Sapta 6
Dispela Tok Olgeta i Mas Tingim
TAIM pasin bikhet i kamap long Iden, bikpela tok i kamap na olgeta man na olgeta ensel i insait long en. Seten i kirapim Iv long ting God i pasim sampela samting na nau Iv wantaim man bilong em i no inap kisim. Seten i tok: “Olsem wanem? Ating God i tambuim yutupela long kaikai pikinini bilong olgeta diwai?” Iv i tok, God i tambuim wanpela diwai tasol, na em i tok: “God i tok olsem, ‘Sapos yutupela i kaikai pikinini bilong dispela diwai, o yutupela i holim tasol, bambai yutupela i mas dai.’ ” Nau Seten i tok God i giaman, na sapos tupela i sakim tok bilong God, tupela i no ken i dai. Seten i tok God i laik pasim ol long kisim gutpela samting—olsem God i no laik bai ol yet i skelim wanem pasin i gutpela na wanem pasin i nogut. Seten i tok: “Yutupela i no ken dai. Sapos yutupela i kaikai pikinini bilong dispela diwai, bai yutupela i kisim save long wanem samting i gutpela na wanem samting i nogut, na bai yutupela i kamap olsem God. God i save long dispela, na olsem em i tambuim yutupela.” (Jen. 3:1-5) Seten i kirapim Iv long ting olsem sapos em yet i skelim ol samting em i laik mekim, dispela bai helpim em. I olsem Seten i tok i no stret God i stap bos, na pasin bilong God long bosim ol samting i no stret. Em nau, bikpela tok i kamap long husat tru i mas bosim heven na graun.
2 Sapos Iv i laikim tumas Jehova na em i tingim gut man bilong em em i bos bilong em, bai em i no ken mekim rong. Tasol Iv i tingting tasol long ol samting em i ting bai helpim em nau tasol. Em i aigris long samting i tambu. Seten i giamanim em tru na em i brukim lo bilong God. Bihain em i pulim Adam tu long mekim. Tru Seten i no giamanim Adam, tasol Adam i no pilim sori bilong God liklik na ol gutpela samting God i bin mekim. Em i no laik daun long Jehova em bos bilong olgeta samting; em i laik bihainim bikhetmeri bilong em.—Jen. 3:6; 1 Ti. 2:13, 14.
3 Taim dispela samting i kamap long Iden, Seten i no pinis long sutim tok long wok king bilong Jehova. Nogat. Em i pulim pinis Adam tupela Iv na nau em i hambak na em i ting em inap pulim ol narapela tu na bai ol i lusim Jehova. Olsem na em i sutim narapela tok long God, em i tok em inap pulim olgeta pikinini bilong Adam na olgeta pikinini bilong God long heven, em ol ensel, na namba wan Pikinini bilong God tu, em God i laikim tumas em, na olgeta bai lusim God. Long taim bilong Jop, Seten i tok ol wokman bilong God ol i no laikim tru God na pasin bilong em long bosim ol. Ol i tingim skin bilong ol yet tasol na ol i mekim wok bilong God. Seten i tok, sapos hevi o traim i painim ol, bai ol i lusim God. Olsem wanem? Tok bilong em i stret?—Jop 1:6-12; 2:1-6; Re. 12:10.
Ol i Mekim Wanem?
4 Jehova i save, sampela moa ol inap bihainim Seten. Olsem na taim em i kolim strafe bilong ol bikhetman long Iden, em i tok bai Seten i gat “ol lain” bilong em. (Jen. 3:15) Sampela bilong dispela “ol lain” bilong Seten em ol Farisi ol i tingting pinis long kilim Jisas i dai, na Judas Iskariot, em i putim Jisas long han bilong ol birua. Ol i no popaia na mekim rong. Nogat. Ol i tingting pinis na ol i mekim. Ol i save wanem pasin i stret ol i mas mekim, tasol long laik bilong ol yet ol i birua long Jehova na long ol wokboi bilong em. Planti narapela manmeri tu ol i no bin bihainim lo bilong Jehova, tasol ol i no gat save long Em na ol i mekim olsem.—Ap. 17:29, 30.
5 Tasol sampela manmeri ol i bilip tru long God. Ol i kisim save long dispela Man em i bin wokim ol na ol i stap gut long em, em i King bilong ol. Ol i save ol i mas harim tok bilong God na bihainim tok bilong em bambai ol i ken i stap laip. Noa em i wanpela bilipman olsem. Olsem na taim God i tokim Noa: “Mi laik . . . pinisim tru olgeta man. Yu mas . . . wokim wanpela sip,” orait Noa i bihainim tok bilong God. Ol narapela manmeri long taim bilong Noa ol i bin kisim toksave long bikpela bagarap bai kamap, tasol ol i no harim. Ol i kaikai na dring na marit na i stap olsem tasol. Tasol Noa i wokim draipela sip na em i wok strong long autim tok long stretpela pasin bilong God. Baibel i tok: “Orait Noa i mekim olgeta samting olsem God i tokim em.”—Jen. 6:13-22; lukim tu Hibru 11:7 na 2 Pita 2:5.
