Sapta 23
Tingim Gut De Bilong Jehova
TAIM yu kirap lainim tok bilong Baibel, yu bin kisim save olsem: Liklik taim na ol samting i mekim yumi bel hevi bai ol i pinis. (Luk 21:28) Na yu kisim save olsem: God i laik bai olgeta hap bilong graun i kamap gutpela ples Paradais. Pasin nogut na pait na sik na dai bai pinis. Na ol manmeri yumi laikim tumas ol na ol i dai pinis, bai ol i kirap bek. Em gutpela samting tru, a? Yumi save dispela gutpela taim i klostu pinis, long wanem ol samting i kamap em i makim Krais i kamap King long yia 1914 na nau yumi stap long las taim bilong dispela taim nogut bilong nau. Olsem wanem? Dispela save i bin kirapim yu long senisim sampela pasin na tingting bilong yu? Wokabaut bilong yu i makim olsem yu tingim “de bilong Jehova” i klostu?
2 Baibel i makim klia olsem ol manmeri i lukim ol samting i kamap taim Krais i kirap mekim wok king, dispela lain bai ol i lukim tu “bikpela de bilong Jehova.” Long dispela de bai em i givim strafe long ol man i bin mekim pasin nogut. (Mt. 24:34; Sef. 1:14–2:3, NW) Ol manmeri bilong dispela lain i go lapun nau. Tasol Baibel i no makim wanem de stret bai Krais i kam bilong givim strafe bilong Jehova long lain bilong Seten long graun. Jisas i tok: “I no gat wanpela man i save long dispela de na dispela aua. Ol ensel bilong heven ol i no save long en. Pikinini tu em i no save long en. Papa tasol em i save long dispela.” (Mak 13:32) I gutpela yumi no save long dispela samting. Olsem wanem i gutpela? Long wanem, yumi inap kamapim bel bilong yumi, yumi givim bel tru long Jehova o nogat. Sapos sampela i no givim bel tru long Jehova, orait ating long tingting bilong ol bai ol i surikim dispela De na ol i mekim ol wok bilong skin ol yet i laik mekim. Ol manmeri i laikim tumas Jehova ol i givim bel long mekim wok bilong em maski wanem taim dispela pasin nogut bilong nau i pinis. Jehova i orait long ol dispela manmeri tasol na ol i ken i stap wokboi bilong em. God na Krais i no ken orait long ol man i givim hap bel tasol o ol i gat tupela tingting.—Re. 3:16; Sam 37:4; 1 Jon 5:3.
3 Tasol ol manmeri i laikim tumas Jehova, Jisas i toksave long ol, olsem: “Yupela lukaut. Yupela was i stap. Yupela i no save wanem taim bai dispela i kamap.” (Mak 13:33-37) Em i tok, yumi mas was gut, nogut yumi tingting tumas long kaikai na dring na “samting bilong bodi” na yumi no tingim gut dispela De i laik kamap.—Luk 21:34-36; Mt. 24:37-42.
4 Bihain aposel Pita i tokim olgeta manmeri i bilip tru long God, ol i mas ‘wetim De bilong God. Long dispela de bai skai i paia na i pinis, na hatpela paia bai kukim olgeta liklik samting bilong en na i tanim i kamap olsem wara.’ De bilong Jehova i klostu na yumi mas tingim gut dispela samting. Liklik taim na olpela “skai,” em olgeta gavman bilong graun, na olgeta man nogut ol bai pinis. God bai kamapim “nupela skai na nupela graun” bilong senisim dispela olpela ‘skai na graun.’ Na “olgeta liklik samting” bilong dispela pasin bilong nau—olsem pasin bilong bikhet na pasin pamuk na pasin bilong laikim tumas mani kago—paia bilong “De bilong Bikpela” bai “kukim.” Olgeta dispela pasin bai pinis. (2 Pi. 3:10-13) Olsem na oltaim yumi mas was gut, long wanem yumi save ol dispela bikpela samting inap kamap wantu tasol.—Mt. 24:44.
