ol pikinini long ol samting bilong tingting na bel, long wanem, olgeta pikinini i no wankain. Orait nau Jeanine i kamapim narapela hevi: “Man bilong mi i no stap, olsem na mi mas daunim pasin bilong putim pikinini man olsem papa bilong famili​—⁠olsem senis bilong papa​—⁠o pikinini meri i stap olsem pren bilong kamapim ol hevi bilong mi.” Olsem planti tausen papa na mama wanpis i stap aninit long Jehova i save mekim, Jeanine tu i save wok mani long olgeta de na lukautim ol pikinini bilong em. Na tu, em i stadi wantaim ol pikinini long Baibel, na skulim ol long pasin bilong mekim wok autim tok, na em i bringim ol i kam long ol miting bilong kongrigesen. (Efesus 6:⁠4) Olgeta de Jehova i lukim hatwok dispela famili i mekim long stap gut long em, na dispela i mekim em i amamas! Yumi amamas tru kain famili olsem i stap namel long yumi, a?

18, 19. Stori long sampela samting yumi ken mekim bilong helpim yumi long pilim moa yet gutpela pasin bilong ol brata sista long kongrigesen.

¹⁸ Orait lukluk gen long kongrigesen bilong yu. Ating yu lukim sampela gutpela man o meri em poroman bilong ol i dai pinis, tasol ol i go long olgeta miting​—⁠ol i “no save lusim.” (Luk 2:​37) Tru, sampela taim ol i bel hevi long i stap wanpis. Ol i sori tru poroman bilong ol i no stap moa! Tasol ol i wok strong long mekim wok bilong Jehova na long helpim ol narapela. Stretpela tingting bilong ol i helpim kongrigesen long i stap amamas! Wanpela Kristen i bin mekim wok bilong God long olgeta de inap 30 yia, em i tok: “Mi kisim bikpela amamas tru taim mi lukim ol lapun brata na sista, em planti hevi i bin painim ol, ol i stap gut long mekim yet wok bilong Jehova!” Tru tumas, ol lapun Kristen namel long yumi ol i save strongim tru bel bilong ol yangpela.

¹⁹ Olsem wanem long ol nupela em nau tasol ol i kirap long bung wantaim kongrigesen? Taim ol i stap long miting na tokaut long bilip bilong ol, dispela i strongim yumi, a? Tingim ol samting bilong spirit ol i bin kamap strong long en, kirap long taim ol i stat long stadi long Baibel. Yumi save, Jehova i amamas tru long ol. Olsem wanem? Yumi tu i amamas long ol? Yumi save tokim ol yumi amamas long ol na long ol wok ol i mekim?

20. Olsem wanem yumi ken tok olgeta wan wan bilong kongrigesen i mekim bikpela wok insait long kongrigesen?

²⁰ Olsem wanem? Yu wanpela marit o singel o wanpela papa o mama i stap wanpis? Yu wanpela pikinini i no gat mama o papa o wanpela marit em poroman bilong yu i dai pinis? Inap planti yia yu bin bung wantaim ol manmeri long kongrigesen, o nau tasol yu kirap long bung wantaim ol? Yu mas bilip olsem, gutpela pasin yu mekim i save strongim mipela olgeta. Na taim yu insait long ol singsing o yu bekim tok o yu mekim wanpela tok long Skul Tiokratik Bilong Autim Tok, dispela i helpim mipela long stap amamas. Tasol bikpela samting moa yet, dispela i mekim Jehova yet i bel gut.

21. I gat planti as na yumi mas mekim wanem? Wanem ol askim i kamap?

²¹ Tru tumas, maski yumi stap long taim bilong hevi, yumi inap amamas long lotuim God bilong yumi, em God bilong amamas. I gat planti as na yumi mas bihainim dispela tok bilong Pol: “[“Wok yet long amamas,” NW ] . . . na God, em i save givim bel bilong en long yupela na givim bel isi long yupela, em bai i stap wantaim yupela.” (2 Korin 13:11) Tasol olsem wanem sapos wanpela bagarap olsem bikpela guria o win i kamap, o ol man i mekim nogut tru long yumi, o yumi sot tru long mani? Taim kain samting olsem i painim yumi, yumi inap holimpas pasin bilong amamas? Yu yet i ken bekim ol dispela askim taim yumi tingim stori i kamap bihain long dispela.

[Futnot]

Yu Inap Bekim?

• Pasin bilong amamas em i wanem samting?

• Sapos yumi holimpas stretpela tingting, olsem wanem dispela inap helpim yumi long stap amamas?

• Wanem samting inap helpim yumi long kisim stretpela tingting long teritori bilong kongrigesen bilong yumi?

• Wanem sampela pasin bilong ol brata na sista insait long kongrigesen em yu pilim tru?

[Ol Piksa long pes 10]

Senis inap kamap insait long teritori

[Piksa long pes 12]

Wanem sampela hevi i painim ol brata sista long kongrigesen bilong yu?