Yu Ting Wanpela i Bin Wokim?

Lens Long Ai Bilong Niut

● Niut em wanpela liklik samting olsem geko, em i save senisim ol hap bilong bodi i olpela na nupela i kamap, olsem skin, ol hap insait long bel, lek, han, na tel. Tasol yu ting ol dispela nupela hap bilong bodi ol i gutpela wankain olsem bilong pastaim? Ol man bilong mekim wok painimaut i tok yes.

Tingim: Bilong senisim lens long ai bilong ol, niut i save senisim ol sels bilong airis i kamap ol sels bilong lens. Bilong save gut long olsem wanem lens bilong ai bilong niut i save senis, sampela saientis i lusim 16 yia long skelim sampela niut bilong Japan. Inap 18 taim ol dispela saientis i rausim ol lens insait long kiau bilong ai bilong ol dispela niut. Long dispela 18 taim, ol nupela lens i gro gen, olsem ol saientis i bin ting long en.

Long taim ol saientis i pinisim wok bilong ol, ol dispela niut i kamap 30 krismas—ol i stap 5-pela yia moa winim nomol yia bilong ol long i stap laip. Maski ol i lapun tasol lens long ai bilong ol inap senis hariap wankain long taim ol i bin yangpela. University of Dayton bilong Ohio, long Amerika, i tok, ol dispela nupela lens “bilong ol lapun niut i wankain stret olsem lens bilong ol niut em ol saientis i no bin mekim wok long ol.” Saientis Panagiotis Tsonis, em wanpela bilong dispela lain saientis, em i tok: “Mi kirap nogut tru.” Ol nupela lens bilong ol niut i “gutpela tru.”

Ol saientis i ting olsem pasin bilong niut long kamapim ol nupela hap bilong bodi bilong senisim ol hap i bagarap, dispela bai helpim ol saientis long kliagut long olsem wanem ol i ken helpim ol man em bodi bilong ol i bagarap na bodi i ken kamap gutpela. Panagiotis i tok: “Niut em i gutpela animal bilong helpim ol saientis long save long hau bai ol i mekim ol hap bilong bodi bilong man i bagarap i kamap gutpela gen, moa yet ol lapun.”

Yu ting wanem? Save bilong niut long senisim lens bilong ai bilong en, em i kamap nating o wanpela man i bin wokim?

[Sat long pes 26]

(Bilong save ol dispela rait i stap we long pes, lukim buk o magasin)

“Ol nupela lens” i wankain stret long lens bilong pastaim

[Ol Piksa Kredit Lain long pes 26]