Tingim Gut Ol Samting i Olsem Mak
5 Yumi stap long las taim, olsem na yumi mas save long ol samting i olsem mak bilong dispela taim na i makim olsem pinis bilong dispela taim i klostu. Bilong save gut long dispela mak yumi mas tingim ol tok Jisas i bin mekim bilong bekim dispela askim bilong ol disaipel long Matyu 24:3. Sampela tok em i givim long ol i makim ol samting i kamap long pinis bilong taim bilong ol Juda. Tasol bikpela hap truim bilong en i bilong kamap bihain bihain. Ol samting em i stori long en kirap long Mt 24 ves 4 i go inap long ves 22, liklik hap truim bilong en i kamap namel long yia 33 na 70 C.E. Tasol bikpela hap truim bilong en i kamap nau long taim bilong yumi na i makim Krais i kam bek olsem King long 1914 na nau yumi stap long pinis bilong dispela taim nau. (Na lukim tu Mak 13:5-20 na Luk 21:8-24.) Matyu 24:23-28 i stori long ol samting i mas kamap long 70 C.E. na i kam inap long taim Krais i kam bek olsem King. (Na lukim tu Mak 13:21-23.) Matyu 24:29–25:46 i go inap long pinis bilong sapta 25 i stori long ol samting i makim dispela taim nau i kirap long 1914.—Na lukim tu Mak 13:24-37 na Luk 21:25-36.
6 Yumi olgeta wan wan yumi mas tingim gut ol samting i kamap long nau i olsem hap bilong dispela “mak.” Sapos yumi skelim ol dispela samting wantaim tok profet bilong Baibel, dispela bai helpim yumi long tingim gut ‘de bilong Jehova.’ Na dispela bai helpim yumi long toksave gut long ol narapela man na kirapim ol long bilip olsem “de bilong God bilong yumi bilong bekim pe nogut” em i klostu pinis. (Ais. 61:1, 2, NW) Orait, tingim ol dispela samting na skelim ol dispela hap bilong “mak”:–
Baibel i tok, ‘narapela lain bai kirapim pait long narapela lain’; kirap long 1914 dispela samting i kamap olsem wanem? Wanem samting i kamap long nau tu na i truim dispela tok?
Ol man bilong nau i kisim bikpela save, tasol olsem wanem long hangre long nau?
Tru i gat planti guria moa i kamap bihain long 1914 C.E. o nogat?
Long 1918 wanem bikpela sik i bin kilim i dai planti man, winim Namba Wan Pait? Ol dokta i kisim bikpela save long daunim ol sik, tasol i gat wanem ol kain sik i wok yet long bagarapim planti man?
Yu yet yu lukim wanem samting na yu save ol man i pret pret, olsem Luk 21:26 i tok?
I gat wanem samting na yu bilip olsem ol samting 2 Timoti 3:1-5 i kolim i kamap moa yet na i nogut moa yet nau long las taim na bipo i no olsem?
Tilim Ol Man i Go Tupela Lain
7 Jisas i stori long ol narapela bikpela samting tu i mas kamap long taim bilong pinis. Wanpela em wok bilong tilim “ol manmeri bilong kingdom” na “ol manmeri bilong Seten” i go tupela lain. Jisas i stori long dispela samting taim em i tok piksa long wanpela gaden na wanpela birua i kam tromoi pikinini bilong gras nogut long en. Long dispela tok piksa “gutpela pikinini kaikai” i makim ol Kristen tru, em spirit bilong God i bin makim ol. Na “gras nogut” i makim ol Kristen giaman. Nau long pinis bilong dispela taim bai ol i bungim dispela “gras nogut,” em ol manmeri i tok ol i Kristen, tasol ol i “manmeri bilong Seten,” long wanem ol i laikim tumas dispela graun Seten i bos bilong en. Ol dispela manmeri i bilong bagarap, olsem na Jisas i tilim ol i go narapela lain na “ol manmeri bilong kingdom” ol i narapela lain. (Mt. 13:36-43) Olsem wanem? Ol dispela samting i kamap pinis?
8 Tru tumas, taim Namba Wan Pait Bilong Olgeta Hap i pinis, olgeta manmeri i tok ol i Kristen ol i bruk long tupela lain: (1) Wanpela lain em ol pris pasto bilong Krisendom wantaim lain bilong ol, em ol i givim bel long Lig ov Nesen (nau em Yunaitet Nesen) na ol i strong long litimapim ples bilong ol. (2) Na wanpela lain em liklik lain Kristen tru, em spirit bilong God i bin makim ol, na ol i givim bel long Kingdom bilong God. Namba wan lain ol i givim bel long helpim ol gavman bilong graun olsem rot bilong kamapim gutaim, olsem na yumi save ol i no Kristen tru. (Jon 17:16) Tasol ol wokboi bilong Jehova i kisim stretpela tingting na ol i tok Lig ov Nesen em i dispela “samting nogut tru” bilong nau, em Matyu 24:15 i tok long en. Ol i kirap autim “dispela gutnius bilong kingdom” long olgeta hap na dispela i makim olsem ol i manmeri tru bilong kingdom bilong God. (Mt. 24:14) Ol i autim tok na wanem samting i kamap?
