Taim Papa o Mama i Dai

HATWOK BILONG EN

Dami i gat 6-pela krismas taim papa bilong em i dai long sik long rop bilong blut long kru, em ol i kolim aneurysm. Derrick i gat 9-pela krismas taim papa bilong em i dai long sik bilong klok. Jeannie i gat 7-pela krismas taim mama bilong em i karim hevi bilong sik kensa long ovari inap planti yia na em i dai.a

Wantu tasol i stap bilong ol i senis, dispela 3-pela yangpela i mas karim hevi bilong wanpela ol i laikim tru i dai. Olsem wanem? Yu bungim wankain hevi? Dispela atikol i kamapim ol tok bilong helpim yu long karim hevi bilong wanpela yu laikim tru i dai.b Pastaim, yumi laik stori long ol samting yu mas save long pasin bilong krai sori.

SAMTING YU MAS SAVE LONG EN

I gat planti wei bilong krai sori. Dispela i makim olsem pasin bilong yu long krai sori i no wankain long pasin ol narapela i bihainim. Buk Helping Teens Cope With Death i tok: “I no gat wanpela lo man i mas bihainim long pasin bilong krai sori.” Bikpela samting em yu no pasim yu yet long krai sori. Bilong wanem em i bikpela samting? Long wanem . . .

Sapos yu no krai sori dispela inap nogutim yu. Jeannie em yumi stori long en long kirap bilong atikol, em i tok: “Mi no krai sori, long wanem, mi no laik bai liklik susa bilong mi i bel hevi. Long nau tu, mi no save kamapim bel hevi bilong mi, tasol dispela inap nogutim helt bilong mi.”

Ol saveman i wanbel long dispela tok. Buk The Grieving Teen i tok: “Sapos yu no krai sori, dispela i no inap pinisim bel hevi bilong yu, nogat. Bihain, bai yu kamapim long rot bilong belhat na kros o yu inap kisim sik.” Na tu, yu inap kisim pasin bilong dring spak na kisim drak bilong daunim bel hevi bilong yu.

Pasin bilong krai sori inap mekim na man i no tingting stret. Sampela man i belhat long wanfamili o pren i dai, long wanem, ol i pilim olsem em i no stap moa bilong helpim na lukautim ol. Ol narapela i sutim tok long God i no bin helpim ol long i stap laip. Na sampela man i bel hevi na tingting planti long tok na pasin ol i mekim long wanfamili o pren i dai, bikos i no gat rot bilong tok sori long ol.

Tru tumas, pasin bilong krai sori inap mekim sampela samting long tingting na pasin bilong yumi. Yu inap mekim wanem bilong karim dispela hevi?

SAMTING YU KEN MEKIM

Toktok wantaim wanpela. Taim wanpela yu laikim tru i dai, ating yu bai pilim olsem yu laik stap wanpis. Tasol i gutpela long kamapim tingting bilong yu long wanpela wanfamili o pren, na bai bel na tingting bilong yu i stap isi na hevi i no daunim yu.—Stiatok bilong Baibel: Sindaun 18:24.

Raitim ol tok long notbuk. Raitim ol pasin na ol samting papa o mama bilong yu i save mekim. Olsem, wanem wanpela gutpela pasin bilong em yu save laikim? Na yu laik bihainim wanem gutpela pasin bilong em long i stap bilong yu?

Sapos yu gat sampela tingting kranki, olsem yu tingim tingim wanpela tok i mekim nogut bel bilong Papa o Mama paslain long em i dai, orait raitim tingting bilong yu long notbuk na risen na yu kisim dispela tingting. Yu ken raitim tok olsem, “Bel i kotim mi, long wanem, mi bin kros wantaim Papa na long de bihain em i dai.”

Bihain, skelim gut ol risen na bel i kotim yu. Buk The Grieving Teen i tok: “Yu no inap sutim tok long yu yet olsem yu no bin tok sori. Oltaim yumi bai mekim tok o pasin i mekim narapela i bel hevi, na bihain yumi tok sori. Em pasin olgeta man i save mekim.”—Stiatok bilong Baibel: Jop 10:1.

Lukautim helt bilong yu. Kisim gutpela malolo, mekim ol eksasais, na kaikai gut. Sapos yu pilim olsem yu no laik kaikai, orait long de olgeta kisim ol liklik hap kaikai i gutpela bilong helpim bodi, yu ken mekim olsem i go inap long taim yu kisim bek laik bilong yu long kaikai. Sakim pasin bilong dring alkohol na no ken kisim ol kaikai we inap bagarapim helt bilong yu, long wanem, dispela i no inap pinisim bel hevi bilong yu.

Beten long God. Baibel i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu.” (Song 55:22) Yumi beten bilong kisim bel isi. Na tu, beten i opim rot long yumi ken toktok wantaim God bilong “mekim isi bel bilong ol man long olgeta kain taim.”—2 Korin 1:3, 4.

Long rot bilong Baibel, God i save mekim isi bel bilong ol man i krai sori. Mipela i laik kirapim yu long kisim save long tok Baibel i mekim long samting i painim ol man i dai pinis, na as na yumi ken bilip na wet long lukim ol daiman i kirap bek.c—Stiatok bilong Baibel: Song 94:19.