6 Ol man i bin holimpas lo bilong God, ol i save laikim tumas Em na ol i save daun long Em, em i Bos bilong ol. Ol i no olsem Iv, em i kalapim wok bos bilong man bilong em. Na ol i no olsem Adam, em i sakim lo bilong Jehova. Sera, em meri bilong Ebraham, em i mekim gutpela pasin. Em i daun long man bilong em; long maus na long bel bilong em em i save kolim Ebraham “bikpela” bilong em. Na em i laikim tumas Jehova na em i meri bilong bilip. Em wantaim Ebraham i wetim “taim bilong em i go insait long dispela taun [Kingdom bilong God]. . . . [God] yet i wokim.”—1 Pi. 3:5, 6; Hi. 11:10-16.
7 Ebraham i lusim ples bilong em na samting olsem 430 yia bihain Moses i mas i go long king bilong Isip na givim wanpela tok long em. Moses i no surik. Em i stap gut long Nambawan Bikpela King Jehova. Moses i no hambak long givim dispela tok long king bilong Isip. Nogat. Em i pilim olsem maus bilong em i hevi na em i no inap mekim gut tok. Tasol em i bihainim laik bilong Jehova na em i go. Jehova i sambai long em, na brata bilong em Eron i helpim em, olsem na planti taim Moses i go givim tok bilong Jehova long king. Tasol king i bikhet. Na sampela Isrel tu ol i toknogutim Moses. Tasol Moses i stap gut long Jehova na mekim olgeta samting Jehova i tokim em long mekim. Long rot bilong Moses, ol Isrel i lusim Isip.—Eks. 7:6; 12:50, 51.
8 Ol man i bin i stap gut long Jehova bipo, ol i no ting ol i mas bihainim tasol ol tok God i raitim. Nogat. Taim meri bilong Potifa i laik pulim Josep, God i no bin raitim yet wanpela lo na tambuim pasin pamuk. Tasol Josep i save long pasin bilong marit God i bin kamapim long Iden. Na em i save sapos man i trabel long meri bilong narapela man, God i no laikim dispela pasin. Josep i no laik traim God na bihainim pasin bilong ol Isip liklik. Nogat. Em i givim baksait olgeta long dispela pasin. Em i tingim gut ol samting Jehova i bin mekim bilong helpim ol man, na em i bihainim pasin bel bilong em i tok God i laikim.—Jen. 39:7-12; lukim Sam 77:11, 12.
9 Ol manmeri i save tru long Jehova, ol i no save lusim Em, maski bikpela traim tru i painim ol. Jop i givim bel tru long Jehova, tasol Seten i tok, sapos olgeta samting bilong Jop i lus o skin bilong em i bagarap, bai Jop i lusim Jehova. Jop i no save long as bilong ol hevi i painim em, tasol em i stap gut long God. Long dispela rot em i kamapim long ples klia olsem Seten em i man bilong giaman. (Jop 2:3, 9, 10) Seten i laik truim tok bilong em, olsem na bihain em i kirapim king bilong Babilon na king i tok long kilim i dai tripela yangpela Hibru. King i belhat nogut tru na em i tok, sapos ol i no brukim skru long god giaman em i bin tokim ol man long wokim, bai em i tromoi ol long paia na kilim ol i dai. Nau tripela i mas tingting: Bai ol i bihainim tok bilong king o bihainim lo bilong Jehova i tok ol i no ken lotuim god giaman? Ol i tokaut strong olsem ol i lotuim Jehova na em i Nambawan King bilong ol. Ol i stap gut long Jehova. Ol i tingim dispela samting i bikpela samting, na laip bilong ol, nogat.—Dan. 3:14-18.