9 Pastaim ol i bungim lain remnan bilong “ol manmeri [God] i bin makim bilong em.” Dispela lain i stap nabaut long olgeta hap bilong graun, olsem “long hap bilong 4-pela win,” tasol ol ensel i bosim wok bilong bungim ol na ol i kam bung na i stap wanlain tru.—Mt. 24:31.
10 Na bihain, olsem Jisas i tok pinis, em i kirap tilim ol manmeri i go tupela lain, olsem “wasman i save tilim ol sipsip i go long hap na ol meme i go long hap.” Krais i sindaun long sia king bilong em long heven na em i bosim dispela wok. Em i mekim olsem i kam inap long nau. Em i tilim yu tu i go long wanpela lain. Planti manmeri ol i sakim Kingdom bilong God na “ol manmeri” em spirit holi i bin makim ol. Olsem na bai ol i “kisim pe nogut”; bai ol i lus olgeta. Tasol Bikpela i singautim ol narapela bilong kisim laip long graun aninit long Kingdom na bai ol inap i stap oltaim. Ol dispela manmeri, olsem “ol sipsip,” ol i bin bung wantaim “ol manmeri bilong kingdom,” em spirit holi i makim ol, na ol i wok wantaim ol maski ol man i mekim nogut long dispela lain. (Mt. 25:31-46) Ol i helpim dispela lain long autim tok bilong Kingdom. Nau bikpela lain manmeri, inap sampela milion, ol i insait long dispela wok. Ol manmeri bilong olgeta hap bilong graun ol inap harim tok bilong Kingdom. Ol dispela samting i kamap em i makim wanem samting? Olsem: Dispela “las taim” i laik pinis na ‘De bilong Jehova’ i klostu.
Wanem Samting Bai Kamap Bihain?
11 Olsem wanem? I gat sampela samting moa i mas kamap bilong truim ol tok profet bilong Baibel na bihain bai bikpela De bilong Jehova i kamap? I gat! Wok bilong tilim ol man i go tupela lain, olsem ol man i harim tok bilong Kingdom na ol man i sakim, dispela wok i no pinis yet. Long sampela hap bipo ol man i birua tru long ol brata, tasol nau planti nupela disaipel i kamap long ol dispela hap. Na maski sampela man i sakim tok, tasol yumi bin autim tok long ol na dispela samting i kamapim stretpela pasin na marimari bilong Jehova. Olsem na yumi mas mekim yet dispela wok! Na Jisas i tok, taim dispela wok i pinis, orait “bai las de i kamap.”—Mt. 24:14.
12 Narapela bikpela tok profet bilong Baibel i tok: “Bai ol i tok, ‘Em i gutaim nau, yumi stap gut.’ Long dispela taim tasol samting bilong bagarapim ol bai i kamap kwiktaim long ol, olsem pen i save kamap long meri i laik karim pikinini. Na ol i no inap abrusim dispela samting.” (1 Te. 5:2, 3) Dispela tok bai kamap olsem wanem, em yumi no save yet. Tasol i no olsem ol hetman bilong graun bai stretim tru ol hevi bilong graun. Nogat. Taim ol i tok, “Em i gutaim nau,” dispela tok ol i mekim i no ken giamanim ol manmeri i tingim gut De bilong Jehova. Ol i save, taim ol man i mekim dispela tok, “samting bilong bagarapim ol bai i kamap kwiktaim long ol.”
13 Pastaim, olsem Baibel i tok, ol gavman bilong olgeta hap i mas biruaim Bikpela Babilon, em olgeta lotu giaman, na bagarapim em olgeta. (Re. 17:15, 16) Ol gavman i kirap pinis long birua long ol lotu na yumi inap lukim dispela samting. Ol i birua tru long ol misin ol i kolim Kristen, olsem Krisendom. Planti gavman ol i nolaik tru long ol lotu, nau ol i kamap strong insait long Yunaitet Nesen. Na long planti ples bipo ol i strong long lotu, nau bikpela lain ol i lusim ol lotu ol tumbuna bilong ol i bin bihainim. Orait, dispela i makim wanem samting? Olsem: Klostu nau bai olgeta lotu giaman i bagarap. Na bihain, taim ol lain bilong graun i bikhet na kirapim pait long ol manmeri i stap gut long Bikpela King Jehova, bai God Jehova i belhat long ol gavman na ol lain i helpim wok bilong ol na bai em i bagarapim olgeta wantaim. Na bihain Seten wantaim ol narapela spirit nogut bai ol i kalabus long hul i no gat as. Bai ol i no inap giamanim moa ol manmeri. Em nau, dispela em i ‘De bilong Jehova.’ Ol samting i kamap long dispela “De” bai litimapim nem bilong Jehova.—Esi. 38:18, 22, 23; Re. 19:11–20:3.
