Yusim Maikrofon

OL BRATA na sista Kristen bilong yumi i save lusim bikpela hap taim na strong bilong kam long ol miting Kristen. Olsem na ol i mas harim klia ol tok i kamap long miting bambai ol dispela tok i ken helpim gut ol.

Long Israel bilong bipo, ol i no gat ol maikrofon samting. Taim Moses i givim tok long lain Israel long ples stret bilong Moap paslain long ol i go insait long Graun Bilong Promis, olsem wanem dispela planti milion manmeri inap harim tok bilong Moses? Ating Moses i toktok na wanpela man i stap longwe liklik i harim na em i mekim wankain tok, na narapela man i stap longwe liklik long em i harim na em tu i kolim wankain tok, na ol i mekim mekim olsem na olgeta long kem i harim. (Lo 1:1; 31:1) Bihain liklik long taim lain Israel i kirap kisim ol graun i stap long hap wes bilong wara Jordan, Josua i bungim lain Israel long pes bilong maunten Gerisim na maunten Ebal, na lain Livai i bung long ples daun namel long tupela maunten. Long dispela hap olgeta manmeri i harim tok long ol blesing God bai givim long ol sapos ol i bihainim tok na ol samting nogut bai painim ol sapos ol i sakim tok, na ol i bekim tok long dispela. (Jos. 8:​33-35) Ating ol i bihainim wankain pasin long mekim tok olsem ol i bin mekim long ples stret bilong Moap, tasol narapela samting i helpim ol man long harim tok, em olsem: Taim man i sanap long dispela kain ples na mekim tok, yu inap stap longwe na harim nek bilong em.

Klostu 1,500 yia bihain, taim wanpela “bikpela lain manmeri moa ol i kam” bung arere long raunwara Galili bilong harim Jisas, em i kalap long wanpela bot na lusim nambis liklik na em i sindaun long bot na givim tok long ol. (Mk. 4:​1, 2) Bilong wanem Jisas i sindaun long wanpela bot na mekim tok? Long wanem, taim man i stap long wanpela wara i stap isi tru na em i mekim tok, nek bilong em i klia na i save go longwe.

I kam inap long 1900 samting, sapos man i gat strongpela nek na i krai gut, planti man liklik inap harim tok bilong em, tasol sapos man i no gat kain nek olsem, orait planti man i no inap harim tok em i mekim. Tasol kirap long 1920 samting, ol wokboi bilong Jehova i kirap yusim ol masin samting bilong saun long ol kibung bilong ol.

Ol Masin Samting Bilong Saun. Ol dispela kain masin inap mekim na nek bilong man i mekim tok i go antap tru na i no senisim krai bilong nek. Man i mekim tok i no gat wok long singaut strong na nau nek bilong em i pen. Na ol man i harim tok ol i no hatwok long kisim ol tok man i kamapim. Nogat. Ol i ken tingting tasol long ol gutpela tok em i mekim.

Ol brata i bin mekim planti samting na bai i gat ol gutpela masin bilong saun na maikrofon samting long ol kibung bilong ol Witnes Bilong Jehova. Na tu, planti Haus Kingdom i gat masin samting bilong saun na ol i yusim taim ol brata i mekim pablik-tok, lukautim ol miting, o ritim tok. Sampela kongrigesen i gat ol wokabaut maikrofon ol man i holim taim ol i laik bekim tok long miting. Sapos kongrigesen bilong yu i gat ol kain samting olsem, orait em i gutpela long lainim stretpela pasin bilong yusim ol dispela samting.

Ol Tok Bilong Bihainim. Bilong mekim stretpela wok long ol masin bilong saun yu mas tingim ol dispela tok: (1) Maikrofon i mas stap longwe long maus olsem 10 i go inap 15 sentimita. Sapos maikrofon i stap klostu tumas ol tok bai i no klia. Sapos maikrofon i stap longwe tumas bai ol man i no inap harim gut. (2) Maikrofon i mas i stap stret long ai bilong yu, no ken stap arere. Sapos yu tanim het i go long han sut o han kais, orait toktok tasol taim pes bilong yu i lukluk long maikrofon. (3) Apim nek na toktok strong liklik, winim taim yu toktok wantaim wanpela man. Tasol yu no gat wok long bikmaus. I no hatwok long masin bilong saun i karim nek bilong yu i go long olgeta man i sindaun harim tok. (4) Sapos yu mas kus, orait tanim het i go long narapela hap, no ken kus long maikrofon.

Taim Yu Mekim Wanpela Tok. Taim yu sanap bilong mekim wanpela tok, wanpela brata bai stretim maikrofon bilong yu. Bihainim pasin bilong yu long sanap na lukluk long ol man taim brata i wok long stretim maikrofon bilong yu. Putim autlain long tebol na no ken larim maikrofon i pasim ai bilong yu na yu no inap lukim autlain.

