Ol Rot Bilong Ol Long Autim Gutnius
OL KRISTEN i mas “mekim olgeta lain manmeri i kamap disaipel,” tasol dispela i no makim olsem ol i subim o pulim strong ol narapela long kamap disaipel. Wok bilong Jisas em i bilong “bringim gutpela tok bilong en long ol rabisman,” na “pinisim bel hevi bilong ol man,” na “strongim bel bilong ol manmeri i sori na i krai.” (Matyu 28:19; Aisaia 61:1, 2; Luk 4:18, 19) Ol Witnes Bilong Jehova i laik mekim olsem long rot bilong autim gutnius bilong Baibel. Olsem profet Esekiel bilong bipo, ol Witnes Bilong Jehova i laik painim ol manmeri ‘i bel nogut na wari long olgeta pasin nogut ol man i save mekim.’—Esekiel 9:4.
Planti man i save long pasin bilong ol long go long ol haus, ol i mekim olsem bilong painim ol man i wari long ol samting nogut bilong nau. Olsem na ol i wok strong long bungim ol man, wankain olsem Jisas i bin mekim taim em i “raun long ol taun na ol ples na em i wok long autim gutnius bilong kingdom bilong God.” Ol disaipel bilong em long bipo i mekim olsem. (Luk 8:1; 9:1-6; 10:1-9) Long nau, taim rot i op, ol Witnes Bilong Jehova i traim long go long olgeta haus inap sampela taim long olgeta yia. Ol i laik toktok wantaim ol man inap sampela minit long ol samting i kamap long hap bilong ol o long dispela graun, em ol samting ol man i save tingting long en. Ol inap kamapim wanpela o tupela skripsa bilong man i ken tingting long en, na sapos em i laik harim, ol Witnes bai stretim rot bilong go bek na toktok moa wantaim em. Ol man inap kisim Baibel na ol buk i kamapim mining bilong tok bilong Baibel, na sapos man i laik, ol Witnes bai stadi long Baibel wantaim em, no gat pe. Ol i save mekim planti milion Baibel-stadi wantaim ol man na ol famili long olgeta hap bilong graun.
Wanpela narapela rot bilong “autim dispela gutnius bilong kingdom,” em long rot bilong ol miting i kamap long ol Haus Kingdom. Ol Witnes i save mekim ol miting long ol Haus Kingdom long olgeta wik. Long wanpela miting ol i save mekim pablik-tok i kamapim sampela tok ol man i gat laik long save long en, na bihain ol i stadi long wanpela tok o tok profet bilong Baibel long rot bilong nius Wastaua. Narapela miting em skul bilong lainim ol Witnes long kamap gutpela moa long wok bilong autim gutnius, na bihain long en ol i toktok long ol samting bilong wok autim tok long hap bilong ol. Na tu, wanpela taim long olgeta wik ol Witnes i save bung olsem ol liklik grup long ol haus bilong wanpela brata bilong stadi long Baibel.
Ol Witnes i amamas long ol man i kam long olgeta dispela miting. Ol i no save singaut long mani. Ol dispela miting i save helpim olgeta man. Baibel i tok: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, olsem sampela man i save mekim. Nogat. Yupela i save, De bilong Krais em i kam klostu. Olsem na yumi wan wan i mas wok strong moa long strongim bel bilong ol arapela.” Man i mas mekim stadi bilong em yet, tasol pasin bilong bung wantaim ol narapela i save helpim man: “Ol i save wokim samting long ain bilong sapim ain. Olsem tasol, wanpela man i save helpim tingting bilong narapela man i kamap gutpela.”—Hibru 10:24, 25; Sindaun 27:17.
Taim rot i op ol Witnes i save toktok long gutnius wantaim ol narapela man ol i save bungim long olgeta de. Ating ol i toktok liklik wantaim man i stap klostu, o man ol i sindaun wantaim long PMV o balus, o ol i toktok longpela taim liklik wantaim pren o wanblut, o wantaim wanwok long taim bilong belo kaikai. Bikpela hap bilong wok autim tok Jisas i bin mekim taim em i stap long graun i olsem—em i autim tok taim em i wokabaut long nambis, sindaun long maunten, kaikai long haus bilong wanpela man, go long bung bilong marit, o taim em i raun long bot long solwara Galili. Em i skulim ol man long ol haus lotu na long tempel long Jerusalem. Maski em i stap long wanem wanem hap, em i painim rot bilong toktok long Kingdom bilong God. Ol Witnes Bilong Jehova i wok strong long bihainim lek mak bilong em long dispela samting tu.—1 Pita 2:21.
OL I AUTIM TOK LONG ROT BILONG PASIN OL I BIHAINIM
No gat wanpela bilong ol dispela rot bilong autim gutnius bai kirapim yu, sapos man i autim tok long yu em yet i no bihainim dispela tok. Man i mekim wanpela tok, tasol em i no bihainim, dispela em i pasin bilong tupela maus, na dispela pasin bilong ol lotu i mekim na planti milion manmeri i bin givim baksait long Baibel. Tasol i no stret long sutim tok long Baibel. Ol saveman bilong lo na ol Farisi i holim Ol Skripsa Hibru, tasol Jisas i tok ol i man bilong tupela maus. Em i tok ol i save ritim Lo Bilong Moses, tasol em i tokim ol disaipel bilong em olsem: “Olgeta tok ol i givim long yupela, em yupela i mas harim na bihainim. Tasol pasin ol i save mekim, em yupela i no ken bihainim. Nogat. Ol i save mekim planti tok, tasol ol yet ol i no save bihainim.” (Matyu 23:3) Taim Kristen i bihainim stretpela pasin long laip bilong em, dispela inap kirapim ol man long bilip, winim pasin bilong autim tok inap planti aua. Baibel i kamapim klia dispela samting long ol meri marit Kristen em man bilong ol i no bilip: “Ol i ken lukim gutpela pasin bilong yupela meri bilong ol. Na maski yupela i no mekim wanpela tok long ol, bai ol i inap tanim bel, long wanem, ol i lukim yupela meri i save wokabaut stret.”—1 Pita 3:1, 2.
Olsem na ol Witnes Bilong Jehova i traim long kirapim ol man long harim gutnius long dispela rot tu: Ol i bihainim gutpela pasin Kristen em ol i save tokim ol narapela man long bihainim. Ol ‘pasin ol i laik bai ol arapela man i mas mekim long ol,’ ol i traim long ‘mekim ol dispela pasin tasol long ol.’ (Matyu 7:12) Ol i traim long mekim olsem long olgeta man, i no long ol narapela Witnes tasol, o pren, wanblut, o ol man i stap klostu. Ol i no gutpela olgeta, olsem na sampela taim ol i save pundaun long mekim olsem. Tasol ol i gat bikpela laik tru long mekim gutpela pasin long olgeta man long rot bilong autim gutnius bilong Kingdom, na helpim ol long ol narapela rot tu taim ol inap long mekim olsem.—Jems 2:14-17.
[Piksa long pes 19]
Hawaii
[Piksa long pes 19]
Veneswela
[Piksa long pes 19]
Yugoslavia
[Ol Piksa long pes 20]
Ol Haus Kingdom i gutpela ples bilong toktok long Baibel
[Ol Piksa long pes 21]
Taim ol i stap wantaim famili na ol narapela man, ol Witnes i traim long mekim ol samting ol i autim tok long en