Ol Driman Bilong Fero

TUPELA yia i lus na Josep i stap yet long kalabus. Man bilong lukautim wain i no tingim Josep. Wanpela nait Fero i kisim tupela narapela kain driman, na em i tingting planti long mining bilong en. Yu inap lukim em i slip i stap? Long moningtaim, Fero i singautim ol saveman bilong em na i tokim ol long ol samting em i bin lukim long driman. Tasol ol i no inap long tokim em long mining bilong driman.

Nau long dispela taim stret, man bilong lukautim wain i tingim Josep. Em i tokim Fero: ‘Taim mi stap long kalabus, i gat wanpela man em inap kamapim mining bilong ol driman.’ Fero i tok na kwiktaim ol i bringim Josep i kam ausait long kalabus.

Fero i tokim Josep long ol driman bilong em: ‘Mi lukim 7-pela patpela bulmakau. Bihain mi lukim 7-pela bun nating bulmakau. Na 7-pela bun nating bulmakau i kaikai 7-pela patpela bulmakau.

‘Long namba tu driman mi lukim 7-pela gutpela het bilong rais i kamap long wanpela bun bilong rais. Bihain mi lukim 7-pela het bilong rais i liklik tru na i drai pinis. Na ol het bilong rais i liklik tru i daunim ol 7-pela gutpela het bilong rais.’

Josep i tokim Fero: ‘Tupela driman i gat wankain mining. Ol dispela 7-pela patpela bulmakau na 7-pela gutpela het bilong rais i makim 7-pela yia, na 7-pela bun nating bulmakau na 7-pela het bilong rais i liklik tru i makim 7-pela yia. Long 7-pela yia bai i gat planti kaikai i kamap long Isip. Na bihain bai i gat 7-pela yia bilong hangre.’

Olsem na Josep i tokim Fero: ‘Yu mas makim wanpela man i gat gutpela save na tingting em bai bosim wok bilong bungim ol kaikai insait long ol 7-pela gutpela yia. Orait, taim 7-pela yia bilong hangre i kamap, ol manmeri bai i no ken i stap hangre.’

Fero i amamas long dispela tok. Na em i makim Josep long bosim wok bilong bungim ol kaikai. Josep i kamap nambawan bikpela man long Isip, na Fero tasol i gat bikpela namba moa long em.

Etpela yia bihain, long taim bilong hangre, Josep i lukim sampela man i kam. Yu save ol i husat? Em ol 10-pela brata bilong Josep! Papa bilong ol, Jekop, i salim ol i go long Isip, long wanem, ol i sot long kaikai long Kenan. Josep i luksave long ol brata bilong em, tasol ol i no luksave long em. Yu save bilong wanem ol i no luksave long em? Long wanem, Josep i kamap bikpela man pinis, na em i pasim ol narapela kain klos.

Josep i tingim gen olsem taim em i stap mangi yet em i bin driman olsem ol brata bilong em i brukim skru long em. Yu inap tingim dispela stori? Olsem na Josep i luksave olsem God yet i bin salim em i go long Isip, na i gat as na God i bin mekim olsem. Yu ting Josep i mekim wanem? Nau yumi ken stori long dispela.