Holimpas Amamas Bilong Yu Long Wok Bilong Jehova
“Oltaim yupela i mas amamas long Bikpela. Mi tok gen, yupela i mas amamas.”—FILIPAI 4:4.
1, 2. Olsem wanem wanpela brata na famili bilong em inap holimpas amamas bilong ol, maski olgeta samting bilong ol i lus pinis?
JEMS em wanpela Kristen i gat 70 krismas na em i sindaun long Siera Leon. Kirap long taim em i yangpela, em i bin wok strong i kam inap long taim em i lapun. Tingim amamas bilong em taim em i bungim mani inap long baim wanpela haus i gat 4-pela rum! Jems wantaim famili bilong em ol i go sindaun long dispela haus, tasol bihain liklik, pait i kamap long kantri, na haus i paia na bagarap olgeta. Haus i lus pinis, tasol ol i no lusim amamas bilong ol. Bilong wanem?
2 Jems wantaim famili i putim tingting i go long ol samting i stap yet, na i no long ol samting i lus pinis. Jems i tok: “Long taim bilong pait tu, mipela i mekim ol miting, na kaunim Baibel, na beten wantaim, na mekim wok long ol liklik samting mipela holim bilong helpim ol narapela. Mipela inap holimpas amamas bilong mipela, long wanem, mipela i tingim pasin wanbel bilong mipela wantaim Jehova.” Ol dispela gutpela Kristen i “wok yet long amamas,” long wanem, ol i tingim ol gutpela blesing ol i kisim—nambawan gutpela blesing, em ol i pas gut wantaim Jehova. (2 Korin 13:11, NW ) Tru, ol i hatwok long karim ol hevi, tasol ol i no lusim pasin bilong amamas long Jehova.
3. Wanem samting i helpim sampela Kristen bilong pastaim long holimpas amamas bilong ol?
3 Ol Kristen bilong pastaim i bin kisim hevi, kain olsem i bin painim Jems na famili bilong em. Tasol aposel Pol inap raitim dispela tok long ol Kristen Hibru: “Taim ol man i bin pulim ol samting bilong yupela, yupela i amamas i stap na larim ol.” Nau Pol i kamapim as bilong dispela amamas bilong ol: “Yupela i save olsem, samting tru bilong yupela i stap yet, na dispela bai i stap oltaim.” (Hibru 10:34) Ol dispela Kristen long taim bilong ol aposel ol i gat gutpela samting ol i wetim. Ol i tingting long kisim samting ol narapela i no inap pulim—em “laip olsem prais” long Kingdom bilong God long heven. (KTH 2:10) Long nau, samting yumi ol Kristen i wetim—laip long heven o long graun—em inap helpim yumi long holimpas amamas bilong yumi, maski bikpela hevi i painim yumi.
‘Amamas Long Wetim God i Mekim Gut Long Yumi’
4, 5. (a) Tok Pol i givim long ol Rom long ol i mas ‘amamas long wetim God i mekim gut long ol,’ bilong wanem dispela tok i kam long taim stret bilong en? (b) Wanem samting inap mekim na Kristen i no tingim moa gutpela samting em i wetim?
4 Aposel Pol i strongim ol wanbilip long Rom long ‘amamas long wetim’ laip i stap oltaim. (Rom 12:12) Dispela tok i kam long ol long taim stret. Klostu 10-pela yia bihain long taim Pol i rait long ol, ol man i kirap na mekim nogut tru long ol, na King Niro i putim tok long givim bikpela pen tru long sampela i go inap long ol i dai. Ol i bilip strong long kisim laip olsem prais, em God i bin tok promis long en, na dispela i strongim ol long karim hevi. Olsem wanem long yumi long nau?
5 Yumi ol Kristen i save, ol man bai mekim nogut long yumi tu. (2 Timoti 3:12) Na tu, yumi save olsem “taim nogut i save painim yumi olgeta.” (Saveman 9:11) Birua inap painim wanpela yumi laikim tumas na bagarapim em. O wanpela sik inap bagarapim papa o mama o wanpela gutpela pren. Sapos yumi no wok long tingim ol gutpela samting Kingdom bai mekim, orait taim hevi i painim yumi, yumi inap bagarap long ol samting bilong spirit. Olsem na yumi mas askim skin bilong yumi, ‘Mi save “amamas long wetim God i mekim gut long mi”? Mi save lusim hap taim long tingim tingim dispela samting mi wetim? Paradais i kamap bihain, em i samting tru long mi? Long tingting bilong mi, mi stap insait long dispela Paradais? Mi gat bikpela laik long pasin nogut bilong nau i mas pinis wankain olsem long taim mi lainim tok i tru long pastaim?’ Yumi mas tingim gut dispela laspela askim. Bilong wanem? Long wanem, sapos yumi stap strong long skin, na yumi gat gutpela wok mani, na yumi stap long hap i no gat pait o hangre o guria samting, dispela inap mekim na yumi no tingim moa olsem i bikpela samting long nupela taim em God i bin tok promis long en i mas i kam.
