Kingdom Nius No. 34
Bilong Wanem Yumi Gat Planti Hevi?
Yu ting wanpela paradais i no gat ol hevi long en inap kamap?
BILONG WANEM OL BIKPELA HEVI I KAMAP MOA NOGUT?
Ol hevi i no nupela samting long ol man. Maski planti man i bin ting olsem ol kain kain samting ol saveman i wokim long nau inap stretim ol hevi, ol bikpela hevi i kamap moa nogut.
Pasin Raskol: Planti man i no save stap bel isi taim ol i wokabaut long rot o taim ol i stap long haus bilong ol. Long wanpela yia i go pinis long wanpela kantri long Yurop, ol pasin raskol i bin mekim nogut long wanpela bilong olgeta 3-pela 3-pela man.
Win, Wara, Graun: Nau long planti kantri win na wara na graun i bagarap. Long ol kantri i stap rabis liklik, inap 25 pesen bilong ol manmeri i no gat klinpela wara.
Stap Rabis: I no gat narapela taim bipo olsem nau na planti manmeri i stap rabis na ol i hangre. Long sampela kantri winim 90 pesen bilong ol manmeri i stap rabis; 800 milion manmeri (30 pesen) bilong olgeta hap, ol i no gat wok mani o ol i gat liklik wok mani tasol, na dispela namba i wok long go antap.
Hangre: Maski yu gat kaikai, planti milion manmeri i no gat kaikai, na dispela namba i wok long go bikpela. Long olgeta yia long ol kantri i stap rabis, inap 13 milion manmeri, na planti bilong ol em ol pikinini, ol i dai long hangre.
Pait: Planti handet tausen man i bin dai long ol pait nogut nau tasol ol i kamap namel long ol lain. Na kirap long yia 1900 i kam inap long nau, winim wan handet milion manmeri i bin dai long ol pait.
Ol Narapela Hevi: Na i no ol dispela hevi tasol, nogat; nau planti famili i bruk, planti meri moa i no marit na ol i karim nating pikinini, planti man moa i no gat ples slip, long planti hap ol man i kisim drak, na planti i mekim olkain pasin pamuk. Olsem na tok bilong wanpela man i stret, em bipo em i mekim wok long gavman long Amerika. Em i tok: ‘I gat planti samting i makim olsem sindaun bilong ol man i bagarap pinis.’ Insait long 30 yia, namba bilong ol man long Amerika i go antap olsem 41 pesen, tasol pasin raskol i go antap olsem 560 pesen, pamuk na kamapim nating pikinini i go antap olsem 400 pesen, katim marit i go antap olsem 300 pesen, ol yangpela i kilim i dai ol yet i winim 200 pesen. Na wankain hevi i stap long ol narapela kantri.
Bilong Wanem Ol Hevi i Go Bikpela Moa?
Man bilong wokim yumi i bekim dispela askim. Tok bilong em long Baibel i tok, yumi stap long “taim bilong las de” i gat “planti hevi nogut tru” i stap long en. (2 Timoti 3:1) Em las de bilong wanem samting? Baibel i tok, “dispela graun i laik pinis.”—Matyu 24:3.
Ol bikpela hevi i kamap long nau i makim klia olsem dispela pasin nogut bilong nau wantaim ol man i kamapim pasin nogut, klostu i laik pinis. (Matyu 24:3-14; 2 Timoti 3:1-5; KTH 12:7-12) Klostu nau God bai mekim sampela samting na pinisim tru olgeta hevi i save painim ol man long nau.—Jeremaia 25:31-33; KTH 19:11-21.
OL LOTU I PUNDAUN LONG MEKIM WOK BILONG OL
Ol lotu i no save helpim ol man long stretim ol hevi, nogat; ol i mekim na ol hevi i go bikpela moa. Long taim bilong pait, Katolik i kilim i dai Katolik na Talatala i kilim i dai Talatala—planti milion manmeri i bin dai. Klostu olgeta man long Ruanda i bilong misin Katolik, na i no longtaim i go pinis na narapela i kirap na kilim i dai narapela—planti handet tausen i dai! (Lukim piksa long han kais.)
Yu ting Jisas bai holim gan o bainat na go long pait na kilim i dai ol disaipel bilong em, long wanem, ol i bilong narapela lain? Nogat tru! Baibel i tok: “Man i save laikim tru God, em i mas laikim tru ol arapela manmeri bilong God.” (1 Jon 4:20, 21) Ol lotu i lus tru long mekim olsem. “Maus bilong ol i save tok olsem, ‘Mi save long God.’ Tasol pasin bilong ol i soim olsem, ol i givim baksait pinis long em.”—Taitus 1:16.
