Jisas i Wokim Ol Mirakel Long Kaperneam

Jisas i singautim fopela disaipel em Pita, Andru, Jems, na Jon long kamap man bilong kisim ol man. Nau em de Sabat, na olgeta i go wantaim Jisas long sinagog long Kaperneam. Jisas i autim tok long sinagog, na ol manmeri i kirap nogut long pasin bilong em long skulim ol man. Em i skulim ol olsem man i gat namba na i no olsem ol saveman bilong lo.

Long dispela de Sabat, wanpela man i gat spirit nogut i kam stap long sinagog, na em i singaut strong na tok: “Jisas bilong Nasaret, yu gat wanem wok long hia? Yu kam bilong bagarapim mipela, a? Mi save yu husat tru, yu dispela Man Holi i kam long God!” Jisas i tok strong long dispela spirit nogut i kontrolim dispela man olsem: “Pasim maus, na lusim em na kam ausait!”—Mak 1:24, 25.

Taim Jisas i tok olsem, dispela spirit nogut i bikmaus na mekim dispela man i pundaun na tantanim nabaut, na em i lusim dispela man “na i no bagarapim em.” (Luk 4:35) Ol manmeri i stap wantaim Jisas long sinagog i kirap nogut! Na ol i tok: “Em wanem samting? . . . Em i givim tok long ol spirit nogut olsem man i gat namba, na ol i bihainim tok bilong en.” (Mak 1:27) Yumi ken ting olsem ol man long olgeta hap bilong Galili i harim stori bilong dispela narakain samting i bin kamap.

Jisas wantaim ol disaipel bilong em i lusim sinagog na ol i go long haus bilong Saimon, narapela nem bilong en Pita. Taim ol i go, tambu mama bilong Pita i sik nogut tru, em i kisim bikpela fiva. Olsem na ol i askim Jisas long helpim em. Jisas i go long dispela meri na holim han bilong em, na sik bilong em i pinis. Long dispela taim stret em i kamap orait na em i redim kaikai bilong ol.

Klostu long taim san i go daun, ol manmeri i bringim ol sikman i kam long haus bilong Pita. I no longtaim na klostu olgeta manmeri bilong dispela taun i kam bung long dua bilong haus. Wai na ol i kam? Ol i laik bai Jisas i oraitim sik bilong ol. ‘Ol manmeri i bringim lain bilong ol i gat kain kain sik i kam long em. Na em i putim han bilong en antap long olgeta wan wan na i oraitim ol.’ (Luk 4:40) Tru tumas, olsem Baibel i tok profet, Jisas i helpim ol dispela man maski ol i gat kain kain sik. (Aisaia 53:4) Em i rausim tu ol spirit nogut i stap long ol dispela man. Na ol dispela spirit nogut i singaut na tok: “Yu Pikinini bilong God.” (Luk 4:41) Tasol Jisas i krosim ol na em i no larim ol long toktok moa. Ol spirit nogut i save olsem Jisas em i Krais, na Jisas i no laik bai ol man i ting olsem ol spirit nogut i mekim wok bilong God tru.