6. (a) Taim Pol na Sailas i kisim hevi, ol i putim tingting i go long wanem samting? (b) Olsem wanem pasin bilong Pol na Sailas inap strongim bel bilong yumi long nau?
6 Pol i givim sampela tok moa long ol Rom: “Sapos hevi i kamap long yupela, orait yupela i mas sanap strong.” (Rom 12:12) Planti hevi i bin painim Pol yet. Wanpela taim long samting olsem driman em i lukim wanpela man i singautim em long “kam long Masedonia” bilong helpim ol man long kisim save long Jehova. (Aposel 16:9) Pol wantaim Luk na Sailas na Timoti ol i kalap long sip na go long Yurop. Wanem samting i wetim ol dispela strongpela misineri? Bikpela hevi! Taim ol i autim tok pinis long taun Filipai long Masedonia, ol Filipai i paitim Pol na Sailas long kanda na putim tupela long kalabus. Dispela i kamapim klia, sampela man long Filipai ol i birua nogut tru long tok bilong Kingdom—i no olsem ol i les tasol long harim, nogat. Yu ting dispela i mekim na tupela misineri i lusim amamas bilong ol? Nogat. Taim ol birua i paitim tupela pinis na putim ol long kalabus, “long biknait Pol tupela Sailas i wok long beten na mekim song long God.” (Aposel 16:25, 26) Tru, pen Pol na Sailas i kisim long kanda i no givim amamas long ol, tasol ol i no wok long tingim dispela. Ol i putim tingting i go long Jehova na ol blesing ol i kisim long em. Pol tupela Sailas i kisim hevi, tasol ol i “sanap strong,” olsem na ol i stap gutpela piksa tru bilong ol brata long Filipai na ol narapela hap.
7. Bilong wanem yumi mas tok tenkyu taim yumi beten?
7 Pol i tok: “Beten long olgeta taim.” (Rom 12:12) Olsem wanem? Taim yu tingting planti, yu save beten? Yu beten long wanem samting? Ating yu kolim stret hevi bilong yu na askim Jehova long helpim yu. Tasol yu ken tok tenkyu tu long ol gutpela blesing yu kisim. Taim hevi i kamap, sapos yumi wok long tingim ol gutpela pasin Jehova i mekim long yumi, dispela bai helpim yumi long ‘amamas long wetim God i mekim gut long yumi.’ Planti hevi i bin painim Devit, tasol em i tok: “God, Bikpela bilong mi, yu bin mekim planti gutpela wok bilong helpim mipela. I no gat man i olsem yu. Yu winim ol tru. Sapos mi autim tok long ol man na tokim ol long wok na tingting bilong yu, olaman! Dispela i moa moa yet! Mi no inap kaunim ol samting yu bin mekim bilong helpim mipela.” (Song 40:5) Olsem Devit i mekim, sapos oltaim yumi tingim tingim ol blesing yumi kisim long Jehova, bai yumi amamas.
Holim Stretpela Tingting
8. Wanem samting i helpim Kristen long stap amamas, maski ol birua i mekim nogut tru long em?
8 Jisas i laik bai ol man i bihainim em ol i mas holim stretpela tingting taim hevi i painim ol. Em i tok: “Sapos ol i lukim yupela i stap long lain bilong mi, na ol i tok nogut long yupela na ol i mekim nogut long yupela na sutim kain kain tok giaman long yupela, orait yupela i ken amamas.” (Matyu 5:11) I gat wanem as na yumi ken amamas taim kain hevi olsem i painim yumi? Yumi save sakim pasin birua na dispela i kamapim klia olsem spirit bilong Jehova i stap wantaim yumi. Aposel Pita i tokim ol wanlain Kristen long taim bilong em: “Yupela i holim nem bilong Krais, na sapos long dispela ol i tok nogut long yupela, orait yupela i ken amamas. Long wanem, yupela i save, Spirit bilong God, em Spirit i gat biknem na strong, em i stap long yupela.” (1 Pita 4:13, 14) Long rot bilong spirit holi, Jehova bai helpim yumi tu long karim hevi na sanap strong, na holimpas amamas bilong yumi.
