Stadi 10
Ol Pasin God i Nolaik Tru Long En
Yu mas ting olsem wanem long ol samting God i tok em i nogut? (1)
Wanem kain pasin sem i nogut tru? (2)
Kristen i mas i gat wanem tingting long tok giaman? (3) pilai laki? (3) stil? (3) pait? (4) marila posin samting? (5) dring spak? (6)
Man i ken lusim pasin nogut olsem wanem? (7)
1. Ol wokman bilong God i laikim tru gutpela pasin. Tasol ol i mas lain tu long nolaik tru long pasin nogut. (Song 97:10) Olsem na ol i mas abrusim ol pasin God i nolaik tru long en. Wanem sampela pasin olsem?
2. Pasin Pamuk: Mekim maritpasin taim man o meri i no marit yet, man o meri marit i slip wantaim wanpela i no poroman marit bilong em, goapim animal, mekim maritpasin wantaim wanblut, pasin sodom, em ol bikpela sin long ai bilong God. (Wok Pris 18:6; Rom 1:26, 27; 1 Korin 6:9, 10) Sapos man na meri i sindaun wantaim na ol i no marit tru, orait tupela i mas bruk na sindaun long narapela narapela hap o ol i mas marit long pasin i stret long gavman.—Hibru 13:4.
3. Tok Giaman, Pilai Laki, Stil: God Jehova i no inap giaman. (Taitus 1:2) Ol man i laik bai God i orait long ol, ol i no ken giaman. (Sindaun 6:16-19; Kolosi 3:9, 10) Ol kain kain pilai laki i save kirapim man long mangal. Olsem na ol Kristen i no insait long ol kain kain pilai laki, olsem loto, hosres, bingo samting. (Efesus 5:3-5) Na ol Kristen i no save stil. Ol i no baim ol samting ol i save ol man i bin stilim, na ol i no save kisim nating samting bilong narapela man, nogat; ol i askim em pastaim.—Kisim Bek 20:15; Efesus 4:28.
4. Kros, Pait: Sapos man i no daunim kros, ating bihain bai em i pait na bagarapim narapela. (Stat 4:5-8) Man bilong pait i no inap kamap pren bilong God. (Song 11:5, NW; Sindaun 22:24, 25) I no stret man i bekim rong o mekim nogut long man i mekim nogut long em.—Sindaun 24:29; Rom 12:17-21.
5. Marila Posin na Wok Bilong Ol Spirit Nogut: Sampela man i save singautim ol spirit long oraitim sik. Sampela i save wokim posin bilong givim sik long ol birua bilong ol o bilong kilim ol i dai. Satan em i as bilong ol dispela pasin. Olsem na ol Kristen i no ken insait long ol dispela pasin. (Lo 18:9-13) Yumi mas i stap klostu long Jehova—dispela inap lukautim yumi tru sapos ol narapela i wokim posin bilong bagarapim yumi.—Sindaun 18:10.
6. Dring Spak: I no gat rong sapos man i dring liklik wain o bia samting. (Song 104:15; 1 Timoti 5:23) Tasol pasin bilong dring planti na spak em i no stret long ai bilong God. (1 Korin 5:11-13; 1 Timoti 3:8) Sapos yu dring planti dispela inap long bagarapim helt bilong yu na famili bilong yu. Em inap mekim na yu hatwok long sakim sampela narapela traim.—Sindaun 23:20, 21, 29-35.
7. Man i save mekim ol pasin God i tok ol i pasin nogut, dispela man “i no inap i go insait long kingdom bilong God.” (Galesia 5:19-21) Sapos yu laikim tru God na yu laik mekim pasin em i laikim, orait yu inap lusim ol dispela pasin. (1 Jon 5:3) Sapos God i tok samting em i nogut, yu mas lain long sakim tru dispela samting. (Rom 12:9) Poroman wantaim ol man i bihainim ol pasin bilong God. (Sindaun 13:20) Ol strongpela poroman Kristen inap helpim yu tru. (Jems 5:14) Bikpela samting tru, yu mas bilip strong olsem God bai helpim yu taim yu prea long em.—Filipai 4:6, 7, 13.
[Ol Piksa long pes 20, 21]
God i nolaik tru long pasin bilong dring spak, stil, pilai laki, na pait