Ol Pikinini Husat i Mekim God i Amamas

HUSAT pikinini long graun i bin mekim Jehova i amamas moa yet?— Em Pikinini bilong em, Jisas. Yumi ken stori long ol samting Jisas i bin mekim bilong mekim Papa bilong em long heven i amamas.

Famili bilong Jisas i stap longwe long Jerusalem inap olsem 3-pela de wokabaut, em ples naispela tempel bilong Jehova i stap long en. Jisas i kolim tempel olsem “haus bilong Papa bilong mi.” Long olgeta yia em na famili bilong em i save go long dispela hap long bung bilong Pasova.

Long wanpela yia, taim Jisas i gat 12-pela krismas, famili bilong em i laik go bek long ples bihain long Pasova. Ol i no save olsem Jisas i no stap wantaim ol, i go inap long taim ol i laik malolo long nait na nau ol i luksave olsem Jisas i no stap wantaim ol pren na wanblut bilong ol. Olsem na kwiktaim Maria na Josep i go bek long Jerusalem long painim Jisas. Yu ting em i stap we?—

Ol i painim Jisas long tempel. Em i wok long putim yau long tok bilong ol tisa, na em i wok long givim askim long ol. Na taim ol tisa i givim askim long em, em i bekim. Ol i kirap nogut long ol gutpela bekim em i givim. Olsem wanem? Yu inap save nau long as na God i amamas long Pikinini bilong em?—

Taim Maria na Josep i painim pinis Jisas, bel bilong ol i stap isi. Tasol Jisas i no bin tingting planti. Em i save olsem tempel i gutpela ples bilong i stap long en. Olsem na em i askim ol: “Ating yutupela i no save, mi mas i stap long haus bilong Papa bilong mi?” Em i save olsem tempel em i haus bilong God, na em i amamas long stap long hap.

Maria na Josep i kisim Jisas, em i gat 12 krismas, i go bek long Nasaret. Yu ting Jisas i mekim wanem pasin long papamama bilong em?— Baibel i tok “oltaim em i save bihainim tok bilong tupela.” Yes, em i mekim ol samting papamama bilong em i askim em long mekim, maski ol i askim em long kisim wara long hul wara.​—Luk 2:​41-​52.

Olsem na tingim dispela: Maski Jisas i gutpela olgeta, em i bihainim tok bilong papamama em ol i gat sin. Yu ting dispela i mekim God i amamas?— Yes, em i bin mekim God i amamas, long wanem, Baibel i tokim ol pikinini olsem: “Yupela i mas bihainim tok bilong papamama bilong yupela.” (Efesus 6:1) Yu tu bai mekim God i amamas sapos yu bihainim tok bilong papamama bilong yu olsem Jisas i bin mekim.

Narapela rot bilong mekim God i amamas em long rot bilong tokim ol narapela long em. Ating sampela man bai tok olsem i no stret ol yangpela i mekim dispela wok. Tasol taim ol man i laik pasim ol liklik mangi long mekim olsem, Jisas i bin tok: ‘Ating yupela i no bin ritim dispela tok i stap long ol Skripsa, “Ol liklik pikinini i save litimapim nem bilong God”?’ (Matyu 21:16) Olsem na sapos yumi gat laik tru long mekim, yumi olgeta inap tokim ol narapela long Jehova na long em i gutpela God tru. Na sapos yumi mekim olsem, yumi bai mekim God i amamas.