9. Taim sampela brata i stap long kalabus, long wanem, ol i holimpas bilip, wanem samting i helpim ol long amamas?
9 Taim hevi nogut tru i painim yumi, long dispela kain taim tu i gat sampela samting yumi inap amamas long en. Wanpela Kristen, nem bilong em Adolf, i save pinis long dispela. Em i stap long wanpela kantri em inap planti yia ol i tambuim wok bilong ol Witnes Bilong Jehova. Ol polis i holim Adolf wantaim sampela poroman bilong em na kot i givim planti yia kalabus long ol, long wanem, ol i no laik tru long givim baksait long ol bilip bilong ol em Baibel i as bilong en. I stap bilong ol long kalabus i gat hatwok long en, tasol olsem Sol na Sailas, Adolf na ol poroman bilong em ol i tingim sampela as na ol inap tenkyu long God. Ol i save, samting i painim ol long kalabus i helpim ol long strongim bilip bilong ol na kisim sampela gutpela pasin Kristen, olsem pasin bilong givim planti samting, pilim hevi bilong narapela, na laikim tru ol brata. Olsem: Taim wanpela kalabus i kisim wanpela mekpas long famili, em i skelim sampela samting bilong en i go long ol wanbilip, na ol i tingim olsem ol dispela samting i kam long Jehova, em Man bilong givim “olgeta gutpela samting yumi save kisim na olgeta presen i gutpela tru.” Ol kain gutpela pasin olsem i givim amamas long man i givim samting na long man i kisim samting—tupela wantaim. Olsem na dispela strafe yet em kot i givim bilong bagarapim bilip bilong ol, em i helpim ol long kamap strong moa yet long ol samting bilong spirit!—Jems 1:17; Aposel 20:35.
10, 11. Wanpela sista i mekim wanem taim ol i wok long sutim planti askim long em na bihain ol i givim planti yia kalabus long em?
10 Ella tu i stap long wanpela kantri ol i tambuim wok bilong Kingdom. Ol polis i holim em, long wanem, em i save tokim ol narapela long ol gutpela samting ol Kristen i wet long en. Inap 8-pela mun ol i wok long sutim planti askim long em. Taim em i kamap long kot, kot i givim 10-pela yia kalabus long em. Long dispela kalabus i no gat wanpela i lotu long Jehova. Taim Ella i go kalabus, em i gat 24 krismas tasol.
11 Ella i yangpela na em i no laik lusim planti yia long wanpela rum kalabus. Tasol em i no inap senisim dispela samting i bin painim em, olsem na em i ting long senisim sampela tingting bilong em. Bilong mekim olsem, em i tingim dispela kalabus olsem teritori bilong em yet long autim tok. Em i tok: “I gat planti meri mi inap autim tok long ol, olsem na ol yia i kamap na i go pinis hariap.” Em i stap 5-pela yia pinis long kalabus, na nau ol man i wok gen long givim planti askim long em. Ol i save ples kalabus i no bin bagarapim bilip bilong em, olsem na ol i tokim em. “Mipela i no ken larim yu i go fri, long wanem, tingting bilong yu i no senis.” Ella i tok: “Nogat! Tingting bilong mi i senis pinis! Bel bilong mi i amamas, winim long taim mi kam nupela long kalabus, na bilip bilong mi i strong moa!” Em i tok moa: “Sapos yu no larim mi i go, bai mi stap inap long taim Jehova i larim mi i go fri.” Em nau, faiv na hap yia kalabus i no bin tekewe amamas bilong Ella! Em i lain long stap isi, maski wanem hevi i painim em. Olsem wanem? I gat sampela samting stori bilong Ella inap skulim yumi long en?—Hibru 13:5.
12. Taim hevi i painim Kristen, wanem samting inap helpim em long stap bel isi tru?
12 Yumi no ken ting Ella i narapela kain meri na em inap karim kain hevi olsem, nogat. Ella i stori long dispela taim em i no kamap yet long kot na ol i sutim planti askim long em. Em i tok: “Tit bilong mi i pairap pairap, na mi pilim olsem mi wanpela liklik pisin nating i pret nogut tru.” Tasol Ella i gat strongpela bilip long Jehova. Em i bilip tru long em. (Sindaun 3:5-7) Dispela i mekim na em i tingim God olsem wanpela man i stap tru. Em i tok: “Olgeta taim mi go long dispela rum em ol lain i stap bilong givim askim long mi, mi kisim bel isi. . . . Taim mi pret bikpela, bel bilong mi i stap isi moa yet.” Jehova em i as bilong dispela bel isi. Aposel Pol i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” —Filipai 4:6, 7.
