1
I Gat As na Yumi Stap o Nogat?
1. Planti man i gat wanem askim long i stap bilong yumi? Wanpela man i tok wanem long dispela samting?
Planti man i save tingting: Yumi stap bilong mekim wanem? Yumi stap bilong wok strong long painim gutpela sindaun, na lukautim famili, na taim yumi winim 70 o 80 krismas yumi dai na pinis olgeta? Yumi stap bilong mekim ol dispela samting tasol? Wanpela yangpela man i tok, yumi bilong “i stap na kamapim pikinini na i stap amamas na bihain yumi dai.” Tasol yu ting dispela tok i stret? Yu ting taim yumi dai yumi pinis olgeta inap oltaim oltaim?
2, 3. Maski yumi bungim bikpela mani, bilong wanem dispela i no inap helpim yumi long i stap amamas?
2 Planti man long hap bilong Is na Wes ol i ting, yumi stap bilong bungim planti mani kago. Ol i ting, dispela bai helpim yumi long i stap amamas na bai i stap bilong yumi i gat as bilong en. Tasol olsem wanem long ol man i bungim pinis bikpela mani? Man bilong raitim buk, em Harry Bruce bilong Kanada, em i tok: “Olsem wanem na planti maniman i tok, ol i no stap amamas?” Na em i tok: “Sampela lain i skelim tingting bilong ol man na ol i tok, ol man long Not Amerika i no amamas long i stap bilong ol . . . Olsem wanem? I gat wanpela man long dispela graun em i stap amamas? Sapos i gat, orait, wanem samting i mekim na em i stap amamas?”
3 Wanpela presiden bilong Amerika bipo, em Jimmy Carter, em i bin tok: “Maski yumi gat planti samting, . . . dispela i no inapim laik bilong yumi long save tru, i gat wanem as na yumi stap. . . . Sapos man i bungim planti samting bilong skin, dispela i no inap helpim em long i stap belgut na pilim olsem i gat as na em i stap.” Na narapela bikman bilong politik i tok, “Inap planti yia pinis mi wok strong long kisim save olsem: ‘Mi stap bilong mekim wanem?’ Na mi save long planti man ol tu i laik save, ‘Yumi stap bilong mekim wanem?’ ”
Ol Hevi i Go Bikpela
4. Bilong wanem sampela i ting i no gat as na yumi stap?
4 Planti man i lukim ol hevi i kamap na ol i ting, i no gat as na yumi stap. Long olgeta hap i gat wan bilion manmeri ol i gat bikpela sik o ol i sot long kaikai. Dispela i mekim na long Afrika inap 10 milion pikinini ol i save dai long olgeta yia. I gat klostu 6 bilion manmeri long graun, na long olgeta yia i gat 90 milion moa i kamap, na klostu olgeta ol i kamap long ol kantri i no gat planti wok bisnis samting. Ol i kamap planti, olsem na ol i mas kamapim planti kaikai na haus na ol bisnis bilong wokim ol samting, tasol smok bilong ol haus faktori na marasin nogut bilong ol samting ol i wokim i bagarapim win na graun na wara.
5. Wanem samting i painim bus long olgeta hap bilong graun?
5 Wanpela nius (World Military and Social Expenditures 1991) i tok: “Long olgeta yia ol i save pinisim bikpela hap bus em inap olsem [kantri Inglan]. Sapos ol i wok long mekim yet, orait long yia 2000 bikpela hap bus bilong ol ples hat bai i pinis.” Wanpela lain bilong Yunaitet Nesen i tok, long ol dispela hap ol i save katim planti diwai, tasol ol i no save planim planti; skel bilong en i olsem: Ol i katim 10-pela diwai, tasol ol i planim wanpela tasol. Long Afrika ol i katim 20 diwai, tasol ol i planim wanpela tasol. Olsem na long olgeta yia bikpela hap graun tru i bagarap na i kamap ples wesan nating na i no inap wokim gaden moa long en.
6, 7. Wanem sampela hevi ol bikman bilong graun i no inap stretim? Olsem na yumi laik save long bekim bilong wanem askim?
6 Long taim bilong yumi, ol pait i bin bagarapim planti man moa, winim olgeta pait i bin kamap insait long 400 yia i go pinis. Long olgeta hap, pasin raskol na bagarapim man i go bikpela tru. Planti famili i bruk, na pasin bilong kisim drak na sik AIDS na ol narapela sik bilong pamuk na ol narapela samting olsem i givim bikpela hevi long ol man. Ol bikman bilong graun i no inap painim rot bilong stretim ol dispela hevi. Olsem na i gat as na ol man i laik save, yumi stap bilong mekim wanem?
7 Orait, ol saveman na ol bikman bilong lotu long bipo na i kam inap nau ol i bin bekim gut dispela askim bilong ol man o nogat?
Tok Bilong Ol
8, 9. (a) Wanpela saveman bilong Saina i tok wanem long i stap bilong yumi? (b) Wanpela man i bin i stap long banis kalabus bilong ol Natsi em i tok wanem?
8 Wanpela saveman bilong lotu Konfusas, em Tu Wei-Ming, em i tok: “Yumi stap bilong mekim ol samting olsem yumi ol man bilong graun i save mekim.” Em i ting, ol man bai wok long kamap long graun, na ol bai hatwok yet long painim ol samting bilong skin, na bihain bai ol i dai. Tasol ol man i gat kain tingting olsem, i no gat wanpela gutpela samting ol i wetim i kamap bihain—ol i wetim dai tasol. Tasol dispela tingting i stret o olsem wanem?
