Jehova—Em i Husat?

INAP wan handet yia samting bipo, wanpela man bilong Frans, em Henri Mouhot, em i bin raun bilong painim ol nupela samting. Wanpela taim em i brukim bus long Kambodia na em i kamap long wanpela haus lotu i gat wanpela bikpela baret wara i banisim. Ol i kolim dispela haus lotu olsem Anko Wat, na long olgeta haus lotu kain olsem i stap long graun, i no gat wanpela i bikpela olsem. Mouhot i luksave olsem ol banis samting bilong en ol grinpela mosong i karamapim, em ol man yet i bin wokim. Em i tok: ‘Ating wanpela man i gat bikpela save olsem bilong Maikelangelo bilong bipo em i bin wokim dispela haus, na em i gutpela moa, winim olgeta olpela haus bilong bipo em ol Grik na Rom i bin wokim na ol i sanap yet.’ Ol man i bin lusim dispela haus lotu inap sampela handet yia pinis, tasol Mouhot i save tru olsem wanpela man i bin wokim dispela gutpela haus wantaim ol traipela taua samting bilong en.

Wanpela buk ol i bin raitim planti handet handet yia i go pinis, em tu i kamapim wankain tingting na em i tok: “Olgeta wan wan haus i gat man i bin wokim em. Tasol God i bin wokim olgeta samting.” (Hibru 3:⁠4) Ating sampela man inap tok, ‘Wok bilong ol samting bilong graun yet, em i narapela kain long samting ol man i bin wokim.’ Tasol i no olgeta saveman bilong saiens i wanbel long dispela tok.

Michael Behe, em wanpela profesa bilong Yunivesiti Lehai, long Pensilvenia, Amerika, em i tok: ‘Olsem wanem? Wanpela man i gat save em inap wokim ol liklik binatang samting i wok wantaim na i mekim olgeta samting bilong graun i wok gut?’ Em i mekim sampela tok moa bilong soim olsem, long nau wanpela kain wok i helpim ol saientis long wokim sampela senis long ol liklik liklik samting i gat laip. Yes, ol saientis inap “wokim” [olsem senisim] ol samting i gat laip na ol samting i no gat laip! Behe i skelim ol liklik liklik samting i gat laip, olsem sel, na em i luksave olsem ol dispela samting i mas wok gut wantaim bambai ol inap mekim wok bilong ol. Orait, Behe i tok wanem long dispela? Em i tok: ‘Mi wok strong long kisim save long wok bilong ol sel​—⁠em ol liklik liklik samting long skin i gat laip long en​—⁠na i olsem dispela save mi bin kisim i tokaut klia olsem, “Wanpela Man i bin wokim!” ’

Husat em i Man bilong wokim ol dispela samting i narakain tru?

Husat Em i Man Bilong Wokim Olgeta Samting?

Bekim bilong dispela askim em i stap long dispela buk bilong bipo bipo yet i gat ol gutpela tingting na save long en em pastaim yumi bin stori long en​—⁠em Baibel. Namba wan tok bilong en i bekim klia tru dispela askim olsem husat i bin wokim olgeta samting. Em i tok: “Bipo, bipo tru God i mekim kamap skai na graun.”​—⁠Stat 1:⁠1.

Bilong kamapim olsem em i narapela kain long ol narapela i tok ol i God, Man bilong wokim olgeta samting em i kamapim nem bilong em: “God, Bikpela [“Jehova,” NW ] i bin wokim skai na graun . . . Na em i mekim graun i kamapim ol kain kain diwai na gras samting. Em i givim win bilong laip long ol manmeri bilong graun.” (Aisaia 42:​5, 8) Jehova em i nem bilong dispela God i bin wokim ples antap na graun na em i wokim ol man na meri long graun. Tasol Jehova em i husat? Em i wanem kain God? Na bilong wanem yu mas harim tok bilong em?

Nem Bilong Em i Makim Wanem Samting?

Pastaim yumi laik save wanem insait bilong dispela nem Jehova, em Man bilong wokim yumi? Dispela nem holi ol i raitim long tok Hibru long 4-pela leta olsem (יהוה), na em i kamap 7,000 taim long hap bilong Baibel ol i bin raitim long tok Hibru. Ol saveman i ting dispela nem i wankain liklik olsem wanpela tok Hibru, em ha·wahʹ (“em i kamap”) olsem na insait bilong en i olsem “Em i Mekim i Kamap.” Yumi ken tok olsem Jehova yet i kamap wanem wanem kain em i laikim bambai em i ken kamapim laik bilong em. Em i kamap Man bilong wokim olgeta samting, na Jas, na Man bilong kisim bek ol man, na Man bilong helpim olgeta samting long i stap laip, na kain man olsem, bambai em i ken truim ol tok promis bilong em. Yes, em i wanpela God i gat laip!

