Stadi 4
Rot Bilong Kisim Save Long God
Yu inap kisim save long Jehova taim yu kaunim Baibel. Long bipo yet God i makim sampela man long raitim ol tok bilong em. Ol dispela tok ol i raitim i stap long Baibel. Long nau yumi ken kisim save long God taim yumi kaunim Baibel. Ol tok bilong Jehova i stap long Baibel, olsem na yumi kolim tu olsem Tok Bilong God. Yumi ken bilip long ol tok bilong Baibel, long wanem, Jehova i no save giaman. “God i no inap tru long giaman.” (Hibru 6:18) Tok Bilong God em tok i tru.—Jon 17:17.
Baibel em i wanpela gutpela presen tru God i givim long yumi. Em i olsem wanpela pas wanpela gutpela papa i salim long ol pikinini bilong em. Em i tokim yumi long tok promis bilong God long mekim dispela graun i kamap wanpela gutpela ples bilong i stap long en—wanpela paradais. Em i tokim yumi long ol samting God i bin mekim long bipo, ol samting em i mekim long nau, na ol samting em bai mekim long bihain bilong helpim ol gutpela pikinini bilong em. Na tu, em i helpim yumi long stretim ol hevi bilong yumi na long kisim amamas.—2 Timoti 3:16, 17.
Ol Witnes Bilong Jehova i pren bilong God; ol bai helpim yu long save long ol samting Baibel i skulim ol man long en. Tokim ol olsem yu laik stadi long Baibel. Ol i no makim pe bilong dispela stadi. (Matyu 10:8) Na tu, yu ken go long ol miting Kristen. Ol dispela miting i kamap long ol haus bilong lotu ol i kolim Haus Kingdom. Taim yu go long ol miting Kristen, kwiktaim save bilong yu long God bai i go bikpela.
Taim yu lukim ol samting God i bin wokim yu inap kisim save long God. Baibel i tok: “God i mekim kamap skai na graun na olgeta samting i stap long en.” (Stat 1:1) Taim Jehova i wokim “skai,” em i wokim san. Orait, dispela samting i givim wanem tingting long yumi long God? Em i givim tingting long yumi olsem Jehova i gat bikpela strong. Jehova tasol inap wokim ol strongpela samting olsem san. Na tu, dispela i kamapim long yumi olsem Jehova i gat gutpela tingting na save. Bilong wokim san, man i mas i gat gutpela tingting na save. San i save givim hat na lait long yumi, na strong bilong en i no save pinis.
Ol samting Jehova i wokim i kamapim olsem em i laikim yumi. Tingim ol kain kain prut i stap long graun. Jehova inap givim wanpela kain prut tasol long yumi—o ating em i no inap givim wanpela long yumi. Tasol Jehova i givim kain kain prut long yumi na sampela i bikpela na sampela i liklik, na ol i gat narapela narapela kala na swit. Dispela i kamapim long ples klia olsem Jehova em i save laikim ol man, na tu, em i man bilong givim planti samting, na em i save tingim ol man na mekim gutpela pasin long ol.—Song 104:24.