Sapta 23
Sampela Mirakel Moa Long Kaperneam
JISAS i singautim Pita na Andru na Jems na Jon, na long de Sabat bihain, olgeta i go wantaim Jisas long haus lotu bilong ol Juda long Kaperneam. Jisas i autim tok long ol manmeri na ol i kirap nogut tru, long wanem em i no lainim ol olsem ol saveman bilong lo. Em i lainim ol olsem man i gat namba.
Wanpela man i gat spirit nogut em i stap long haus lotu na em i kirap na singaut strong na em i tok: “Jisas bilong Nasaret, yu kam bilong mekim wanem long mipela? Ating yu kam bilong bagarapim mipela? Mi save long yu. Yu dispela gutpela stretpela man i kam long God yet.”
Dispela spirit nogut em i wanpela ensel bilong Satan. Jisas i krosim em na i tok: “Yu pasim maus na yu lusim dispela man.”
Dispela spirit nogut i singaut bikmaus tru na em i tromoi dispela man i go pundaun, na em i lusim dispela man, na i no bagarapim em. Olgeta manmeri i guria, na ol i toktok namel long ol yet, “Wanem samting i kamap nau? Dispela man i . . . autim tok olsem man i gat namba. Na taim em i givim tok long ol spirit nogut, ol i save harim tok bilong en.” Kwiktaim tru stori bilong dispela samting i go long olgeta hap bilong Galili.
Jisas wantaim ol disaipel i lusim haus lotu na ol i go long haus bilong Saimon, narapela nem bilong em Pita. Mama bilong meri bilong Pita i gat fiva na ol i tokim Jisas long helpim em. Jisas i holim han bilong em, na sik i lusim em. Na em i kirap na i wok long redim kaikai bilong ol!
Taim san i go daun, ol man i kisim ol sikman i kam long Jisas long haus bilong Pita. Olgeta manmeri bilong dispela taun ol i bung klostu long dua bilong haus! Jisas i mekim orait olgeta dispela sikman, maski ol i gat wanem kain sik. Na ol spirit nogut ol i lusim planti manmeri na i go olgeta. Na dispela ol spirit nogut ol i save singaut na i tokim Jisas: “Yu Pikinini Bilong God.” Tasol em i krosim ol na i no larim ol i toktok. Long wanem ol i save, em i dispela Man em God i tok long salim i kam. Mak 1:21-34; Luk 4:31-41; Matyu 8:14-17.
▪ Jisas i singautim 4-pela disaipel bilong em na taim ol i go long haus lotu long de Sabat bihain long dispela, wanem samting i kamap?
▪ Jisas i lusim haus lotu i go we? Na em i wokim wanem mirakel?
▪ Wanem samting i kamap long apinun taim san i go daun?