Ol Bikpela Pasin Bilong Jehova

Baibel i kamapim olsem Man bilong wokim yumi em i save truim ol tok promis bilong em, em i wanpela man i gat gutpela pasin tru. Jehova yet i kamapim ol pasin bilong em i makim em i narapela kain. Em i tok: “Jehova, Jehova, em i God bilong marimari na sori, na em i no save belhat kwik; em i save laikim tru ol manmeri na em i save tok tru oltaim, na em i save mekim gutpela pasin sori long planti tausen manmeri, na lusim rong na asua na sin bilong ol.” (Kisim Bek 34:​6, 7, NW ) Jehova em i God bilong laikim tru ol man. Long tok Hibru dispela tok “laikim tru” yumi ken tanim tu olsem “laikim tru wanpela man na stap gut long em.” Taim Jehova i kamapim laik bilong em, em i wok yet long kamapim pasin sori long ol manmeri. Yumi amamas long dispela kain pasin sori, a?

Jehova i no save belhat kwik, na em i save hariap long lusim ol rong bilong yumi. Taim yumi pas wantaim wanpela man em i no save painim asua long yumi, tasol em i redi long lusim ol rong bilong yumi, dispela i mekim gut bel bilong yumi. Tasol dispela i no makim olsem Jehova i save orait long man i mekim rong. Em i tokaut olsem: “Mi save laikim stretpela pasin tasol. Mi no save laikim pasin bilong stil na pasin bilong mekim nogut long ol arapela [olsem ol pasin i no stret].” (Aisaia 61:⁠8) Em i God bilong laikim stretpela pasin tasol, olsem na ol sinman i strong long bihainim pasin nogut bilong ol, em i no inap larim ol i mekim olsem long olgeta taim, nogat. Olsem na yumi save, long taim em i makim Jehova bai stretim ol samting i no stret em ol man i mekim.

Bilong bihainim pasin sori na stretpela pasin tu, man i mas i gat gutpela tingting. Jehova i save bihainim gut dispela tupela pasin taim em i mekim sampela samting long yumi. (Rom 11:​33-​36) Tru tumas, long olgeta hap yumi inap lukim gutpela tingting na save bilong em. Ol gutpela samting i stap long ples antap na graun i kamapim bikpela save bilong em.​—⁠Song 104:24; Sindaun 3:​19.

Tasol gutpela tingting na save tasol i no inap. Bilong kamapim samting em i tingting long mekim, Man bilong wokim yumi i mas i gat bikpela strong tu. Baibel i kamapim olsem God i gat bikpela strong: ‘Yupela lukluk i go antap long skai na lukim ol sta i stap antap. Husat i bin wokim ol? Em Bikpela tasol. Em i save long namba bilong ol, na em i save long nem bilong wan wan bilong ol. Em i gat olgeta strong, olsem na i no gat wanpela bilong ol inap lus.’ (Aisaia 40:26) Jehova i gat “olgeta strong” olsem na em i save mekim tru ol wok bilong em. Ating dispela kain pasin bilong em bai kirapim yu long laikim em tru, a?

Ol Gutpela Samting Yu Kisim Taim Yu Save Long Jehova

Jehova “i no wokim graun bilong i stap nating. Nogat.” Em i wokim bilong ol man i pas gut wantaim em ol i ken i stap long en. (Aisaia 45:18; Stat 1:​28) Em i save tingim tru ol manmeri em i bin wokim ol. Long pastaim tru em i givim wanpela gutpela gaden long ol man​—⁠em wanpela paradais. Tasol ol manmeri i wok long bagarapim graun, na Jehova i no amamas liklik long dispela. Tasol olsem nem bilong em i makim, Jehova bai strong long kamapim laik bilong em bilong pastaim tru long ol man na dispela graun na inapim tru. (Song 115:16; KTH 11:18) Em bai kamapim bek Paradais long graun na givim long ol man i stap olsem pikinini bilong em i bihainim tok.​—⁠Sindaun 8:​17; Matyu 5:⁠5.

Laspela buk bilong Baibel i stori long gutpela sindaun yu inap kisim long dispela Paradais, olsem: “Em bai i mekim drai wara i stap long ai bilong olgeta bilong ol. Na ol manmeri bai i no dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:​3, 4) Dispela em i laip tru Jehova i laik bai yu ken kisim. Jehova em i gutpela Papa tru bilong mekim gut long yumi! Yu laik kisim save moa long em na ol samting yu mas mekim bambai yu inap i stap long dispela Paradais?

Ol tok bilong Baibel long dispela liklik nius mipela i bin kisim long Buk Baibel bilong 1996; tasol taim mipela i kisim long Baibel Inglis New World Translation of the Holy Scriptures na tanim long tok Pisin, mipela i putim NW bihain long en.