Sapta 20
Tingim Gut De Bilong Jehova
1. Namba wan taim yu harim olsem ol hevi bilong dispela graun klostu i laik pinis, yu pilim olsem wanem?
TAIM yu kirap lainim tok bilong Baibel, yu bin kisim save olsem Jehova i laik bai dispela graun olgeta i kamap Paradais. Long dispela nupela taim bai i no gat woa, pasin raskol, pasin bilong i stap rabis, sik, pen, na i dai. Ol manmeri i dai pinis ol bai kirap bek. Em i gutpela samting tru, a? Yumi save dispela gutpela taim i klostu tru, long wanem, ol samting i kamap i kamapim klia olsem Krais i kirap mekim wok King long yia 1914, na kirap long dispela taim yumi stap pinis long taim bilong las de bilong dispela taim nogut bilong nau. Long pinis bilong dispela taim bilong las de, Jehova bai bagarapim pasin nogut bilong dispela graun na kamapim nupela taim em i bin tok promis long kamapim!
2. “De bilong Bikpela” em wanem samting?
2 Baibel i kolim dispela taim bilong bagarapim ol samting olsem “De bilong Bikpela.” (2 Pita 3:10) Em i “taim Bikpela i belhat” long olgeta lain bilong Satan. (Sefanaia 2:3) Laspela hap bilong en bai kamap long “bikpela de bilong God I Gat Olgeta Strong i kotim ol manmeri . . . long tok Hibru ol i kolim Armagedon.” Long dispela pait “ol king bilong olgeta kantri bilong graun” bai bagarap. (KTH 16:14, 16) Olsem wanem? Wokabaut bilong yu i kamapim klia olsem yu bilip “De bilong Bikpela” i kam klostu pinis?—Sefanaia 1:14-18; Jeremaia 25:33.
3. (a) De bilong Jehova bai kamap long wanem taim? (b) Bilong wanem i gutpela samting Jehova i no bin kamapim ‘de na aua’?
3 Baibel i no kolim de stret Jisas Krais bai kam olsem Man Jehova i makim bilong givim strafe long lain bilong Satan. Jisas i tok: “I no gat wanpela man i save wanem de na wanem aua dispela ol samting bai i kamap. Ol ensel bilong heven i no save, na Pikinini tu em i no save. Papa wanpela tasol em i save.” (Mak 13:32) Ol man i no laikim tru Jehova ol i no ting dispela de i klostu, olsem na ol bai givim bel long ol wok bilong skin. Tasol ol manmeri i laikim tru Jehova ol bai givim bel long mekim wok bilong em, maski pasin nogut bilong nau bai pinis long wanem taim.—Song 37:4; 1 Jon 5:3.
4. Jisas i mekim wanem tok lukaut?
4 Bilong mekim tok lukaut long ol manmeri i laikim tru Jehova, Jisas i tok: “Yupela lukaut. Yupela i mas was i stap, long wanem, yupela i no save wanem taim dispela ol samting bai i kamap.” (Mak 13:33-37) Em i tokim yumi long yumi no ken tingting tumas long kaikai na dring na “wari long ol samting bilong bodi” na yumi no tingim gut dispela taim yumi stap long en.—Luk 21:34-36; Matyu 24:37-42.
5. Wanem samting bai kamap long de bilong Jehova, olsem Pita i tok?
5 Pita tu i tokim yumi long tingim “De bilong God i kamap, . . . Long dispela De tasol skai bai i paia na i pinis, na hatpela paia moa bai i kukim olgeta liklik samting God i bin wokim graun long en, na ol bai i kamap wara nating.” Olgeta gavman bilong man—“skai”—bai bagarap, na ol lain man nogut—“graun”—ol tu bai bagarap wantaim “olgeta liklik samting,” em ol tingting na wok bilong ol manmeri nogut, olsem pasin pamuk, laikim tumas mani kago, na pasin bilong bosim wokabaut bilong ol yet na sakim wok bos bilong God. Ol dispela samting bai pinis na “nupela skai [Kingdom bilong God long heven] na nupela graun [nupela lain manmeri]” em “stretpela pasin tasol bai i stap long en” bai i kamap. (2 Pita 3:10-13) Ol dispela bikpela samting bai kirap wantu tasol, long taim yumi no ting em bai kamap.—Matyu 24:44.
Tingim Gut Dispela Mak
6. (a) Ol tok Jisas i mekim bilong bekim askim i stap long Matyu 24:3, ol dispela tok i makim tasol ol samting i mas kamap long pinis bilong taim bilong ol Juda o olsem wanem? (b) Wanem ol hap tok bilong em i makim ol samting i kirap long 1914 na bihain long en?
6 Yumi stap long las taim, olsem na yumi mas save gut long ol samting i insait long dispela mak bilong taim bilong las de—olsem ‘pinis bilong dispela graun.’ Tingim olsem taim Jisas i bekim askim bilong ol disaipel i stap long Matyu 24:3, sampela tok em i mekim long ves 4 i go inap 22 i gat liklik truim bilong en long pinis bilong taim bilong ol Juda, namel long 33 na 70 C.E. Tasol dispela tok profet i gat bikpela truim bilong en kirap long 1914, em taim Krais “i kam bek na dispela graun i laik pinis.” Matyu 24:23-28 i stori long ol samting bai kamap kirap long 70 C.E. i kam inap long taim Krais i kam i stap. Ol samting Matyu 24:29–25:46 i tok long en i kamap long taim bilong las de.
