Sapta 17
Narapela Kain Tingting Long Bihainim Tok
PLANTI yia paslain long taim ol Babilon i bagarapim Jerusalem, Jehova i toksave long ol Juda long ol samting bai painim ol na bilong wanem dispela samting bai painim ol. Ol i bikhet na bihainim laik bilong bel bilong ol yet; ol i no bihainim tok bilong God.—Jeremaia 25:8, 9; 7:24-28.
2 Jehova i no save subim ol man long lotuim em; nogat. Tasol i stret em i tok, ol i mas bihainim tok bilong em sapos ol i laik bai em i orait long ol na givim laip long ol. Jehova i helpim ol Isrel long lusim Isip na bihain em i tokim ol: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain pipel bilong mi. Olgeta graun na olgeta manmeri i bilong mi, tasol mi bai makim yupela i stap ol manmeri bilong mi stret. Na bai yupela i stap lain pipel i save mekim wok bilong mi olsem pris. Na bai yupela i stap ol manmeri tru bilong mi.” (Eksodas 19:5, 6) God i kolim pinis ol lo ol i mas bihainim na Moses i kaunim ol tok bilong “buk bilong kontrak” long ol, na nau long laik bilong ol yet, ol i kirap na tok ol bai bihainim olgeta dispela tok na lo bilong God. Long dispela rot ol i insait long kontrak wantaim em na ol i kamap lain bilong em.—Eksodas 24:7.
3 Tasol i no longtaim na ol i kirap long bikhet. Ol Isrel i no tokaut long ples klia olsem ol i no bilip moa long Jehova; nogat; tasol planti ol i sakim lo bilong em na ol i laik bungim sampela pasin lotu bilong ol Isip wantaim lotu bilong Jehova. (Eksodas 32:1-8) Bihain sampela i bel nogut long ol man Jehova i bin putim ol i stap olsem maus bilong em. (Nambas 12:1-10; 161-3, 31-35) Ol i no bilip; ol i pret long ol man na ol i no bihainim tok bilong God. (Nambas 13:2, 31-33; 14:1-4; Hibru 3:17-19) Taim wanpela Isrel i popaia na mekim sin na long pasin daun em i tanim bel, orait sin bilong em inap tekewe. Tasol inap longtaim, olsem 900 yia samting, dispela lain i wok long sakim lo bilong God. Pastaim ol i sakim wan wan lo, tasol bihain ol i kirap sakim planti lo. Ol samting ol i bin mekim na ol samting i bin kamap long ol em i olsem piksa, na stori bilong dispela i stap long Baibel bilong givim tingting long yumi bambai yumi no ken bihainim pasin nogut bilong ol.—2 Kronikel 36:15-17; 1 Korin 10:6-11.
4 Long taim bilong Jeremaia, planti taim Jehova i toksave long ol Isrel long ol samting nogut bai painim ol long pasin nogut ol i mekim. Na bihain em i makim lain Rekap i stap olsem gutpela piksa bilong ol. Dispela lain ol i no bilong lain Isrel; ol i lain bilong Jehonadap. Jehonadap i bin kamapim long ples klia olsem em i wanbel wantaim Jihu, em Jihu i no laik larim ol man i lotuim narapela god; ol i mas lotuim Jehova tasol. Dispela Jehonadap (o Jonadap) em i tumbuna bilong ol Rekap na em i bin tambuim ol long dring wain inap long taim bihain bihain, na em i tambuim ol long sindaun long ol haus na wokim gaden samting; ol i mas i stap long ol haus sel na raun raun. Long dispela rot bai ol i sindaun gut na no ken dring spak, na bai ol i no gat planti samting; bai ol i no wok long inapim olgeta laik bilong skin na bihainim ol pasin nogut olsem bilong ol man i stap long ol biktaun. Tasol bai ol i stap namel long ol Isrel na lotuim Jehova olsem ol Isrel i mekim.
