I Stap na Wok Bilong Jisas
Sampela Mirakel Moa Long Kapaneam
JISAS i singautim fopela disaipel bilong pastaim, em Pita na Andru na Jems na Jon, na long de Sabat bihain long dispela, olgeta i go wantaim Jisas long haus lotu bilong ol Juda long Kapaneam. Jisas i go insait long haus lotu na em i autim tok long ol manmeri. Ol i harim tok bilong em na ol i kirap nogut tru, long wanem em i no lainim ol olsem ol saveman bilong lo. Nogat. Em i lainim ol olsem man i gat namba.
Long dispela taim wanpela man i gat spirit nogut em i stap long haus lotu. Bihain liklik em i kirap na singaut strong na em i tok: “Jisas bilong Nasaret, yu kam bilong mekim wanem long mipela? Ating yu kam bilong bagarapim mipela? Mi save long yu. Yu holiman bilong God.”
Dispela spirit nogut em lain bilong Seten. Jisas i krosim em na i tok: “Yu pasim maus na yu lusim dispela man!”
Dispela spirit nogut i singaut bikmaus tru na em i tromoi dispela man i pundaun long graun, na em i lusim em, na i no bagarapim em. Olgeta manmeri i guria, na ol i toktok namel long ol yet, “Dispela em i wanem samting? Em i wanpela nupela tok! Dispela man i gat strong, na em i givim tok long ol spirit nogut, na ol i harim tok bilong em.” Stori bilong dispela samting i ran i go kwiktaim long olgeta hap bilong Galili.
Jisas wantaim ol disaipel bilong em i lusim haus lotu na ol i go long haus bilong Saimon, narapela nem bilong em Pita. Mama bilong meri bilong Saimon i gat fiva nogut tru. Ol i tokim Jisas, ‘Plis, helpim em.’ Jisas i holim han bilong em, na fiva i lusim em. Na em i kirap na i wok long redim kaikai bilong ol!
Long apinun san i go daun, na ol man i gat wantok i gat kain kain sik, ol i bringim ol dispela sikman i kam long em long haus bilong Pita. Olgeta manmeri bilong dispela taun ol i bung klostu long dua bilong haus! Jisas i mekim orait olgeta dispela sikman. Na ol spirit nogut ol i lusim planti manmeri na i go olgeta. Na dispela ol spirit nogut ol i save singaut, na i tok: “Yu Pikinini Bilong God.” Tasol em i krosim ol na i no larim ol i toktok. Long wanem ol i save, em i Krais. Mak 1:21-34; Luk 4:31-41; Matyu 8:14-17.
◆ Jisas i singautim fopela disaipel bilong em na taim ol i go long haus lotu long de Sabat bihain long dispela, wanem samting i kamap?
◆ Jisas i lusim haus lotu na em i go we? Na em wokim wanem mirakel?
◆ Wanem samting i kamap long apinun taim san i go daun?
[Full-page picture on page 9]