10 Olsem wanem? Yumi ol sinman yumi inap i stap gut long God? Sapos yumi popaia wanpela taim, yumi lus olgeta long i stap gut long God? Nogat tru! Baibel i stori long Moses, planti taim em i popaia. Jehova i no amamas long dispela samting, tasol em i no sakim Moses. Ol aposel i mekim planti gutpela pasin, tasol ol i popaia long sampela samting. Yumi mas givim bel long bihainim tok bilong God na wok long bihainim long olgeta taim na bai yumi stap gut long Em. Jehova i save yumi kisim sin long Adam, olsem na Em i amamas sapos yumi no bikhet na sakim laik bilong em. Sapos yumi popaia na mekim rong, orait, kwiktaim yumi mas tanim bel bambai yumi no ken mekim gen dispela rong. Olsem bai yumi kamapim bel bilong yumi, yumi laikim tumas ol pasin Jehova i tok em i gutpela, na yumi givim baksait tru long ol pasin Jehova i tok em i nogut. Yumi bilip long ofa bilong Krais em inap tekewe sin, na long dispela as yumi inap i stap klin long ai bilong God.—Emos 5:15; Ap. 3:19; Hi. 9:14.
11 Tasol olsem wanem? Ating ol man i no inap bihainim tru ol pasin bilong God? “As tok bilong pasin bilong God” i stap hait inap 4,000 yia. (1 Ti. 3:16) God i wokim Adam i gutpela olgeta, tasol em i no bihainim tru pasin bilong God. Orait, husat inap bihainim tru? Lain bilong Adam ol i no inap mekim, long wanem ol i gat sin. Krais Jisas tasol inap mekim. Ol samting Jisas i mekim i soim yumi, sapos Adam i laik, em inap tru long holimpas ol lo bilong God na i stap gutpela olgeta, long wanem i no gat planti hevi i bin painim em olsem i bin painim Jisas. Olsem na God i no gat asua. Wok bilong God i nambawan olgeta. Orait, yumi mas bihainim pasin bilong Krais Jisas. Yumi mas bihainim ol lo bilong God Jehova, na givim bel tru long Em, em i King bilong heven na graun.
Olsem Wanem Long Yumi Yet?
12 Yumi olgeta wan wan yumi mas tingim dispela bikpela tok i bin kamap. Yumi olgeta i insait long en na yumi no inap abrusim. Sapos yumi tokaut pinis olsem yumi laik i stap aninit long Jehova, bai Seten i birua long yumi. Long kain kain rot bai em i putim hevi na traim long yumi. Na em bai mekim olsem i go inap long taim ol pasin nogut bilong dispela graun i pinis. Olsem na oltaim yumi mas was gut. (1 Pi. 5:8) Ol samting yumi mekim i kamapim bel bilong yumi, yumi givim bel long Jehova o yumi bihainim Seten.
13 Yumi no ken ting pasin bilong bikhet long God em i samting nating, long wanem planti manmeri i mekim. Nogat. Sapos yumi laik holimpas lo bilong God, orait yumi mas bihainim stretpela pasin bilong Em long olgeta samting yumi mekim. Olsem:
(1) Seten i mekim tok giaman bilong pulim namba wan tumbuna bilong yumi long mekim sin. Em i kamap “papa tru bilong pasin bilong tok giaman.” (Jon 8:44)
Wanem samting i save kirapim ol yangpela long mekim tok giaman long papamama? Bilong wanem ol yangpela Kristen i mas klia long dispela pasin? (Pro. 6:16-19)
Wanem kain pasin i save kamap insait long ol wok bisnis na sapos man i mekim olsem em i bihainim “papa tru bilong pasin bilong tok giaman” na em i no bihainim God bilong tok tru? (Mai. 6:11, 12)
Sapos yumi mekim sampela tok bilong haitim sampela pasin kranki bilong yumi na dispela samting i no mekim nogut long narapela man, i gat rong long dispela o nogat? (Sam 119:163; lukim tu Aposel 5:1-11.)
Sapos wanpela man i bin mekim bikpela rong, bilong wanem em i no ken mekim sampela tok giaman bilong haitim dispela rong? (Pro. 28:13)
(2) Taim Iv tupela Adam i bihainim tok bilong Seten na tupela yet i skelim wanem samting i gutpela na wanem samting i nogut, tupela i kirap kisim samting i no bilong tupela. Tupela i kamap stilman.
Sapos man i sot na em i stil, o em i stilim samting bilong man i gat planti samting, i gat rong long dispela? (Pro. 6:30, 31; 1 Pi. 4:15)
Sapos planti man long hap bilong yumi ol i save stil na yumi bihainim tasol pasin bilong ol, o sapos yumi stilim liklik samting tasol, dispela em i liklik rong tasol o olsem wanem? (Rom 12:2; Ef. 4:28; Luk 16:10)
14 Taim Krais i stap king inap 1,000 yia, Seten wantaim ol spirit nogut ol bai stap long hul i no gat as. Bai ol i no inap paulim tingting bilong ol manmeri. Em bai gutpela tru! Tasol taim dispela wan tausen yia i pinis, bai ol i lusim dispela hul, na inap liklik taim bai ol i traim “ol manmeri bilong God,” em ol i wok long holimpas ol lo bilong God. Bai ol i kirapim pait long “dispela taun God i laikim tumas,” em Nupela Jerusalem long heven. Bai Seten i wok long pinisim stretpela pasin “dispela taun” i bin kamapim long graun.—Re. 20:7-10.