5 Ol Isrel i bikhet na ol i no laik bihainim tok bilong Jehova em i King Bilong Heven na Graun. Orait, olsem wanem long ol Rekap? Ol i bihainim tok bilong tumbuna bilong ol? Yes, ol i bihainim tru na ol i stap olsem gutpela piksa. Taim ol ami bilong Babilon na Siria i kam kirapim pait long ples Juda, ol Rekap i painim ples hait insait long biktaun Jerusalem, tasol ol i sindaun yet long ol haus sel. Ol i stap namel long ol man i no gat tambu long wain. Orait olsem wanem long ol Rekap? Ol i strong yet long bihainim dispela tambu? Jehova i tokim Jeremaia long kisim ol Rekap i go long wanpela rum long haus lotu na putim ol kap wain na tokim ol long dring. Jeremaia i mekim olsem, tasol ol Rekap i no dring. Bilong wanem ol i no laik dring? Ol i pilim tru gutpela pasin bilong tumbuna bilong ol, em i bin givim bel long Jehova, na ol i save em i tingting long helpim ol long i stap gutpela, olsem na ol i bihainim tok bilong em. Jehova i amamas long gutpela pasin bilong ol long bihainim tok; pasin bilong ol i kamapim long ples klia pasin bikhet bilong ol Juda, em ol i no bihainim tok bilong Jehova.—Jeremaia 35:1-11.
6 I gat sampela manmeri bilong nau ol i kain olsem ol Rekap. Em ol “arapela sipsip” bilong Bikpela. Ol i save dring wain o nogat, dispela i no bikpela samting long nau. (Lukim 1 Timoti 5:23.) Em samting bilong ol yet wan wan; tasol ol i no ken dring planti tumas o kamap man bilong dring spak. (Provep 2320; 1 Korin 6:9, 10) Tasol bihainim tok bilong God em bikpela samting tru. Ol misin ol i kolim Kristen, ol i olsem ol Isrel bilong bipo, em ol i givim baksait long God. Tasol dispela lain long nau ol i olsem ol Rekap bilong bipo, ol i no bihainim pasin bilong ol dispela misin. Ol i save ol i mas givim bel long God na ol i bihainim tok bilong em. Dispela bai helpim ol olsem wanem?
7 Ol Rekap i givim bel tru na Jehova i mekim wanpela tok promis long ol i makim sampela samting i mas kamap nau long taim bilong yumi. Jehova i tok: “Yupela i bin bihainim tok bilong Jehonadap, em tumbuna bilong yupela, na yupela i bihainim yet olgeta tok em i bin givim long yupela, olsem na Jehova bilong bikpela lain, em God bilong Isrel, em i tok: ‘Oltaim bai i gat man long lain bilong Jonadap, em pikinini bilong Rekap, i stap long ai bilong mi.’ ” (Jeremaia 35:18, 19, NW) Jerusalem i bagarap long yia 607 B.C.E., tasol ol Rekap i no bagarap. Na dispela lain ol Rekap i olsem piksa bilong ol, ol i no ken bagarap taim ol lain ol i kolim Kristen na olgeta narapela lain bilong dispela graun i bagarap, em ol i bikhet na bihainim laik bilong ol yet na ol i no daun long Jehova, em i king.
BILONG WANEM SAMPELA I HATWOK LONG BIHAINIM TOK?
8 Planti man i hatwok long bihainim tok. Ol i go bikpela namel long ol manmeri i save bihainim laik bilong ol yet. Taim ol i kisim save long gutpela sindaun ol inap kisim aninit long Kingdom bilong God, ating ol i amamas. Tasol sapos ol i gat pasin antap, ating dispela bai pasim bel bilong ol na bai ol i no laik bihainim sampela lo bilong God, o bai ol i gat tok long pasin bilong God long givim tok long ol. (Provep 8:13; 16:18) Neman, em kepten bilong ami bilong Siria long taim bilong profet Ilaisa, em i gat dispela kain pasin.