9 Wanpela man i bin i stap long banis kalabus nogut bilong ol Natsi long Namba 2 Pait, em Elie Wiesel, em i tok: “Wanpela bikpela askim yumi ol man i laik save long bekim bilong en i olsem: ‘Yumi stap bilong mekim wanem?’ . . . Mi ting i gat as na yumi stap, maski mi bin lukim planti man i dai na i no gat as na ol i mas i dai.” Tasol em i no save, i gat wanem as na yumi stap.
10, 11. (a) Wanpela man bilong nius i tok wanem na em i kamapim klia olsem ol man i no inap bekim gut dispela askim long i stap bilong yumi? (b) Bilong wanem tok bilong wanpela man bilong saiens i no helpim yumi?
10 Wanpela man bilong nius, em Vermont Royster, em i tok: ‘Long bipo yet na i kam inap nau, dispela askim i stap: “Yumi stap long graun bilong mekim wanem? Na wanem samting bai painim yumi long bihain?” ’
11 Wanpela saveman bilong saiens, em Stephen Jay Gould, i bilip olsem olgeta samting i kamap nating, na em i tok, ‘Ating yumi laik tru bai i gat wanpela i antap long yumi na em inap bekim dispela askim, tasol i no gat.’ Ol dispela kain man i bilip olsem: Ol strongpela man tasol i save stap longtaim liklik, na bihain ol tu i save dai na em tasol. Tasol sapos olsem, bai i no gat wanpela gutpela samting yumi ken wetim i kamap long bihain, a? Yu ting dispela tingting i stret?
12, 13. Sampela bikman bilong lotu i gat wanem tingting long dispela? Tingting bilong ol i winim tingting bilong ol narapela man?
12 Planti lotu i save tok, yumi stap bilong bihainim gutpela pasin, na taim yumi dai bai tewel bilong yumi i ken i go antap long heven. Na ol i tok, ol man nogut i go long bikpaia na karim pen oltaim oltaim. Ol man i holim dispela kain bilip ol i ting ol samting bai stap olsem tasol long graun—ol man bai wok yet long karim pen na hevi. Tasol sapos tru God i laik bai ol man i stap long heven olsem ol ensel, bilong wanem pastaim em i no bin wokim ol olsem ol ensel?
13 Sampela pris pasto tu i gat tupela tingting long dispela bilip. Wanpela man bipo em i bosim ol pris long bikpela haus lotu (St. Paul) long Landon, em W. R. Inge, em i tok, ‘Taim mi yangpela yet na i kam inap nau mi laik save, yumi stap bilong mekim wanem? Mi laik save long as bilong 3-pela bikpela samting, olsem: laip oltaim oltaim; pasin bilong ol man bilong graun; pasin nogut. Mi wok strong long kisim dispela save, tasol nogat.’
Kain Kain Tingting
14, 15. Ol dispela kain kain tingting i mekim wanem long ol man?
14 Ol saveman na ol bikman bilong lotu i gat kain kain tingting long i stap bilong yumi, olsem na planti man i mekim wankain tok olsem wanpela lapun, em i tok: “Inap planti yia pinis mi wok long askim, ‘Mi stap bilong mekim wanem?’ Tasol nau mi no tingim moa dispela samting.”
15 Em nau, ol dispela kain kain tingting bilong ol lotu i mekim na planti man i ting, maski yumi bilip long wanem samting—em i no bikpela samting. Ol i ting lotu em i samting bilong helpim tingting bilong man long i stap isi na mekim gut bel bilong em na bai em i ken karim ol hevi bilong graun. Na sampela i ting lotu i olsem bilip nating bilong ol tumbuna. Ol i ting ol lotu i no bin helpim ol man long save, ol i stap bilong mekim wanem, na ol lotu i no bin helpim sindaun bilong ol man. Long bipo na i kam inap nau, ol lotu bilong graun i as bilong planti pasin birua na bikpela pait.
16. Bilong wanem i bikpela samting long painim bekim tru bilong dispela askim, ‘I gat wanem as na yumi stap?’
16 Tasol olsem wanem? Em i bikpela samting long yumi mas save, i gat wanem as tru na yumi stap? Wanpela man bilong stretim sik bilong tingting, em Viktor Frankl, em i bekim dispela askim na em i tok: “Wanpela strongpela tingting i stap long bel bilong ol man, olsem: Ol i laik save, i gat wanem as na ol i stap. . . . Sapos ol inap save tru long dispela samting, dispela bai helpim ol long karim olgeta kain hevi i painim ol.”
17. Orait, i gat wanem ol askim nau yumi mas mekim?
17 Ol saveman na ol bikman bilong lotu i no bin tokim yumi, i gat wanem as tru na yumi stap. Orait yumi laik save, i gat wanpela Man i stap na em i gat bikpela save moa, winim yumi ol man, na em inap tokim yumi tru long dispela samting?
Ol tok bilong Baibel long dispela liklik buk, ol i bin kisim long Buk Baibel (1989), tasol sampela tok ol i kisim long ol narapela Baibel na ol i raitim nem bilong Baibel bihain long en.
[Piksa long pes 4]
“Long olgeta yia ol i save pinisim bikpela hap bus em inap olsem [kantri Inglan]”
[Piksa long pes 5]
Inap planti yia pinis mi wok long askim, ‘Mi stap laip bilong mekim wanem?’ ”