7. (a) Bilong wanem yumi olgeta wan wan i mas tingim gut ol samting i kamap long nau na i truim dispela mak? (b) Bekim ol askim i stap long pinis bilong dispela paragraf na stori olsem wanem ol samting i bin kamap kirap long 1914 na i kam i bin truim dispela mak.
7 Yumi olgeta wan wan i mas tingim gut ol samting i kamap na ol tingting bilong ol man i truim dispela mak. Pasin bilong skelim ol dispela samting wantaim tok profet bilong Baibel bai helpim yumi long tingim gut de bilong Jehova. Na tu, em bai helpim yumi long mekim gutpela tok taim yumi givim tok lukaut long ol narapela man olsem dispela de i klostu pinis. (Aisaia 61:1, 2) Orait, yumi tingim ol dispela samting na yumi skelim ol dispela askim i kamapim sampela hap bilong dispela mak i stap long Matyu 24:7 na Luk 21:10, 11.
Olsem wanem truim bilong tok profet olsem, ‘sampela lain bai i kirapim pait long ol narapela lain’ i bin kamap long 1914 na bihain long en? Kirap long dispela taim i kam inap nau, olsem wanem long ol woa?
Long 1918, wanem bikpela sik i bin kilim i dai planti man, winim Namba Wan Pait? Maski ol dokta i kisim bikpela save long ol sik, wanem ol sik i wok yet long kilim i dai planti man?
Olsem wanem long ol bikpela hangre, maski ol saientis long nau i bin kisim bikpela save long ol samting bilong helpim ol man?
Wanem ol samting i kamap na yu bilip olsem ol samting 2 Timoti 3:1-5, 13 i kolim i kamap moa yet na i nogut moa yet nau long las taim, winim bilong bipo?
Tilim Ol Man
8. (a) Long Matyu 13:24-30, 36-43, Jisas i stori long wanem narapela samting i mas kamap long pinis bilong dispela taim? (b) Wanem mining bilong tok piksa bilong Jisas?
8 Jisas i stori long ol narapela bikpela samting tu i mas kamap long taim bilong pinis. Wanpela em wok bilong tilim “ol manmeri bilong kingdom” na “ol manmeri bilong Satan.” Jisas i stori long dispela samting long tok piksa bilong gaden wit em wanpela birua i kam tromoi pikinini bilong gras nogut long en. Long dispela tok piksa “wit” i makim ol trupela Kristen God i bin makim. “Gras nogut” i makim ol man i tok ol i Kristen, tasol ol i “manmeri bilong Satan,” long wanem, ol i laikim pasin bilong graun em Satan i bosim. Ol i bilong kisim bagarap, na Jisas i tilim ol i go long narapela lain na “ol manmeri bilong kingdom [bilong God]” i go long narapela. (Matyu 13:24-30, 36-43) Olsem wanem? Dispela wok i kamap pinis?
9. (a) Bihain long Namba Wan Pait, wanem wok bilong tilim ol man i tok ol i Kristen i bin kamap? (b) Ol Kristen God i bin makim i mekim wanem bilong kamapim klia olsem ol i wokman tru bilong Kingdom?
9 Bihain long Namba Wan Pait, i gat wanpela wok bilong tilim olgeta manmeri i tok ol i Kristen i go long tupela lain: (1) Ol pris pasto bilong Kristendom wantaim lain bilong ol, em ol i givim bel long Lig ov Nesen (nau Yunaitet Nesen), tasol ol i strong yet long litimapim ples bilong ol yet, na (2) ol Kristen tru i stap bihain long taim woa i pinis, em ol i givim bel long Kingdom bilong God, ol i no givim bel long ol lain man bilong dispela graun. ( Jon 17:16) Ol i kirap autim “dispela gutnius bilong kingdom” long olgeta hap na dispela i makim olsem ol i wokman tru bilong Kingdom bilong God. (Matyu 24:14) Wok bilong ol i kamapim wanem ol samting?
10. Wanem namba wan samting i kamap long wok bilong autim tok bilong Kingdom?
10 Pastaim ol i bungim lain remnan em God i bin makim ol long holi spirit, em ol i wet long i stap wantaim Krais long Kingdom bilong heven. Maski dispela lain i stap nabaut long olgeta hap bilong graun, God i bungim ol insait long wanpela oganaisesen i stap wanbel. Wok bilong putim mak long dispela lain God i bin makim i klostu pinis.—KTH 7:3, 4.
11. (a) Wanem wok bilong bungim ol man i stap yet? Dispela i stret wantaim wanem tok profet? (b) Truim bilong dispela tok profet i wok long kamap long nau, dispela i makim wanem samting?
