Husat i As Bilong Ol Dispela Samting?

INAP wan handet yia samting bipo, wanpela man bilong Frans, em Henri Mouhot, em i bin raun bilong painim ol nupela samting. Wanpela taim em i wokabaut insait long bus bilong Kambodia na em i kamap long wanpela haus lotu i gat wanpela bikpela baret wara i banisim. Dispela haus lotu i stap olsem wanpela kilomita longwe long ples dispela man i sanap long en, na 5-pela longpela taua bilong en i go antap tru inap olsem 60 mita. Ol i kolim dispela haus olsem Anko Wat, na long olgeta haus lotu kain olsem dispela i stap long graun, i no gat wanpela i bikpela olsem. Taim Mouhot i painim dispela haus insait long bus, haus hia i bin sanap inap olsem 700 yia pinis, maski bikpela san na ren na win samting i bin mekim save long en.

Mouhot i luksave olsem ol banis samting bilong en ol grinpela mosong i karamapim, em ol man yet i bin wokim. Em i tok: ‘Ating wanpela man i gat bikpela save olsem bilong Maikelangelo bipo em i bin wokim dispela haus, na em i gutpela moa, winim olgeta olpela haus bilong bipo em ol Grik na Rom i bin wokim na ol i sanap yet.’ Ol man i bin lusim dispela haus lotu inap sampela handet yia pinis, tasol Mouhot i save tru olsem wanpela man i bin wokim dispela gutpela haus wantaim ol traipela taua samting bilong en.

Wanpela buk ol i bin raitim planti handet handet yia i go pinis, em tu i kamapim wankain tingting taim em i stori long olsem wanem i mas i gat wanpela Man i bin wokim dispela graun yumi stap long en. Dispela graun i mas i gat Man bilong wokim. Aposel Pol i tok: “Olgeta wan wan haus i gat man i bin wokim em. Tasol God i bin wokim olgeta samting.” (Hibru 3:⁠4) Ating sampela man i no wanbel long dispela tok, na ol i tok: “Pasin bilong ol samting bilong graun long mekim wok, em i narapela kain long samting ol man yet i bin wokim.” Tasol i no olgeta saveman bilong saiens i wanbel long dispela tok. Michael Behe, em wanpela profesa long Yunivesiti Lehai, em i tok, ol liklik liklik binatang samting i save mekim graun na olgeta samting i gat laip i wok gut, ol i no olsem samting i no gat laip long en, nogat. Na em i tok moa olsem: ‘Olsem wanem? Wanpela man i gat save em inap wokim ol liklik binatang samting i wok wantaim na i mekim olgeta samting bilong graun i wok gut?’ Em i mekim sampela tok moa bilong soim olsem, long nau wanpela kain wok i helpim ol saientis long wokim sampela senis long ol liklik liklik binatang i stap insait long graun na wara samting. Olsem na yumi save, long nau ol saientis inap kamapim sampela senis long ol samting i gat laip. Behe i tingim ol liklik liklik samting i gat laip, olsem sel, na em i stori long ol kain samting olsem, na ol liklik liklik hap bilong ol dispela samting i mas wok gut wantaim bambai ol inap mekim wok bilong ol. Orait Behe i tok wanem long dispela? Em i tok: ‘Mi wok strong long kisim save long wok bilong ol sel​—⁠em ol liklik liklik samting long skin i gat laip long en​—⁠na i olsem dispela save mi bin kisim i tokaut klia olsem, “Wanpela Man i bin wokim!” ’

Ol saveman bilong ol samting long ples antap na long graun ol tu i bin wok strong long skelim ol samting bilong graun na bilong ples antap, na ol i kisim sampela save ol i kirap nogut long en. Olsem: Nau ol i save pinis, sapos i gat sampela liklik senis tru i bin kamap na i senisim mak o lo i bosim ol samting bilong ples antap na graun, bai i no gat wanpela samting i stap laip long en.a Saveman Brandon Carter i tok, dispela samting i kamap nating tasol, olsem na yumi kirap nogut long en. Tasol sapos yu lukim planti samting i kamap na yu no save long as bilong en, na yu lukim narapela i wok stret wantaim narapela, ating bai yu tingting olsem wanpela man i as bilong ol dispela samting i bin kamap, a?

Tru tumas, i gat wanpela Man i bin wokim olgeta dispela samting bilong ples antap na graun, na ol i wok stret olgeta. Husat dispela Man? Profesa Behe i tok, sapos yumi laik kisim save long dispela man long rot bilong ol wok saiens, bai yumi hatwok stret. Behe i larim ‘ol saveman bilong graun na ol tisa bilong lotu’ i painim bekim bilong dispela askim. Ating bai yu ting olsem dispela i no wanpela samting yu mas tingim. Tasol sapos yu bin kisim wanpela mekpas em ol i bin karamapim naispela pepa long en, na insait long en i gat ol samting yu sot long en na yu mas kisim, ating yu laik save, husat i bin salim dispela samting i kam long yu, a?

Orait yumi ken tok olsem yumi bin kisim wanpela kain mekpas olsem, i gat ol gutpela gutpela presen i pulap long en, na ol dispela presen ol inapim yumi long i stap laip na kisim amamas long en. Mekpas hia em dispela graun, em i gat ol gutpela gutpela samting long en bilong helpim olgeta samting long i stap laip. Orait yumi mas i gat laik long save husat i bin givim ol dispela presen long yumi, a?

Gutpela tru, Man bilong salim dispela mekpas i kam, em i bin raitim wanpela pas na pasim long en. Dispela “pas” em dispela buk bilong bipo yet i gat ol gutpela tingting na save long en, em pastaim yumi bin stori long en​—⁠em Baibel. Namba wan tok bilong en i bekim klia tru dispela askim olsem husat i bin givim dispela mekpas long yumi: “Bipo bipo tru God i mekim kamap skai na graun na olgeta samting i stap long en.”​—⁠Stat 1:⁠1.

Long “pas” bilong em, Man bilong wokim olgeta samting em i kamapim nem bilong em: “God, Bikpela [“Jehova,” NW] i bin wokim skai na graun . . . Na em i mekim graun i kamapim ol kain kain diwai na gras samting. Em i givim win bilong laip long ol manmeri bilong graun.” (Aisaia 42:⁠5) Em nau, Jehova em i nem bilong dispela God i bin wokim ples antap na graun na em i wokim ol man na meri long graun. Tasol Jehova em i husat? Em i wanem kain God? Bilong wanem olgeta manmeri bilong graun i mas harim tok bilong em?

[Futnot]

[Piksa long pes 3]

Ol man yet i bin wokim Anko Wat

[Piksa long pes 4]

Taim yu kisim wanpela presen, yu laik save husat i bin salim i kam, a?