NIUS I KAM LONG OLGETA HAP

Graun Olgeta

Lain World Health Organization (WHO) i tok, pasin bilong pait na daunim meri i kamap wanpela “bikpela hevi tru long olgeta hap bilong graun. Inap olsem 35 pesen bilong ol meri bai bungim dispela hevi wantaim poroman marit bilong ol o wantaim narapela man. Planti taim poroman marit i save paitim meri . . . , dispela hevi i painim inap 30 pesen bilong ol meri long graun olgeta.”

Briten

Wanpela wok painimaut ol i mekim long 64,303 man i soim olsem 79 pesen bilong ol i ting “lotu i as bilong olgeta pen na hevi i kamap long graun olgeta.” Na wanpela sensas long 2001 i soim olsem 72 pesen bilong ol man i tok ol i Kristen. Tasol long 2011, narapela wok sensas long Inglan na Wels i soim olsem dispela namba i go daun long 59 pesen. Na long wankain taim, 15 pesen bilong ol man i tok ol i no bilong wanpela lotu, tasol nau dispela namba i go antap long 25 pesen.

Saina

Ol nius lain i stori olsem i no longtaim i go pinis gavman i putim lo olsem ol pikinini i mas visitim ol lapun papamama bilong ol, na tu, ol i mas mekim ol samting bilong mekim gut bel na tingting bilong ol. Dispela lo “i no tokaut olsem gavman bai sasim ol o givim sampela kain panismen” sapos ol i no bihainim lo.

Yurop

Sampela lain i wok long salim ol giaman samting, olsem ol kosmetik, ol sop, na ol kaikai samting. Bikman bilong wanpela kampani em ol i save givim tok lukaut long ol man long ol kaikai samting i tok: “Klostu olgeta kaikai samting we ol man i salim i no gutpela.” Na wanpela saveman i tok inap olsem 10 pesen bilong ol kaikai ol man i baim long ol kantri em ol kaikai we i no gutpela long helt bilong ol man.