11 Na bihain, Krais i bosim wok bilong bungim “planti manmeri tru . . . bilong olgeta lain man na bilong olgeta kantri na bilong olgeta kain skin na bilong olgeta kain tok ples.” Ol i kamap lain “arapela sipsip” em ol bai winim ‘bikpela hevi tru’ na i go insait long nupela taim God bai kamapim. (KTH 7:9, 14; Jon 10:16) Dispela wok bilong autim tok bilong Kingdom bilong God paslain long pinis i kamap, i wok long kam inap long nau. Bikpela lain bilong ol arapela sipsip, em ol i planti milion long nau, ol i stap gut long wok bilong helpim lain remnan long autim tok bilong Kingdom. Ol man bilong olgeta kantri i wok long harim dispela tok.
Wanem Samting Bai Kamap Bihain?
12. Wanem wok moa bilong autim tok i mas kamap paslain long de bilong Jehova i kamap?
12 Olgeta dispela samting i makim olsem yumi stap long pinis bilong taim bilong las de na de bilong Jehova i klostu pinis. Tasol olsem wanem? I gat sampela samting moa i mas kamap bilong truim ol tok profet paslain long bikpela de bilong Jehova i kamap? Yes, i gat. Wok bilong tilim ol man i go tupela lain, olsem ol man i laikim tok bilong Kingdom na ol man i sakim, dispela wok i no pinis yet. Long sampela hap bipo ol man i birua tru long tok bilong Kingdom, tasol nau planti nupela disaipel i kamap long ol dispela hap. Na long ol hap we ol man i sakim gutnius, pasin marimari bilong Jehova i kamap klia taim yumi autim tok long ol. Olsem na yumi mas mekim yet dispela wok! Jisas i tok, taim dispela wok i pinis, pinis bai kamap.
13. Wanem bikpela samting em 1 Tesalonaika 5:2, 3 i tok long en na i no kamap yet? Taim dispela samting i kamap, olsem wanem long yumi?
13 Narapela bikpela tok profet bilong Baibel i tok: “Ol manmeri bai i tok olsem, ‘Nau em i gutpela taim tru. Yumi stap gut,’ na wantu tasol samting bilong bagarapim ol bai i kamap long ol, olsem pen i save kamap long meri i laik karim pikinini. Na ol bai i no inap abrusim dispela samting.” (1 Tesalonaika 5:2, 3) Dispela tok “nau em i gutpela taim tru” bai kamap olsem wanem, em yumi no save yet. Tasol i no olsem ol hetman bilong graun bai stretim tru ol hevi bilong ol man. Nogat. Dispela tok bai i no paulim ol man i tingim gut de bilong Jehova. Ol i save olsem bihain stret long dispela tokaut, wantu tasol bagarap bai kamap.
14. Wanem ol samting bai i kamap long taim bilong bikpela hevi tru? Wanem samting bai kamap pastaim na wanem samting bai kamap bihain?
14 Long kirap bilong bikpela hevi tru, ol gavman bai birua long Bikpela Babilon, em olgeta lotu giaman, na bagarapim em olgeta. (Matyu 24:21; KTH 17:15, 16) Bihain long dispela, ol lain man bai kirap birua long ol man i stap gut long Jehova. Dispela bai kirapim Jehova long belhat long ol gavman politik na ol man i sapotim ol, na ol bai bagarap olgeta. Dispela em i Armagedon, laspela samting bilong taim bilong bikpela hevi tru. Satan na ol ensel nogut bilong em bai kalabus, na ol i no inap giamanim moa ol manmeri. Dispela bai pinisim bikpela de bilong Jehova na ol man bai litimapim nem bilong em.—Esekiel 38:18, 22, 23; KTH 19:11–20:3.
15. Sapos yumi ting de bilong Jehova i no ken kamap kwiktaim, olsem wanem yumi no bihainim gutpela tingting?
15 Pinis bilong pasin nogut bilong graun bai kamap long taim stret, long taim God i makim pinis. Em i no inap kamap bihaintaim. (Habakuk 2:3) Tingim, bagarap bilong Jerusalem i kamap long 70 C.E. i kamap wantu tasol, long taim ol Juda i no bin tingim, na ol i ting samting i laik bagarapim ol i go pinis. Na olsem wanem long taun Babilon bilong bipo? Dispela taun i gat strongpela banis na ol i ting ol birua i no inap daunim ol. Tasol long wanpela nait tasol bagarap i painim dispela taun. Na olsem tasol pasin nogut bilong nau bai pinis wantu tasol. Taim dispela samting i kamap, gutpela sapos yumi wanbel long lotu i tru, na tingim gut de bilong Jehova.
Stori Gen Long Ol Dispela Tok
• Bilong wanem i bikpela samting long tingim gut de bilong Jehova? Yumi ken mekim olsem wanem?
• Wok bilong tilim ol man long nau i mekim wanem long yumi?
• Wanem ol samting bai kamap yet paslain long bikpela de bilong Jehova i kirap? Olsem na yumi yet i mas mekim wanem?
[Ol Piksa long pes 180, 181]
Klostu nau taim bilong las de bai pinis taim graun bilong Satan i bagarap