15 Bai Seten i mekim pasin giaman olsem em i bin mekim bipo. Na bai em i kirapim ol manmeri long tingim skin bilong ol yet tasol na hambak, na pulim ol bambai ol i no i stap gut long God. Sapos yumi stap laip long dispela taim, bai yumi mekim wanem? Bai yumi givim bel long husat? Long dispela taim bai skin bilong olgeta manmeri i nambawan olgeta na i no gat sin moa, olsem na sapos ol i no i stap gut long God, em laik bilong ol yet na ol i mekim, olsem na bai ol i lus olgeta. Sapos yumi laik i stap gut long God long dispela taim bihain, orait nau yumi mas wok long bihainim kwik wanem wanem tok Jehova i givim long yumi long rot bilong Baibel o oganaisesen bilong em! Long dispela rot bai yumi kamapim bel bilong yumi, yumi givim bel tru long Jehova, em i King bilong heven na graun.
Stori Gen Long Ol Dispela Tok
● I gat wanem bikpela tok olgeta man na ensel i mas tingim? Olsem wanem yumi insait long dispela bikpela tok?
● Ol manmeri, em piksa bilong ol i stap long pes 49, ol i mekim wanem wanem gutpela pasin na ol i holimpas lo bilong Jehova?
● Bilong wanem long olgeta taim yumi mas was gut na mekim pasin i save litimapim nem bilong Jehova?
[Askim Bilong Stadi]
1. (a) Long dispela tok giaman bilong Seten wanem bikpela tok i kamap long Iden? (b) Tru Seten i no tokaut klia long dispela samting, tasol olsem wanem yumi save em i laik tok olsem?
2. Wanem samting inap helpim namba wan man na meri na bai tupela i no ken mekim rong?
3. (a) Seten i tok bilas long wok king bilong Jehova, na em i kamapim wanem narapela tok tu? (b) Husat ol i insait long dispela?
4. Olsem wanem na planti manmeri ol i no bin stap gut long Jehova, em i King?
5. (a) Ol manmeri i bin i stap gut long God, ol i ting olsem wanem long tok bilong God na ol i no olsem Iv? (b) Noa i mekim wanem na em i stap gut long God? Pasin em i mekim inap lainim yumi long wanem samting?
6. (a) Ol manmeri i bin i stap gut long God, ol i gat wanem ol narapela gutpela pasin tu? (b) Sera i kamapim ol dispela gutpela pasin olsem wanem? Pasin bilong Sera inap lainim yumi long wanem samting?
7. (a) Wanem ol traim i painim Moses na em i stap gut long Jehova, em i King? (b) Pasin em i mekim inap givim wanem save long yumi?
8. (a) I gat wanem samting na yumi save, sapos yumi laik i stap gut long God yumi no ken bihainim tasol ol lo God i bin raitim? (b) Sapos yumi gat dispela kain tingting long i stap gut long God, olsem wanem dispela bai helpim yumi long bihainim tok bilong 1 Jon 2:15?
9. Seten i sutim tok long Jop, tasol planti man i bin mekim wanem na yumi save, Seten em i man bilong giaman?
10. Yumi ol sinman inap mekim wanem na bai yumi kamapim long ples klia olsem yumi stap gut long Jehova?
11. (a) Husat i bihainim tru ol pasin bilong God? Dispela i kamapim long ples klia wanem samting? (b) Ol samting em i bin mekim i helpim yumi olsem wanem?
12. Jehova em i King, orait bilong wanem oltaim yumi mas was gut long tingting bilong yumi long dispela samting?
13. (a) Husat i as bilong pasin bilong giaman na stil na yumi laik klia olgeta long dispela kain pasin? (b) Bekim ol askim i stap long pinis bilong dispela paragraf, na stori long sampela samting i save kirapim ol man long mekim pasin i no stret.
14, 15. (a) Krais bai stap king inap 1,000 yia na long pinis bilong dispela taim wanem traim bai painim olgeta manmeri? (b) Ol samting nau yumi mekim, dispela bai mekim wanem long yumi long dispela taim bihain?
[Ol Piksa long pes 48]
Ol i stap gut long Jehova, em i king
Noa
Sera
Moses
Josep
Jop
Pasin Bilong Ol Inap Lainim Yumi long Wanem Samting?