Olsem wanem yumi kisim save long God na bai yumi inap tokim ol arapela long em?— Long rot bilong stadi long Baibel long haus. Tasol yumi lainim planti samting moa long ples em lain bilong God i save bung long en bilong mekim stadi. Tasol olsem wanem yumi inap save husat ol i lain bilong God?—

Ol man i save mekim wanem taim ol i bung long mekim lotu? Tru tru ol i save skulim ol man long ol tok i stap long Baibel? Ol i save ritim na stori long en? Yumi save harim tok bilong God long dispela rot, a?— Na long ol miting Kristen, yumi save olsem yumi bai harim ol tok bilong God, a?— Tasol olsem wanem sapos ol man i tok yu no gat wok long bihainim ol tok bilong Baibel long i stap bilong yu? Bai yu tok ol i lain bilong God?—

Tingim dispela samting tu. Baibel i tok lain bilong God bai stap olsem “wanpela lain i holim nem bilong em.” (Aposel 15:​14, NW) Nem bilong God em Jehova, olsem na yumi ken askim ol man olsem Jehova em i God bilong ol o nogat. Sapos ol i tok nogat, orait yumi save olsem ol i no lain bilong God. Lain bilong God bai tokim ol arapela tu long Kingdom Bilong God. Na ol bai soim olsem ol i laikim tru God long rot bilong bihainim ol lo bilong em.​—1 Jon 5:3.

Sapos yu save long lain i mekim olgeta dispela samting, orait yu mas bung wantaim ol long mekim lotu. Yu mas putim gut yau long ol tok i kamap long ol dispela bung na bekim sampela tok taim ol i givim ol askim. Jisas i bin mekim olsem taim em i stap long haus bilong God. Na sapos yu mekim ol dispela samting, bai yu mekim God i amamas, olsem Jisas i bin mekim.

Yu inap tingim nem bilong sampela pikinini em Baibel i stori long ol i bin mekim God i amamas?— Timoti i stap olsem gutpela piksa tru long mekim olsem. Papa bilong em i no bilip long Jehova. Tasol mama bilong em Yunis, na bubu meri bilong em Lois, ol i bilip long Jehova. Timoti i harim tok bilong ol na em i kisim save long Jehova.

Taim Timoti i kamap bikpela pinis, aposel Pol i go long taun em i stap long en. Em i lukim olsem Timoti i gat laik tru long mekim wok bilong Jehova. Olsem na em i askim Timoti long go wantaim em na mekim bikpela wok moa bilong God. Long olgeta hap ol i go long en, ol i tokim ol man long Kingdom Bilong God na long Jisas.​—Aposel 16:​1-5; 2 Timoti 1:5; 3:​14, 15.

Tasol olsem wanem? Baibel i stori long ol pikinini man tasol i bin mekim God i amamas?— Nogat. Tingim wanpela liklik meri Israel em i bin mekim God i amamas. Long taim bilong em, lain Siria na lain Israel ol i stap birua birua. Wanpela taim ol Siria i go pait long ol Israel na ol i kisim dispela liklik meri. Ol i salim em i go long haus bilong wanpela ofisa bilong ami, nem bilong em Naman. Em i kamap wokmeri bilong meri bilong Naman.

Naman i gat sik ol i kolim lepra. I no gat wanpela dokta inap helpim em. Tasol dispela liklik meri Israel i bilip olsem wanpela wokman bilong God, wanpela profet, em inap helpim Naman. Naman na meri bilong em ol i no lotuim Jehova. Olsem wanem? I stret dispela liklik meri i tokim ol long samting em i save long en? Sapos yu dispela liklik meri, bai yu mekim wanem?—

Liklik meri i tok: ‘Sapos Naman i go long profet bilong Jehova long Israel, sik lepra bilong Naman bai pinis.’ Naman i harim tok bilong liklik meri na em i go long profet bilong Jehova. Taim em i mekim samting profet i tokim em long mekim, em i kamap orait. Dispela i mekim na Naman i kamap man bilong lotuim trupela God.​—2 King 5:​1-​15.

Olsem wanem? Yu laik helpim wanpela long kisim save long Jehova na long ol samting em inap mekim, olsem dispela liklik meri i bin mekim?— Yu inap helpim husat?— Tru, ating pastaim ol bai ting olsem i no gat wok long narapela i helpim ol. Tasol yu ken tokim ol long ol gutpela samting Jehova i save mekim. Na ating ol inap putim yau. Yu ken bilip tru olsem dispela bai mekim God i amamas.