Taim yu kirap toktok, putim yau long nek bilong yu yet i krai olsem wanem long spika. Krai bilong en i antap tumas, o sampela tok yu kolim i mekim pairap? Ating yu mas surik i go longwe long maikrofon olsem 2-pela i go inap 5-pela sentimita. Taim yu lukluk long autlain bilong yu, yu mas toktok taim pes bilong yu i lukluk stret long maikrofon o antap liklik long maikrofon, na no ken toktok taim maus i stap aninit long maikrofon.

Taim Yu Sanap Long Pletfom na Ritim Tok. Em i gutpela long holim Baibel o buk samting antap na bai pes bilong yu i ken lukluk i go long ol man yu ritim tok long ol. Maikrofon bai stap stret long pes bilong yu, olsem na ating yu mas holim samting yu ritim i go liklik long wanpela sait. Olsem na yu mas putim het bilong yu i go liklik long narapela sait bilong maikrofon. Em nau, taim yu rit, nek bilong yu bai i go stret insait long maikrofon.

Ol brata i save rit long Stadi Wastaua, klostu olgeta i save sanap na rit stret long wanpela maikrofon i sanap. Dispela i mekim na ol inap pulim gut win na kamapim gut ol tok ol i ritim. Yu mas tingim dispela samting: Wok bilong ritim ol paragraf em i bikpela hap bilong miting. Bilong kisim helpim long dispela miting, ol man i mas harim ol tok man i ritim.

Taim Yu Bekim Tok Long Miting. Sapos kongrigesen bilong yu i save yusim ol wokabaut maikrofon bilong ol man i bekim tok, orait no ken lusim tingting olsem yu mas tok klia na strong liklik. Taim yu bekim tok, traim long holim samting yu stadi long en o Baibel long han bilong yu. Dispela bai mekim na bai yu inap lukim gut dispela buk samting taim yu toktok long maikrofon.

Long sampela kongrigesen ol i makim ol brata bilong karim wokabaut maikrofon i go long ol man i laik bekim tok. Sapos ol i save mekim olsem long kongrigesen bilong yu, orait taim ol i makim yu long bekim tok, holim han bilong yu antap na bai brata i karim maikrofon inap lukim yu i sindaun we na em i ken kam long yu hariap. Sapos em i wanpela han maikrofon, orait redi long kisim taim brata i givim long yu. No ken kirap toktok inap long taim maikrofon i stap long ples stret. Taim yu pinisim bekim bilong yu, wantu givim maikrofon long brata i karim.

Taim Yu Insait Long Wanpela Soim. Bilong yusim maikrofon insait long wanpela soim yu mas tingting gut pastaim. Sapos maikrofon i sanap long wanpela maikrofon sten, orait tupela han bilong yu i fri long holim Baibel na pepa yu raitim tok long en. Sapos yu yusim wanpela han maikrofon yu inap i go i kam liklik antap long pletfom, tasol ating yu mas stretim rot bambai helpim bilong yu i ken holim maikrofon. Long dispela rot han bilong yu i stap nating na yu inap holim na opim Baibel. Yu na helpim bilong yu i mas mekim traim long dispela na bai helpim bilong yu i save long stretpela pasin bilong holim maikrofon. Na tingim tu: Taim yu stap long pletfom yu no ken givim baksait long ol man taim yu toktok.

Long ol soim bilong Miting Bilong Wok, sampela taim i gat planti man i insait long soim, na ol bai go i kam antap long pletfom. Olsem na bai ol i yusim sampela maikrofon. Paslain long soim, ol i mas putim ol dispela maikrofon long hap stret ol bai yusim o givim ol maikrofon long ol taim ol i go antap long pletfom. Bilong ol maikrofon i ken i stap long hap stret na long taim stret, ol i mas redi gut pastaim. Pasin bilong mekim traim ol soim i save skulim ol man i insait long soim long stretpela pasin bilong yusim maikrofon. Taim ol i no inap mekim traim long pletfom, em i gutpela sapos ol man i insait long soim ol i holim samting i wankain sais olsem maikrofon na mekim traim. Taim soim i pinis, ol man i insait long soim i mas putim gut ol maikrofon, na was gut, nogut lek bilong ol i pas long rop bilong maikrofon taim ol i lusim pletfom.

Taim yumi tingting long pasin bilong yumi long yusim ol maikrofon, dispela i stret long wanpela bikpela wok yumi laik mekim taim yumi bung long ol miting, em narapela i laik strongim narapela taim yumi toktok long Tok Bilong God. (Hi. 10:​24, 25) Taim yumi lain long mekim gutpela wok long ol maikrofon, yumi yet inap helpim dispela bikpela wok.