14 Dispela “De” bai kamap stret long taim God i makim pinis. Em i no ken i kam bihaintaim. (Hab. 2:3) Tingim ol samting i bin kamap taim Jerusalem i bagarap long 70 C.E. Dispela bagarap i kamap wantu tasol, long wanpela taim ol Juda i no bin tingim. Ol i ting samting i laik bagarapim ol i go pinis. Na olsem wanem long taun Babilon bilong bipo? Dispela taun i gat strongpela banis na ol i ting ol birua i no inap daunim ol. Tasol long wanpela nait tasol bagarap i painim dispela taun. Olsem tasol “kwiktaim” bai dispela pasin nogut bilong nau i pinis. Taim dispela samting i kamap, yumi laik bai Jehova i lukim yumi i stap wanbel long lotuim Em, long wanem yumi bin ‘tingim gut’ De bilong Jehova.
STORI GEN LONG OL DISPELA TOK
● Bilong wanem i bikpela samting yumi mas tingim gut De bilong Jehova? Yumi ken mekim olsem wanem?
● Wok bilong tilim “ol sipsip” na “ol meme” long nau, dispela wok i mekim wanem long yumi?
● Wanem wanem samting i no kamap yet, tasol em i mas kamap pastaim na bihain bai De bilong Jehova i kamap? Olsem na yumi yet yumi mas mekim wanem?
[Askim Bilong Stadi]
1. (a) Namba wan taim yu bin harim tok olsem ol hevi bilong graun i laik pinis, yu pilim olsem wanem? (b) Yumi mas tingim gut wanem ol askim long dispela samting?
2. (a) “De bilong Jehova” bai kam long wanem taim? (b) Jehova i no kolim stret dispela de o dispela aua, na dispela i gutpela olsem wanem?
3. Jisas i tok wanem long dispela samting bilong kirapim yumi long was gut?
4. Wanem samting bai kamap long “de bilong Jehova,” olsem Pita i tok?
5. (a) Ol tok Jisas i bin mekim bilong bekim dispela askim i stap long Matyu 24:3, ol dispela tok i makim tasol ol samting i mas kamap long pinis bilong taim bilong ol Juda o olsem wanem? (b) Wanem ol hap tok bilong em i makim ol samting i mas kamap long 1914 na bihain long en?
6. (a) Bilong wanem yumi olgeta wan wan yumi mas tingim gut ol samting i kamap long nau i olsem hap bilong dispela “mak”? (b) Bekim ol askim i stap long pinis bilong dispela paragraf na stori long ol samting bilong dispela “mak” i bin kamap tru long 1914 na bihain long en.
7. (a) Long Matyu 13:36-43 Jisas i stori long wanem narapela wok i mas kamap long pinis bilong dispela taim nau? (b) Wanem insait bilong dispela tok piksa?
8. (a) Bihain long Namba Wan Pait, olgeta man i tok ol i Kristen ol i bruk long wanem tupela lain? (b) Ol Kristen tru, em spirit holi i bin makim ol, ol i mekim wanem na ol i kamapim ples klia olsem ol i “manmeri bilong kingdom”?
9. Ol i kirap autim tok bilong Kingdom na ol i bungim husat pastaim?
10. (a) Ol i mekim wanem wok moa bilong tilim ol man? Dispela i stret wantaim wanem tok profet? (b) Ol samting i kamap olsem ol dispela tok profet i tok long en na dispela i makim wanem samting?
11. Yumi mas wok yet long autim tok paslain long De bilong Jehova o olsem wanem?
12. (a) Wanem bikpela samting 1 Tesalonaika 5:2, 3 i tok long en na i no kamap yet? (b) Taim dispela samting i kamap, olsem wanem long yumi?
13. Taim ol i tok, “Em i gutaim nau, yumi stap gut,” kwiktaim bai wanem wanem ol samting i kamap? Wanem samting bai kamap pastaim na wanem samting bai kamap bihain?
14. Sapos yumi ting De bilong Jehova i no ken kamap kwiktaim, olsem wanem yumi no bihainim gutpela tingting?