13. Olsem wanem na yumi inap bilip olsem sapos hevi i painim yumi, bai yumi gat strong long karim?
13 Ella—nau em i lusim pinis kalabus—em i bin holimpas amamas bilong em, maski hevi i painim em. Em i mekim long strong bilong Jehova, em i no mekim long strong bilong em yet. Na i wankain tu long aposel Pol, em i tok: “Mi save amamas moa yet long stap olsem man i no gat strong. Olsem bai strong bilong Krais i ken i stap long mi. . . . Long wanem, taim mi no gat strong, long dispela taim tasol mi gat strong tru.”—2 Korin 12:9, 10.
14. Stori long stretpela tingting Kristen i ken bihainim taim hevi i kamap na long samting dispela inap kamapim.
14 Ating ol hevi bilong yu i narapela long ol hevi yumi bin stori long en. Tasol olgeta hevi, maski ol i wanem kain, ol i gat hatwok bilong karim. Olsem: Ating bos i sutim tok long wok bilong yu—em i no mekim olsem long ol wokman bilong ol narapela lotu. Tasol ating yu no inap painim narapela wok mani. Olsem wanem yu inap holimpas amamas bilong yu? Tingim bek Adolf na ol poroman bilong em. Samting i painim ol long kalabus i helpim ol long kisim sampela gutpela pasin. Sapos yu givim bel long mekim gutpela wok inap long bos i ken amamas long en—maski em i “bos nogut tru”—dispela bai helpim yu long kisim sampela pasin Kristen, olsem pasin bilong sanap strong na karim hevi na pasin bilong no ken les. (1 Pita 2:18) Na tu, ating bai yu kamap gutpela wokman moa, na sapos olsem, ating dispela bai helpim yu long kisim wanpela wok long bihain i givim bikpela amamas long yu. Orait nau yumi ken stori long sampela samting moa bilong helpim yumi long stap amamas long mekim wok bilong Jehova.
Lusim Ol Samting i Pulim Nating Taim
15-17. Tupela marit i mekim wanem na dispela i daunim hevi bilong ol, maski ol i no inap tekewe as tru bilong en?
15 Kain wok yumi mekim o yumi wok we, ating em i no laik bilong yumi, tasol ating i gat sampela samting long i stap bilong yumi em yumi inap bosim. Tingim dispela samting i bin kamap:
16 Tupela marit Kristen i singautim wanpela elda i kam kaikai long haus bilong ol. Ol i bung i stap na nau tupela i tokim elda i gat wanpela hevi i daunim ol. Wok mani bilong tupela i pulim bikpela hap taim na strong bilong ol, tasol ol i no gat rot long painim narapela wok. Ol i tingting planti, ol inap karim dispela hevi inap hamas mun o yia moa.
17 Taim ol i askim elda long givim sampela tingting long ol, em i tok: “Lusim ol samting i pulim nating taim.” Olsem wanem ol inap mekim olsem? Bilong i go i kam long ples wok, tupela i save lusim 3-pela aua long olgeta de. Elda, em i save gut long tupela, em i tok ol inap katim hap taim ol i lusim long i go i kam long ples wok sapos ol i go sindaun long hap klostu long ples wok. Long hap taim ol i kisim bek, bai ol inap lukautim ol narapela bikpela samting—o malolo tasol. Olsem na sapos ol hevi i wok long daunim amamas bilong yu, i gutpela sapos yu stretim sampela samting long i stap bilong yu, a?
