Wai na Ol Man i Insait Long Wok Spirit?
OL MAN bai gat kain kain bekim long dispela askim, long wanem, ol i gat kain kain sindaun, lotu, ples, na kastam. Wanem samting i pulim ol man long hap bilong yu long insait long wok bilong ol spirit? Ating wanpela bilong ol samting i stap daunbilo i kirapim ol long insait long en.
● Ol i laik save Wok bilong ol spirit i narakain, na yumi ol man i gat laik long save long ol kain samting olsem. Olsem na sampela i ting i gat sampela kain pawa i stap insait long wok bilong ol spirit. Ating sampela bai go long glasman bilong painimaut long as bilong sik bilong ol, na sampela i save ritim horoskop long niuspepa bilong save ol tok bilong en bai kamap tru o nogat. Ol narapela i save go lukim ol glasman bilong kisim save long mining bilong driman bilong ol.
● Ol amamas Inap sampela yia nau, ol buk, muvi, na ol kompiuta gem i kamapim planti stori em wok bilong ol spirit nogut na ol bilip tumbuna bilong ol lotu haiden bilong bipo i as bilong en. Sampela bilong ol dispela amamas i kamapim pasin bilong pait na bagarapim tru man na pasin pamuk.
● Wari long ol samting bilong tumora Baibel i tok profet olsem: “Long taim bilong las de, taim nogut bai kamap na dispela bai givim hatwok long ol man.” (2 Timoti 3:1) Yumi stap long taim nogut, olsem na planti man i laik kisim tok bilong stiaim ol, olsem na ol i go long ol glasman na ol pris pasto husat i tok ol i save kisim tok i kam long God. Wanpela glasman i tok: “Maski hevi bilong mani i kamap, ol lain bilong mekim wok glasman i save kisim yet mani. Taim ol manmeri i stap amamas, ol i no inap kam lukim yu.” Wanpela glasmeri long Kanada i tok: “Nau ol bisnisman i wok long ringim mi long ofis bilong ol o long mobail fon bilong ol bilong kisim sampela tok bilong helpim ol.” Em i tok moa: “Bipo ol dispela man i no bilip long ol glasman na ol i no tingting long go lukim ol.”
● Sik Long sampela kantri, ol man i gat bikpela sik ol i no go moa long lukim dokta bilong haus sik, nogat, ol i save go lukim ples dokta bambai em i ken oraitim sik bilong ol. Ol i tok olsem as na ol i sik em long wanem wanpela i bin wokim posin long ol. Olsem na ol famili bilong ol bai givim bikpela mani bilong baim glasman bambai em i ken rausim dispela sik.
● Bilong banisim man Long Papua Niugini, ol man i save baim ol “profet” bilong ol karismatik lotu long rausim spirit nogut i stap long ol man. Na sampela i save tromoi “holi wara” long ol man bilong rausim spirit nogut. Long sampela hap, ol man i save go lukim glasman bambai em i ken blesim nupela haus bilong ol o mekim sampela samting long matmat bilong amamasim spirit bilong daiman na bai daiman i ken mekim gut long famili bilong ol.
● Bilong banisim pikinini Long sampela hap bilong Papua Niugini, mama i no inap kisim nupela bebi bilong em i go ausait long haus long nait. Wai em i mekim olsem? Em i pret, nogut ol spirit nogut i bagarapim bebi bilong em. Long Yuganda, ol mama i save pasim string long han na lek bilong bebi bilong ol, na sampela taim ol dispela string i gat bis na sel long en. Ol i mekim olsem bilong banisim ol bebi long ol spirit nogut.
● Taim wanpela long famili i dai Bikpela hevi i bin painim Bikman Arthur Conan Doyle, em wanpela man Inglan na em i save raitim ol buk. Pikinini man bilong em, brata bilong em, tambu brata bilong em, na pikinini man bilong susa bilong em, olgeta i dai long Wol Woa 1. Doyle na meri bilong em i bel hevi tru, olsem na ol i go long wanpela bung bilong toktok wantaim ol man i dai pinis, ol i ting ol inap toktok wantaim pikinini man bilong ol. Long nau tu, planti manmeri i save go lukim ol glasman bambai ol i ken toktok wantaim ol famili bilong ol i dai pinis. Long sampela kantri, ol lotu bilong ples na ol lotu i tok ol i Kristen, ol i save skulim ol man olsem ol spirit nogut i save belhat na kilim ol man i dai. Long sampela ples, taim planti manmeri i wok long dai, ol i save givim bikpela mani long glasman bambai em i ken mekim sampela kain samting bilong stopim dispela hevi.
● Pret long ol daiman Bilip ol man i gat long dai em wanem samting, dispela i save stiaim i stap bilong ol. Olsem na long planti kantri, ol man i save wokim kain kain samting—olsem katim skin bilong ol yet—bilong amamasim ol daiman na bilong soim olsem ol i laikim tru man i dai pinis. Long sampela ailan bilong Pasifik, ol wido man na wido meri i mas werim blakpela klos na stap insait long haus bilong ol inap sampela mun bilong soim sori bilong ol. Na tu, ol i save tambu long kaikai feiveret kaikai bilong poroman marit husat i dai pinis. Ol lain husat i save bihainim dispela kain kastam, sik inap painim ol long wanem ol i stap hangre, ol inap kisim bikpela bel hevi, na ol inap dai tu.
Dispela ol samting i kamapim klia olsem i gat planti samting i save kirapim ol man long insait long wok bilong ol spirit. Olsem na em i bikpela samting long yumi mas kliagut long husat tru i as bilong ol wok bilong ol spirit. Bilong mekim olsem, yumi mas skelim gut tok bilong Baibel, em dispela buk tasol inap kamapim klia husat tru i as bilong ol wok bilong ol spirit.