Oganaisesen na Wok Bilong Ol Long Olgeta Hap
BILONG bosim wok autim tok long 230 samting kantri ol i save bihainim dispela pasin: Lain Gavening Bodi i stap long hetkota long Brooklyn, New York, i save bosim dispela wok. Long olgeta yia, Gavening Bodi i save salim sampela brata long narapela narapela hap bilong graun, bilong bung na toktok wantaim ol lain i save lukautim wok long ol brens-ofis. Long ol brens-ofis i gat ol Komiti Bilong Brens i gat 3-pela i go inap 7-pela memba em ol i save bosim wok long kantri bilong ol. Sampela brens-ofis i gat ol haus faktori bilong prinim ol buk samting, na sampela ol i gat ol bikpela masin i save spit bilong prinim ol samting. Ol kantri o hap em wan wan brens-ofis i bosim ol i brukim i go long ol distrik, na ol distrik ol i brukim i go long ol sekit. Olgeta wan wan sekit i gat 20 samting kongrigesen long en. Wasman distrik i save raun na go lukim ol sekit i stap long distrik bilong em. Ol i save mekim tupela kibung bilong olgeta sekit long olgeta yia. I gat wasman sekit tu, na inap tupela taim long olgeta yia em i save go lukim olgeta kongrigesen i stap long sekit bilong em. Em i helpim ol Witnes long stretim na mekim wok autim tok long teritori bilong ol dispela kongrigesen.
Kongrigesen na Haus Kingdom i stap long hap bilong yu em i ples bilong lukautim wok bilong autim gutnius long komiuniti bilong yu. Ol i brukim hap ol i bin makim kongrigesen long lukautim i go long ol liklik teritori na wokim mep bilong ol. Ol i makim ol dispela teritori long ol wan wan Witnes bilong ol i ken wok strong long go lukim na toktok wantaim ol manmeri long olgeta haus bilong teritori. Long olgeta kongrigesen i gat ol elda ol i makim bilong lukautim ol narapela narapela wok, maski kongrigesen i liklik tru o i gat inap olsem 200 Witnes long en. Olgeta wan wan man bilong autim gutnius i bikpela samting long oganaisesen bilong ol Witnes Bilong Jehova. Olgeta wan wan Witnes, maski em i stap long hetkota, o brens-ofis, o long kongrigesen, em i mekim dispela wok bilong autim tok bilong Kingdom bilong God long ol narapela.
Ol ripot bilong dispela wok i go long hetkota, na long olgeta yia ol i bungim ol dispela ripot na kamapim long wanpela yiabuk. Na tu, long olgeta yia ol i kamapim lista bilong ol ripot long Wastaua bilong Janueri 1. Dispela buk na nius i kamapim ripot bilong olgeta yia, i stori long ol samting bilong wok bilong autim nem bilong Jehova na Kingdom bilong em i stap long han bilong Krais Jisas. Inap sampela yia nau, inap 14 milion Witnes na ol man i laik harim tok ol i bin bung long Memorial bilong tingim indai bilong Krais long olgeta yia. Ol Witnes Bilong Jehova i save lusim inap 1 bilion aua bilong autim gutnius long olgeta yia, na winim 300,000 nupela man i kisim baptais. Ol i save tilim planti handet milion buk na nius long ol man.