Yu Mas i Gat Laik Long Mekim

Sapos yu gat laik long winim wanpela mak, yu mas tingim ol gutpela samting bai kamap long dispela.

SKUL i helpim yu long wanem ol gutpela samting? Em bai helpim yu long kisim gutpela tingting, na Baibel i tok ‘gutpela tingting i save helpim yumi long taim nogut.’ (Saveman 7:12) Em i helpim yu olsem wanem? Tingim olsem yu wokabaut long wanpela ples nogut tru. Bai yu mekim wanem? Yu laik wokabaut yu yet o yu laik wokabaut wantaim sampela pren em ol inap long lukautim yu? Long skul, yu gat ol gutpela pren husat i save sambai long yu. Yumi ken tok ol dispela pren i kain olsem ol dispela pasin:

Pasin bilong wokim gut tingting. Skul inap helpim yu long kisim ol pasin em Baibel i kolim olsem “gutpela tingting na pasin bilong skelim gut ol samting.” (Sindaun 3:21, Contemporary English Version) Taim yu wok long kisim ol dispela pasin em bai helpim yu long stretim ol hevi bilong yu yet na yu no wet long ol narapela i helpim yu.
Stap gut wantaim ol narapela. Baibel i kirapim ol Kristen long kisim ol pasin olsem i no les kwik na bosim bel. (Galesia 5:22, 23) Pasin bilong bung wantaim kain kain lain long skul i opim rot long yu inap kisim ol dispela pasin, na pasin bilong karim hevi, rispek, na pilim hevi bilong narapela—ol dispela pasin bai helpim yu gut long taim yu kamap bikpela.
Lain long mekim wok. Skul inap lainim yu long gutpela pasin bilong mekim wok, na dispela bai helpim yu long kisim wanpela wok na stap gut long en. Na tu, taim yu wok long kisim save long ol samting, dispela bai helpim yu long save gut long ol pasin bilong yu yet na wanem samting i bikpela samting long yu. (Sindaun 14:15) Long dispela rot, yu inap long sanap strong na redi long sapotim ol samting yu bilip long en.—1 Pita 3:15.

Bikpela samting: Yu mas kisim skul, tasol sapos yu tingim tingim ol samting yu no laikim long skul, dispela i no inap helpim yu. I gutpela yu skelim ol dispela tok i stap antap, na dispela bai helpim yu long mekim olsem. Ating yu inap tingim sampela samting moa!

Kirap nau long mekim. Tingim ol bikpela samting yu inap mekim bilong kisim gutpela skul.

Amamas long ol gutpela tisa!

“Ekonomik tisa bilong mi long haiskul em inap wok long wanpela fainens kampani, tasol em i no mekim olsem, em i laik wok tisa long skul bilong mipela we i no gat nem—long dispela skul ol pikinini i no save wari tumas long ol samting bilong mani na wok bisnis. Tasol taim em i skulim mipela long dispela sabjek, toktok bilong em i klia na em i mekim wantaim amamas, na dispela i helpim mipela long luksave olsem dispela sabjek i gutpela bilong helpim mipela. Wanpela taim em i ringim Mama na tokim em olsem mi bin raitim gut wanpela stori. Ol sumatin i askim em long wai na em i mekim wok tisa long skul bilong mipela, na em i tok dispela skul i gutpela skul winim ol narapela skul em i bin stap long en. Em i save gut long mipela, wari long mipela, na tok amamas long mipela taim mipela i mekim gut wok. Em i wanpela gutpela tisa tru!”—Reyon, Amerika.