Yu Ting Kaikai Inap Givim Sik?

“Ol i pasim wanpela skul long Jemani, long wanem, sampela sumatin i kisim sik long binatang jem E. Coli.”—REUTERS NEWS SERVICE, JEMANI.

“Long 5-pela provins long Amerika, planti man i kisim sik long binatang jem salmonela i stap long sampela kain kumu.”—USA TODAY.

“Sikspela bulmakau em ol i kaikai gras i gat kemikal long en, ol i salim mit bilong ol long 9-pela provins.”—THE MAINICHI DAILY NEWS, JAPAN.

LONG tupela wik long las yia, ol dispela tok i bin kamap long ol niuspepa. Ol wok painimaut i soim olsem long olgeta yia inap 30 pesen bilong ol man long ol kantri i stap rabis, i save kisim sik long ol kaikai i doti.

Dispela kain nius i mekim wanem long yu? Hoi bilong Hong Kong, i tok: “Mi save wari na belhat tu. Mi gat 2-pela pikinini na mi wari, kaikai ol i kisim i kam we na hau ol man i redim.”

Long olgeta yia, long ol kantri i stap rabis, planti milion man, moa yet ol pikinini, i save dai long rot bilong ol kaikai na wara i doti. Bola long Naijiria, i tok: “Long maket ol kaikai i stap nating na ol lang, das, win, na ren i save holim. Taim mi ritim o harim stori bilong ol sik i save kamap long ol kaikai i doti, mi pret, olsem na mi laik lukautim gut famili bilong mi.”

Yu ting yu inap banisim famili na ol i no ken kisim sik long kaikai i doti? Lain Canadian Food Inspection Agency, i tok: “Taim ol man i luksave olsem wanpela kaikai long stua i bagarap, bikpela stori i kamap. Na i stret i olsem. Tasol long haus tu, pasin bilong yumi long redim kaikai inap kamapim sik sapos yumi no was gut.”

Yu ken mekim wanem na kaikai i no ken givim sik long famili? Bai yumi skelim 4-pela rot we yu ken lukautim gut kaikai bilong yu.

[Blok long pes 3]

HUSAT INAP KISIM SIK?

Sampela manmeri em ol inap kisim sik hariap long rot bilong ol kaikai i gat binatang jem, em:

● Ol pikinini i gat 5-pela krismas na aninit

● Ol meri i gat bel

● Ol manmeri i gat 70 krismas na antap

● Ol manmeri em bodi bilong ol i no gat strong long sakim sik

Sapos yu o wanpela i save kaikai wantaim yu i insait long dispela lista, orait was gut long samting yu kaikai, hau yu redim na sutim kaikai.

[Kredit Lain]

Source: New South Wales Food Authority, Australia.