Kolim Gen Bilong Kamapim Gut

BILONG mekim gutpela wok tisa yu mas kolim gen ol tok. Taim yu kamapim gen wanpela bikpela tok, dispela bai helpim ol man long holim dispela tok long tingting bilong ol. Sapos yu kolim sampela narapela tok bilong kamapim wankain tingting, ating dispela bai helpim ol long save gut moa long dispela tok.

Sapos ol man i no inap tingim ol tok yu mekim, ol dispela tok i no inap mekim wanpela samting long bilip bilong ol o pasin bilong ol. Ating ol bai tingting yet long ol tok yu kamapim strong.

Jehova em i Nambawan Tisa bilong yumi na em i stap olsem gutpela piksa yumi ken bihainim long pasin bilong kolim gen tok. Em i givim Tenpela Lo long lain Israel. Long rot bilong wanpela ensel em i autim ol dispela lo long lain Israel long Maunten Sainai. Bihain em i raitim ol dispela lo na em i givim long Moses. (Kis. 20:​1-17; 31:18; Lo 5:22) Moses i bihainim tok bilong Jehova na em i kolim gen ol dispela lo long lain Israel taim ol i redi long go insait long Graun Bilong Promis, na long rot bilong spirit holi Moses i raitim ol dispela tok, olsem yu lukim long Lo 5:​6-21. Wanpela bilong ol dispela lo em lo i tokim ol long laikim tru Jehova na mekim wok bilong em long bel, tingting, na strong olgeta bilong ol. Dispela lo tu Baibel i kolim planti taim. (Lo 6:5; 10:12; 11:13; 30:6) Bilong wanem? Long wanem, olsem Jisas i tok, “Dispela lo em i bikpela, na em i namba wan tru.” (Mt. 22:​34-38) Long rot bilong profet Jeremaia, inap olsem 20 taim Jehova i bin kirapim tingting bilong ol Juda, olsem em i bikpela samting tru long ol i mas bihainim olgeta tok em i bin givim long ol. (Jer. 7:23; 11:4; 12:17; 19:15) Na long rot bilong Esekiel, winim 60 taim God i tok ol kantri “ol i mas save olsem, mi yet mi Jehova.”​—Ese. 6:10; 38:​23, NW.

Long stori bilong wok autim tok bilong Jisas, yumi lukim gutpela wok bilong kolim gen tok. Olsem 4-pela Gutnius​—ol wan wan i stori long ol bikpela samting i bin kamap, na ol dispela stori i kamap gen long ol narapela Gutnius tasol ol i kamapim ol dispela stori long pasin bilong ol yet. Long wok tisa bilong em yet, Jisas i bin kamapim wankain tok long ol narapela narapela taim na long ol narapela narapela rot. (Mk. 9:​34-37; 10:​35-45; Jo. 13:​2-17) Na sampela de tasol paslain long indai bilong em, taim em i stap long maunten Oliv, Jisas i kolim gen tok bilong kamapim strong dispela bikpela tok kaunsel: “Yupela i mas was gut. Yupela i no save wanem de Bikpela bilong yupela bai i kam.”​—Mt. 24:42; 25:13.

Long Autim Tok. Taim yu autim tok long ol man, yu laik bai ol i tingim tok yu mekim. Pasin bilong kolim gen tok i ken helpim yu long mekim olsem.

Taim yu toktok long wanpela samting na long dispela taim stret yu kamapim gen tok yu laik bai man i mas tingim, dispela bai helpim em long holim dispela tok long tingting bilong em. Olsem na taim yu ritim pinis wanpela skripsa, bilong kamapim strong dispela skripsa yu ken kamapim gut wanpela bikpela tok bilong en na mekim kain askim olsem, “Yu bin lukim ol tok dispela ves i kolim?”

