Yu Tingim “Olgeta De i Olsem De Bilong Pati”?

WANEM insait bilong dispela tok? Em i makim bel na tingting bilong man. “Man i sot long ol samting,” i makim man husat i save komplein oltaim long ol hevi, na dispela i mekim em i “stap nogut.” Tasol man bilong “belgut na amamas” i save tingim tasol ol gutpela samting, dispela i mekim em amamas na long tingting bilong em “olgeta de i olsem de bilong pati.”

Yumi olgeta i gat ol hevi we inap tekewe amamas bilong yumi. Tasol yumi inap mekim sampela samting bilong holimpas yet amamas bilong yumi long taim bilong hevi. Skelim tok Baibel i mekim.

• No ken larim ol wari bilong tumora i daunim yu. Jisas Krais i tok: “No ken tingting planti long ol samting bilong de antap, long wanem, de antap bai i gat ol wari bilong en. Hevi bilong wanpela de em inap long dispela de tasol.”—Matyu 6:34.

• Traim tingim ol gutpela samting i bin kamap long yu. Taim yu bel hevi, wokim lista bilong ol dispela gutpela samting na tingim tingim. Na tu, no ken tingim tumas ol rong o ol pasin nogut yu bin mekim bipo. Kisim skul long ol na wok strong long mekim ol gutpela pasin. Bihainim pasin bilong draiva husat i lukluk sotpela taim tasol long mira bilong lukim ol samting long baksait, tasol em i no putim tingting olgeta long ol dispela samting. Na tu, tingim olsem, ‘God i save rausim ol sin bilong yumi.’—Song 130:4.

• Taim ol wari i daunim yu, toktok long wanpela em yu ken trastim husat inap mekim gut bel bilong yu. Sindaun 12:25 i tok: “Sapos man i save wari oltaim, em bai i bel hevi tru na tingting bilong en bai i bagarap. Tasol sapos man i mekim gutpela tok long wantok bilong en, orait wantok bai i belgut tru.” Ating “gutpela tok” inap kam long wanpela wanfamili o wanpela gutpela pren, em wanpela husat i no gat pasin bilong komplein o bel nogut oltaim na em “i save laikim yumi long olgeta taim.”—Sindaun 17:17.

Ol gutpela tok i stap long Baibel i helpim planti i stap amamas, maski hevi i painim ol. Ol dispela gutpela tok inap helpim yu tu.