9 Neman i gat sik lepra. Wanpela yangpela meri Isrel i wok kalabus long Neman, tasol em i bilip strong na em i no pret long tokim Neman, sapos Neman i go lukim Ilaisa, em profet bilong Jehova long Isrel, bai sik bilong Neman i pinis. Neman i kisim ol hos na karis bilong pait na em i go kamap long haus bilong Ilaisa. Neman i gat biknem na em i ting Ilaisa bai lusim haus i kam ausait na em bai mekim sampela pasin bilong lotu na singaut long Jehova na holim skin bilong Neman na bai skin bilong em i kamap gutpela gen. Tasol nogat. Ilaisa i salim wanpela wokboi i go givim tok long Neman na tokim em i go waswas 7-pela taim long Wara Jodan.—2 King 5:1-12.
10 Neman i pilim olsem dispela samting i daunim nem bilong em. Em i belhat na em i laik i go bek long ples. Tasol ol wokboi bilong em i givim gutpela tingting long em, olsem na em i harim tok na mekim pasin daun. “Em i go long wara Jodan na waswas 7-pela taim olsem man bilong trupela God i bin tokim em long mekim; na bihain skin bilong em i kamap gutpela olsem bilong pikinini na em i kamap klin.” Nau Neman i bilip olsem Jehova tasol em i God tru, na em i save, pastaim em i sakim tok, tasol dispela tok Ilaisa i bin givim long em em i tok bilong God.—2 King 5:13-15, NW.
11 Olsem wanem? Yu gat sampela pasin wankain olsem bilong Neman? Neman na sampela bilipman bilong bipo, em ol i no bilong lain Isrel, Baibel i stori long ol bilong makim ol “arapela sipsip” em ol i lotuim God tru, Jehova. Olgeta dispela “arapela sipsip,” taim mama i karim ol ol i gat sin na i olsem ol i gat sik bilong spirit. Na bilong helpim ol, olgeta i bin i go long lain “wokboi” bilong Jehova spirit holi i bin makim ol, na ol i bihainim olgeta tok bilong Baibel dispela lain “wokboi” i bin lainim ol long en. (Matyu 24:45) Pastaim sampela i no pilim tru ol gutpela tok bilong Baibel dispela lain i givim long ol—olsem ol i mas i go oltaim long ol miting, na ol i mas klia long pasin bilong dispela graun, na ol i mas kisim baptais long wara. Ating ol i surik long dediket long God na ol i no kisim baptais, long wanem ol i no laik ‘daunim laik bilong ol yet’ bambai ol i ken kamap disaipel bilong Krais. Ating sampela i gat tok long pasin bilong ol elda bilong kongrigesen long givim tok long ol. Tasol olgeta manmeri i laik tru long kamap ol “arapela sipsip” bilong Bikpela, ol i mas lain long mekim pasin daun na bihainim tok.—Jems 4:6; Matyu 16:24.
OL LO I HELPIM YUMI
12 Taim yumi kisim save long Jehova na long ol pasin bilong em, nau yumi pilim olsem tok em i bin mekim long ol wokboi bilong em long bipo em i stret, em i tok: “Mi Jehova, mi God bilong yu, na mi save lainim yu long pasin bilong helpim yu yet, mi Man bilong mekim yu i wokabaut long rot i stret yu mas wokabaut long en. Mi laik bai yu bihainim tok bilong mi!” (Aisaia 48:17, 18, NW) Jehova i laik tru bai ol manmeri bilong em ol i mas bihainim ol lo bilong em na bai ol inap abrusim bagarap na kisim laip. Em yet i bin wokim yumi, olsem na em i save long pasin bilong yumi; em i save long ol samting bilong helpim yumi long i stap amamas tru. Em i toksave long yumi long ol pasin em inap bagarapim yumi o pasim yumi long sindaun gut wantaim ol narapela man.
13 Ol manmeri i bin bihainim tambu bilong em long pasin pamuk na pasin bilong bagarapim marit, dispela i bin helpim ol long abrusim ol hevi ol dispela pasin i kamapim, olsem bel i gat tok na sik bilong pamuk na kamapim nating pikinini. (1 Korin 6:18; Hibru 13:4) Ol i bin bihainim ol kain tok olsem i stap long 2 Korin 7:1, olsem na ol i no save smok o kisim maruana samting, em ol dispela samting i save kalabusim ol man na bagarapim skin bilong ol na bai ol i dai kwik. Jehova i putim lo na em i tok ol wokboi bilong em i mas ‘klia long blut.’ Dispela lo bilong em i bin helpim ol long bilip tru olsem em tasol inap givim laip long ol long bihain, na tu dispela lo i bin helpim ol long abrusim ol sik nogut i save painim man taim em i kisim blut long haus sik.—Aposel 15:28, 29.