Na ol misin yet i no bihainim tru ol stretpela lo bilong Baibel, olsem na nau planti man long olgeta hap i lusim pinis stretpela pasin.
Jisas i kolim rot bilong yumi ken save wanem lotu i tru na wanem lotu i giaman—em “pasin” ol man i insait long lotu i save mekim. Na em i tok moa: “Olgeta diwai i no save karim gutpela kaikai, em ol i save katim na tromoi i go long paia.” (Matyu 7:15-20) Baibel i tok, yumi mas lusim ol lotu i save karim kaikai nogut, na God bai bagarapim ol.—KTH 18:4.
Lotu i Tru i No Pundaun Long Mekim Wok Bilong En
Lotu i tru i save kamapim “gutpela kaikai,” olsem pasin sori. (Matyu 7:17; Jon 13:34, 35) Wanem lain Kristen i stap olsem brata brata long olgeta hap i save kamapim dispela kain sori? Wanem lain i no save kilim i dai ol wanlotu bilong ol o ol narapela man?—1 Jon 3:10-12.
Ol Witnes Bilong Jehova i gat nem olsem man bilong kamapim dispela “gutpela kaikai.” Long olgeta hap, winim 230 kantri, ol i ‘paitim pinis ol bainat bilong ol i kamap olsem ol ain bilong brukim graun.’ (Aisaia 2:4) Ol i bihainim tok bilong Krais long autim “gutnius” bilong Kingdom bilong God long olgeta hap, na long dispela rot ol i soim olsem ol i laikim tru ol man. (Matyu 24:14) Na tu, ol i tokaut long ol stretpela lo bilong Baibel, na ol yet i save bihainim.—1 Korin 6:9-11.
Tru tumas, lotu i tru i no pundaun liklik long mekim wok bilong en. Em i save stiaim ol man i go long dispela wanpela Man em inap tru long stretim olgeta hevi. Klostu nau dispela Man bai kamapim nupela taim. Dispela Man em i husat? (Lukim pes long baksait.)
PARADAIS I NO GAT OL HEVI BAI KAMAP
Sapos yu gat strong long stretim olgeta hevi long dispela graun, bai yu mekim? Yes, bai yu mekim! Olsem na yumi ken save, gutpela Man bilong wokim yumi, em tasol i gat strong na save bilong stretim ol hevi, na em bai mekim olsem.
Baibel i tok, long rot bilong gavman bilong em long heven long han bilong Krais Jisas, em bai mekim sampela samting bilong helpim ol man. Dispela Kingdom bai “bagarapim” ol gavman nogut bilong dispela graun. (Daniel 2:44; Matyu 6:9, 10) Bilong wanem em bai mekim olsem? Man bilong raitim Song i toktok long God olsem: “Bai ol i ken save tru, yu wanpela tasol, yu Bikpela, [nem bilong yu Jehova, NW] na yu God Antap Tru, na yu save bosim olgeta hap bilong graun.”—Song 83:18.
Olsem wanem? Taim dispela pasin nogut bilong nau i pinis, sampela man bai abrusim bagarap? Baibel i tok: “Dispela graun bai i pinis . . . tasol man i bihainim tok bilong God, em bai i stap oltaim.” (1 Jon 2:17) Ol dispela man i abrusim bagarap bai stap we inap oltaim? Baibel i tok: “Ol stretpela man bai i kisim graun God i givim ol, na bai ol i stap oltaim long en.”—Song 37:9-11, 29; Sindaun 2:21, 22.
Long dispela nupela taim God bai kamapim, ol manmeri “bai i no i dai moa, na ol bai i no bel hevi moa na krai moa, na ol bai i no inap kisim pen gen.” (KTH 21:4) Pasin raskol bai pinis, na ol man i no ken i stap rabis moa, na hangre, sik, bel hevi, dai—olgeta bai pinis! Na ol man i dai pinis ol bai kirap bek na stap laip gen! God bai “kirapim bek ol man i dai pinis.” (Aposel 24:15) Na graun bai senis na kamap paradais.—Aisaia 35:1, 2; Luk 23:43, NW.
Yumi mas mekim wanem bilong i stap laip long nupela taim God bai kamapim? Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Planti milion manmeri long olgeta hap na ol i gat gutpela bel, ol i wok long kisim dispela save. Dispela save i helpim ol long karim ol hevi bilong ol long nau, na bikpela samting, em i strongim bel bilong ol long wetim nupela taim God bai kamapim na bai ol dispela hevi bilong ol i ken pinis.
[Piksa Kredit Lain long pes 2]
WHO photo by P. Almasy
[Piksa Kredit Lain long pes 3]
Jerden Bouman/Sipa Press