Stadi 14

Ol Pren Bilong God i Mas Sakim Ol Pasin i No Stret

Satan i save traim ol manmeri long mekim pasin i no stret. Man i laik stap pren bilong God em i mas nolaik tru long ol samting Jehova i nolaik tru long en. (Song 97:10) Em hia sampela samting ol pren bilong God i mas sakim:

Pasin Pamuk. “Yupela i no ken mekim pasin pamuk.” (Kisim Bek 20:14) Sapos man o meri i mekim maritpasin taim ol i no marit yet dispela tu i wanpela rong.​—⁠1 Korin 6:⁠18.

Dring Spak. “Man i save spak . . . bai i no inap i go insait long kingdom bilong God.”​—⁠1 Korin 6:⁠10.

Kilim Man i Dai, Rausim Bel. “Yupela i no ken kilim i dai ol arapela manmeri.”​—⁠Kisim Bek 20:⁠13.

Stil. “Yupela i no ken stil.”​—⁠Kisim Bek 20:⁠15.

Giaman. Jehova i nolaik tru long “pasin bilong mekim tok giaman.”​—⁠Sindaun 6:⁠17.

Pait na Pasin Bilong Belhat. “[ Jehova] i no laikim tru ol man i laikim pasin pait.” (Song 11:​5, NW ) “Pasin bilong olpela bel [em ol kain pasin olsem] . . . belhat na kros.”​—⁠Galesia 5:​19, 20.

Pilai Laki. Yupela i no ken i stap wantaim man i save “mangal long ol samting bilong ol arapela man.”​—⁠1 Korin 5:⁠11.

Bel Nogut Long Ol Man Bilong Narapela Skin na Lain. “Yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela.”​—⁠Matyu 5:​43, 44.

Ol samting God i tokim yumi long en em i bilong helpim yumi. Sampela taim i hatwok long abrusim ol pasin nogut. Jehova na ol Witnes bilong em ol inap helpim yu long abrusim ol samting God i no amamas long en.​—⁠Aisaia 48:17; Filipai 4:13; Hibru 10:​24, 25.