14 Yumi stap long dispela graun, olsem na sampela taim, olsem long skul o long ples wok samting, yumi save bung wantaim ol manmeri bilong dispela graun. Tasol Jehova i toksave olsem: Yumi no ken holim strong ol samting bilong dispela graun o insait long ol wok bilong en. Jehova i save long ol samting i laik painim dispela graun. Sapos yumi wok strong long helpim wanpela samting God i laik bagarapim, yumi mekim pasin longlong! Na ol man i wok strong long helpim dispela graun ol bai kisim nogut wantaim ol manmeri bilong dispela graun. Olsem na tok bilong Pikinini bilong God i helpim tru yumi, em i tok: Yu mas painim Kingdom bilong God! Tingim Kingdom pastaim!—1 Jon 2:17; Matyu 6:33.
15 Jehova i save tru long ol samting yumi mas kisim, na em i wok long redim lain bilong em bambai ol inap i stap oltaim long nupela stretpela taim em i laik kamapim. Adam i bikhet na sakim tok, olsem na em i gat sin na em i no inap kisim laip i stap oltaim, na God i rausim em long Paradais. Tru tumas, sapos yumi laik kisim ol dispela gutpela samting Adam i bin lusim, yumi mas putim gut yau long ol tok bilong God. Orait long dispela taim bilong 1,000 yia long bihain, taim ol man i wok long kamap gutpela olgeta, bai em i givim tok long yumi long wanem rot? Long rot bilong Kingdom i stap long han bilong Krais. Bai i gat sampela maus bilong dispela gavman hia long graun? Bai i gat. King Krais Jisas bai i gat “planti pikinini man” ol i mekim wok bilong em long graun. (Sam 45:16; lukim tu Aisaia 32:1, 2.) Taim ol manmeri i bihainim tok bilong ol dispela ‘pikinini man bilong king’ bai ol i kamapim long ples klia olsem ol i daun long King bilong ol em i stap long heven.
16 Bilong redi long dispela taim bihain, nau Jehova i skulim ol man long rot bilong oganaisesen bilong em hia long graun, em yet i bosim. Insait long ol kongrigesen em i putim ol elda. Ol i lukautim ol miting bilong kongrigesen na ol i go pas long autim tok bilong Kingdom. Ol i helpim olgeta manmeri i laik mekim wok bilong Jehova bambai ol i ken lain long bihainim ol lo bilong Baibel, na ol i toksave long ol long ol samting em inap pundaunim ol na bai ol i no i stap wanbel moa wantaim God. Na ol Witnes Bilong Jehova long olgeta hap ol i bin kisim save olsem: Taim ol i bihainim tok bilong ol elda, dispela i bin helpim ol long abrusim bagarap long taim bilong bikpela win na ren o long taim i gat guria o pait. Kongrigesen em i no bilong ol elda. Nogat. Em bilong God. Ol elda i no ting spirit bilong God i givim narapela kain save long ol na em i as bilong ol tok bilong ol. Nogat. Tasol olsem Baibel i makim, God i givim wok long ol bilong go pas long kongrigesen, na sapos yumi bihainim tok bilong ol, dispela i makim olsem yumi laik bihainim ol samting Jehova i mekim bilong redim ol wokboi bilong em bambai ol i ken abrusim bagarap na i stap long Nupela Taim.—Aposel 20:28; Hibru 13:17.
