NIUS I KAM LONG OLGETA HAP

Amerika

Niuspepa The New York Times i tok, “Taim yu skelim ol man bilong smok wantaim ol man i no save smok, ol man bilong smok i mekim na kampani . . . i lusim ekstra mani inap olsem 5,816 dola bilong Amerika.” Ohio State University i mekim wanpela wok painimaut na ol i tok, kampani i lusim bikpela mani, long wanem, ol man i kisim ol brek long smok, kampani i lusim bikpela mani bilong baim haus sik bilong ol wokman, na sampela taim ol wokman i no kam long wok. Na tu, ating ol i no mekim gut wok bikos ol i kalabus long smok.

Itali

“Ol pris pasto na ol man husat i save bihainim Sios bilong ol, ol i no save bihainim ol tok ol i skulim ol man long en na dispela i bagarapim gutnem bilong Sios.”—Pop Francis.

Malesia

Gavman bilong Malesia i bin painim 24 ton tit bilong elefan—em winim 1,000 tit bilong elefan—em ol man i bin haitim insait long tupela kontena bilong sip we i karim ol timba bilong diwai mahogani. Ol man bilong lukautim envairomen i tok dispela samting ol i painim em i planti tru winim long bipo. Dispela sip i lusim Togo na i laik go olsem long Saina.

Afrika

Ripot bilong Wol Helt Oganaisesen long 2012 i tok 63 pesen bilong ol man i dai long rot bilong ol sik we i save kalap long narapela olsem HIV/AIDS, ol sik bilong pekpek wara, malaria, TB, na ol sik bilong ol pikinini.

Australia

Planti pikinini i save yusim ol smat-fon samting i gat ol program bilong gem insait long en. Sampela gem olsem i luk wankain olsem ol tru tru gem kasino, tasol i isi long winim. Wanpela ripot bilong gavman i givim tok lukaut olsem dispela bai mekim na ol pikinini i ting em i nomol long pilai laki “na ol inap i gat hevi bilong pilai laki taim ol i go bikpela.”