18. Taim yu laik mekim wanpela bikpela samting, bilong wanem yu mas tingting gut pastaim?
18 Narapela samting yu ken mekim bilong daunim hevi, em olsem: Taim yu laik mekim wanpela bikpela samting, tingting gut pastaim. Olsem: Wanpela Kristen i laik wokim wanpela haus. Em i no bin wokim haus bipo, tasol taim em i makim stail bilong haus, em i makim wanpela stail i gat hatwok tru long en. Nau em i save olsem, sapos em i bin “was gut,” olsem tingting gut pastaim, taim em i laik makim stail bilong haus, ating bai em abrusim planti hevi. (Sindaun 14:15) Narapela Kristen i bin tok promis long bekim dinau bilong wanpela wanbilip sapos dispela wanbilip i no inap bekim. Ol i wokim kontrak. Pastaim dispela wanbilip i wok long bihainim kontrak, tasol bihain em i no bihainim moa. Man i givim dinau em i tingting planti na em i strong long Kristen i bekim olgeta mani em dispela wanbilip i gat dinau long en. Dispela i putim bikpela hevi long Kristen. Tasol sapos em i bin skelim gut olgeta samting pastaim, taim em i no tok promis yet long bekim olgeta dispela mani sapos dispela wanbilip i no inap bekim, ating bai em i abrusim dispela hevi, a?—Sindaun 17:18.
19. Wanem sampela samting yumi ken mekim bilong helpim yumi long stap isi?
19 Taim skin i les, nogut yumi ting, bilong daunim dispela hevi na kisim bek amamas, yumi mas lusim sampela miting na sotim taim yumi stadi long Baibel na autim tok, nogat. Long wanem, em ol bikpela samting bilong helpim yumi long kisim spirit holi bilong Jehova—amamas em wanpela pasin dispela spirit i save kamapim. (Galesia 5:22) Olgeta taim ol wok Kristen i save givim nupela strong long yumi na i no save mekim skin i les. (Matyu 11:28-30) Ol wok bilong dispela graun na ol samting bilong amamas yumi mekim, ol dispela samting inap mekim skin i les—ol wok bilong spirit, nogat. Sapos yumi go slip kwik long nait, ating dispela inap helpim yumi long kisim bek strong. N. H. Knorr, em wanpela bilong Gavening Bodi bilong ol Witnes Bilong Jehova i go inap long taim em i dai, em i save tokim ol misineri: “Taim yu bel hevi, namba wan samting yu mas mekim, em yu mas kisim gutpela malolo. Taim yu kisim gutpela slip pinis, bai yu no hatwok olsem bipo long stretim hevi!”
20. (a) Kolim sampela samting yumi ken mekim bilong holimpas amamas bilong yumi. (b) Long tingting bilong yu, i gat wanem ol as na yumi ken amamas? (Lukim blok long pes 17.)
20 Ol Kristen i holim wanpela gutpela wok tru. Ol inap mekim wok bilong God “em i as bilong pasin tru bilong amamas.” (1 Timoti 1:11) Olsem yumi stori pinis, yumi inap holimpas pasin bilong amamas, maski sampela bikpela hevi i painim yumi. Oltaim yumi mas tingim ol gutpela samting Kingdom bai mekim, na redi long stretim tingting bilong yumi taim i gat wok long mekim, na lusim ol samting i pulim nating taim bilong yumi. Sapos yumi mekim olsem, orait, maski wanem samting i painim yumi, bai yumi inap bihainim tok bilong aposel Pol: “Oltaim yupela i mas amamas long Bikpela. Mi tok gen, yupela i mas amamas.”—Filipai 4:4.
Tingim Gut Ol Dispela Askim:
• Bilong wanem oltaim yumi mas tingim ol gutpela samting Kingdom bai mekim?
• Wanem samting inap helpim yumi long holimpas pasin bilong amamas, maski hevi i painim yumi?
• I gat wanem as na yumi mas wok long lusim sampela samting i pulim nating taim bilong yumi?
• Sampela i bin mekim wanem na ol i lusim sampela samting i pulim nating taim bilong ol?
[Blok/Ol Piksa long pes 17]
Sampela As Moa na Yumi Ken Amamas
Yumi ol Kristen, olsem na i gat planti as na yumi ken amamas. Tingim ol dispela samting:
1. Yumi save long Jehova.
2. Yumi save long tok i tru bilong Tok Bilong God.
3. Long rot bilong bilip long ofa bilong Jisas, God inap lusim ol rong bilong yumi.
4. Kingdom bilong God i mekim wok i stap—klostu nau nupela taim bai kamap!
5. Jehova i bin bringim yumi i kam insait long wanpela paradais bilong spirit.
6. Yumi bung wantaim ol gutpela poroman Kristen.
7. Yumi holim wanpela gutpela wok—em wok bilong autim tok.
8. Yumi stap laip, na skin i gat sampela strong.
Yu inap kolim sampela as moa na yumi ken amamas?
[Piksa long pes 13]
Pol na Sailas i save amamas, maski ol i stap long kalabus
[Ol Piksa long pes 15]
Yu save putim tingting i go long nupela taim God bai kamapim?