17 Tru yumi mas i gat laik long abrusim bagarap, tasol i no dispela samting tasol i kirapim yumi long bihainim tok. Nogat. I gat planti samting moa i kirapim yumi long mekim olsem. Em wanem ol samting? Yumi laik tumas long i stap laip na yumi laikim ol gutpela samting God i bin givim long yumi bilong helpim yumi long i stap laip. Yumi tenkyu tru long Em long ol gutpela samting em i bin givim long yumi i helpim yumi long i stap amamas, olsem yumi inap wokim tingting, na pilim samting i gutpela na ol samting bilong spirit, na yumi inap kisim save long Man bilong wokim yumi na lotu long em. Na tu yumi pilim bikpela pasin sori God i bin mekim—em i givim Pikinini bilong em yet bilong i dai olsem ofa bambai yumi inap kisim laip i stap gut oltaim oltaim.
18 Ol man i save gut long God, ol i no bel hevi long bihainim tok. Ol i bin kisim stretpela save long laik bilong em na long ol lo bilong em na ol i pilim pinis gutpela samting i painim ol taim ol i bihainim ol dispela lo, olsem na ol i save sapos ol i bihainim tok bilong God, dispela pasin i stret na em i savepasin. Ol i save ol lo bilong God i bilong lukautim ol. Na taim ol i bihainim ol dispela lo em i rot bilong ol i ken kamapim bel bilong ol, ol i laikim tumas God. Ol i kisim bikpela amamas long bihainim tok bilong Em.—1 Jon 5:3; Sam 119:129.
[Askim Bilong Stadi]
1. Bilong wanem Jehova i larim ol Babilon i bagarapim Jerusalem?
2. (a) Wanem ol gutpela samting i mas painim ol man i bihainim tok bilong God? (b) Olsem wanem lain Isrel i insait long kontrak wantaim Jehova na ol i kamap lain bilong Em?
3. (a) Bihain ol Isrel i mekim wanem na ol i bikhet long Jehova? (b) Bilong wanem Baibel i stori long ol dispela samting i bin kamap long bipo?
4. (a) Ol Rekap ol i husat? (b) Jehonadap i bin putim wanem ol tambu long ol?
5. Olsem wanem ol Rekap i stap olsem gutpela piksa tru bilong pasin bilong bihainim tok?
6. (a) Husat long nau ol i kain olsem ol Rekap? (b) Husat ol i kain olsem ol Isrel bilong bipo, em ol i bikhet?
7. (a) Jehova i mekim wanem gutpela tok promis long ol Rekap? (b) Dispela lain long nau ol i olsem ol Rekap, ol i ken bilip na wetim wanem samting?
8. Olsem wanem na planti man i hatwok long bihainim tok?
9. (a) Wanem samting i kamap na Neman i go lukim Ilaisa? (b) Em i ting Ilaisa bai mekim wanem? Tasol wanem samting i kamap?
10. (a) Orait, nau Neman i mekim wanem? (b) Bihain wanem samting i kirapim em long bihainim tok? (c) Na wanem samting i kamap?
11. (a) Olsem wanem Neman i olsem piksa bilong ol “arapela sipsip”? (b) Yumi olgeta i mas lain long mekim wanem?
12, 13. (a) Sapos yumi bihainim ol tok bilong Jehova, bilong wanem dispela bai helpim yumi? (b) Stori long dispela samting.
14. Sapos yumi no insait long pasin bilong dispela graun na yumi painim Kingdom pastaim, olsem wanem dispela inap helpim yumi?
15. (a) Sapos yu laik kamap wanpela man bilong kisim ol samting Adam i bin lusim, orait, yu mas lain long mekim wanem? (b) Long taim bilong 1,000 yia, Jehova bai givim ol tok long yumi long wanem rot?
16. Sapos yumi bihainim tok bilong ol elda long nau, dispela inap helpim yumi olsem wanem? Na olsem wanem dispela i redim yumi bilong i stap long Nupela Taim God i laik kamapim?
17. Wanem samting i mas kirapim yumi long bihainim tok?
18. Taim yumi save gut long God, yumi save ting olsem wanem long bihainim tok bilong em na oganaisesen bilong em?
[Ol Piksa long pes 135]
Sampela i mas lusim pasin antap olsem lepraman Neman i mekim