Baibel i Tok Wanem?

God Em i Wanpela Man Tru?

PLANTI man i kirap nogut taim ol i lukim ol gutpela wara na maunten samting, na dispela i kirapim ol long bilip olsem i gat wanpela samting i gat bikpela strong i stap, olsem wanpela god. Olsem wanem? Taim yu tingim ol samting i stap long graun na ples antap, yu save kirap nogut long en? Yu save amamas long ol naispela bikbus na ol pisin samting, na kirap nogut long bodi bilong yumi ol manmeri i narapela kain tru?

Sapos olsem, ating ol dispela samting i kirapim yu tu long bilip olsem i gat wanpela God i stap husat i gat bikpela strong. Sampela lotu i save tok i gat wanpela kain god i stap long ol maunten, diwai, skai, na ol narapela samting i stap long ples antap na graun. Na sampela i bilip olsem spirit bilong ol tumbuna, em sampela i gutpela na i laik helpim man na sampela i nogut, ol i bung wantaim olsem wanpela kain strong, na olgeta wantaim i kamap olsem Man i Nambawan Olgeta​—em God!

Long dispela tupela bilip wantaim, ol i bilip olsem dispela bikpela strong i no olsem wanpela man i gat ol tingting na pasin bilong em yet. Sampela i hatwok long bilip olsem God i gat tingting, o pilim ol samting, o em i gat laik bilong em, o i gat ol samting em i tingting pinis long mekim. Yu ting God em i wanpela Man tru? Baibel i bekim klia dispela askim, em wanpela olpela buk holi em planti lain bilong olgeta hap ol i holim long nau.

Pasin Bilong Yumi Man i Soim Pasin Bilong God

Baibel i tok God i bin wokim man bilong man i ken kamapim ol pasin bilong God yet. Stat 1:27 i tok: “God i wokim ol manmeri na ol i kamap olsem God yet.”

I klia tru olsem dispela tok i no makim olsem namba wan man na meri i wankain stret olsem God, nogat. Baibel i tok God em i wanpela spirit ol man i no inap lukim, tasol yumi ol man i narapela kain, God i kisim graun na wokim yumi long en. (Stat 2:7; Jon 4:24) Tru, yumi ol man i no wankain olsem God, tasol sapos yumi glasim gut ol pasin bilong yumi ol man, bai yumi inap kisim sampela save long ol pasin tru bilong God.

Ol man inap mekim olkain wok long strong bilong ol, na mekim ol samting ol i bin skelim gut na tingting long mekim. Samting i kirapim yumi long mekim olsem em ol pasin yumi gat, olsem gutpela pasin, pasin bilong wokim gut tingting, savetingting, na stretpela pasin. Yumi ol man i gat kain kain pasin, olsem pasin laikim, pasin bilong nolaik tru long ol samting, na belhat. Yumi olgeta i gat narapela narapela skel bilong kamapim ol dispela pasin, olsem na yumi no wankain. Tru tumas, yumi olgeta wan wan i gat ol pasin bilong yumi yet.

Yu ting i stret sapos God i wokim yumi i kamap ol man i gat kain kain save na pasin, tasol em yet i wanpela strong nating i save drip nabaut olsem wanpela kain spirit? Sapos God i bin wokim yumi i kain olsem em yet, orait planti pasin bilong God bai i wankain olsem pasin bilong yumi ol man. Tingim ol dispela samting:

God i gat nem. Baibel i tok long Aisaia 42:8 (NW): “Mi Jehova, em nem bilong mi.” God i laik bai ol man i save long nem bilong em. Baibel i tok tu olsem: “Yumi olgeta i mas amamas long nem bilong Bikpela [“Jehova,” NW], nau na olgeta taim bihain. Long hap bilong sankamap i go inap hap bilong san i go daun, yumi olgeta manmeri i mas litimapim nem bilong Bikpela.” (Song 113:​2, 3) Olsem na taim ol manmeri bilong lotuim God ol i kolim nem bilong em planti taim, dispela i soim olsem ol i tingim em i olsem wanpela Man.

I no gat wanpela i olsem God. Baibel i tok God i narapela kain long olgeta narapela god. (1 Korin 8:​5, 6) Baibel i tok: “God, Bikpela, yu nambawan tru. I no gat wanpela olsem yu. Yu wanpela tasol yu God tru.” (2 Samuel 7:22) Baibel i tok tu olsem Jehova “em i God bilong heven na bilong graun. Na i no gat narapela God. Nogat tru.”​—Lo 4:39.

God Jehova i nolaik tru long pasin nogut. Ol man tasol inap kamapim pasin bilong nolaik tru long ol samting. Baibel i tok God i nolaik tru long ol pasin olsem ‘hambak na lukim ol arapela man i olsem samting nating, mekim tok giaman, kilim nating ol arapela man, tingting long mekim pasin nogut, hariap long mekim sin, tok giaman long kot, mekim ol man i bel nogut long ol brata bilong ol yet.’ (Sindaun 6:​16-19) Baibel i tok God i nolaik tru long pasin bilong ol man long nogutim ol narapela man. Long rot dispela tok, yumi inap kisim save olsem God i save tingim i stap bilong yumi na em i nolaik tru long ol samting i givim pen na hevi long yumi.

Jehova em God bilong pasin laikim. Baibel i tok God i laikim tumas “olgeta manmeri bilong graun.” (Jon 3:16) Baibel i tok God i olsem wanpela gutpela papa husat i laik bai ol gutpela samting tasol i painim ol pikinini bilong em long graun. (Aisaia 64:8) Sapos ol man i tingim God olsem gutpela Papa bilong ol, ol bai kisim planti blesing.

Yu Inap i Stap Pren Bilong God

Baibel i tok klia olsem Man Bilong Wokim yumi em i wanpela Man i gat nem bilong em yet, na em i gat ol pasin bilong em. Em inap kamapim bikpela strong bilong em na mekim ol samting em i tingting pinis long mekim, na samting i kirapim em long mekim olsem, em ol gutpela pasin olsem mekim gut long ol narapela, savetingting, na stretpela pasin. Em i no stap longwe long yumi na yumi inap i go long em. Em yet i tok: “Mi God, Bikpela bilong yupela. Mi save sambai long yupela na mi tokim yupela olsem, yupela i no ken pret. Bai mi helpim yupela.”​—Aisaia 41:13.

I gat samting God i tingting pinis long mekim long ol man. Baibel i tok: “Ol stretpela man bai i kisim graun God i givim ol, na bai ol i stap oltaim long en.” (Song 37:29) Taim yumi save olsem Jehova em wanpela Man i gat ol tingting na pasin bilong em yet, yumi no hatwok long pas gut wantaim em na kisim ol blesing em i tok long givim long ol manmeri i laik kamap pren bilong em.​—Lo 6:​4, 5; 1 Pita 5:​6, 7.

YU LAIK SAVE?

[Piksa long pes 30]

● God i gat nem bilong em yet?​—Aisaia 42:​8, (NW).

● I gat planti god i stap?​—1 Korin 8:​5, 6.

● Ol man inap pas gut wantaim trupela God olsem pren bilong em?​—1 Pita 5:​6, 7.

[Piksa long pes 29]

Yu ting God bai wokim yumi i kamap ol man i gat kain kain save na pasin, sapos em yet i wanpela strong nating i no gat ol pasin bilong em yet?