Taim yu toktok wantaim man, yu ken mekim gutpela wok long ol laspela sentens yu kolim. Yu ken tok olsem: “Nambawan bikpela tok mi laik bai yu tingim em i olsem . . . ” Orait nau kolim gen bikpela tok. Ating yu ken mekim kain tok olsem: “God i laik bai dispela graun i mas kamap wanpela paradais. Dispela laik bilong em bai kamap tru.” O yu ken tok: “Baibel i kamapim klia olsem yumi stap long taim bilong las de bilong dispela graun. Sapos yumi laik winim dispela taim nogut, yumi mas lain long ol samting God i laik bai yumi mas mekim.” O yu ken tok: “Olsem yumi lukim pinis, Baibel i kamapim gutpela tok bilong helpim yumi long karim ol hevi i save kamap insait long famili.” Ating sampela taim bai yu kolim gen wanpela tok bilong Baibel bilong man i ken tingim. Bilong mekim gut dispela, yu mas tingim gut pastaim.

Long ol gobek na ol Baibel-stadi ating bai yu kolim gen tok long rot bilong kamapim sampela askim bilong riviu.

Taim wanpela man i hatwok long kisim gut o bihainim sampela tok kaunsel bilong Baibel, ating yu mas stori gen long dispela tok sampela taim moa. Kamapim long kain kain rot o pasin. I no olsem yu mas stori longpela taim long dispela tok, nogat, tasol yu laik kirapim sumatin long tingting yet long en. Jisas i bin bihainim dispela kain pasin bilong kolim gen tok taim em i wok long helpim ol disaipel long daunim laik bilong i stap nambawan.​—Mt. 18:​1-6; 20:​20-28; Lu. 22:​24-27.

Taim Yu Mekim Tok. Sapos yu save mekim ol tok long pletfom, yu no mekim bilong kamapim sampela save tasol. Yu laik bai odiens i ken kisim gut, tingim, na bihainim tok yu kamapim. Bilong mekim olsem yu mas mekim gutpela wok long pasin bilong kolim gen tok.

Tasol sapos yu kolim ol bikpela tok planti taim tumas, ating ol man bai les na bai ol i no putim yau long tok yu mekim. Makim gut ol tok yu laik kamapim strong. Em ol as tingting yu wokim tok long en, tasol sampela taim bai yu makim sampela narapela tok i gutpela bilong helpim odiens bilong yu.

Bilong kolim gen tok, ating pastaim yu ken kamapim ol bikpela tok insait long kirap bilong tok. Bilong mekim olsem yu ken kolim ol sotpela sentens ol i stori liklik long ol samting yu bai stori long en, o kamapim ol askim, o kamapim sampela hevi bilong stretim. Yu ken kolim hamas bikpela tok yu bai kamapim na wokim lista olsem namba wan, namba 2, namba . . . Na bihain kamapim gut ol dispela bikpela tok long namel bilong tok. Yu ken kamapim strong ol bikpela tok insait long namel bilong tok taim yu kolim gen ol wan wan bikpela tok paslain long yu kirap stori long narapela bikpela tok. O yu ken kamapim wanpela stori samting i soim olsem wanem yu ken bihainim dispela bikpela tok. Na yu ken kamapim strong ol bikpela tok taim yu kolim gen long pinis bilong tok, o soim olsem wanem wanpela i no wankain olsem narapela, o bekim ol askim yu bin kamapim, o mekim sotpela tok long rot bilong stretim ol hevi yu bin stori long en.

Ol brata i save gut long mekim tok ol i save lukluk gut long wanem kain man i stap long odiens. Sapos sampela i hatwok long kisim gut wanpela tok, brata bilong mekim tok bai save long dispela. Sapos tok ol i no klia long en em i wanpela bikpela tok, brata bai stori gen long en. Tasol sapos em i kolim gen wankain tok, ating dispela bai i no inap helpim ol. Bilong mekim gut wok tisa em i mas redi long senisim sampela tok o skruim sampela tok moa long en. Pasin bilong yu long lain long helpim odiens olsem, dispela bai makim olsem yu mekim gutpela wok tisa o nogat.