Tok Bilong God i Gat Laip

Em i Bilip na Em i No Pret—Olsem Wanem Long Yu?

OL BIRUA i holim dispela liklik meri Isrel na kisim em i go wok kalabus long Siria. Ol i givim em long meri bilong Neman, em kepten bilong ami bilong Siria. Em i stap namel long ol birua, longwe long ples bilong em. Em i kamap wokmeri bilong meri bilong Neman.

Neman em i strongpela man bilong pait na em i gat biknem. Tasol dispela bikman bilong ami em i gat sik nogut, em sik lepra. Ol strongpela sua i kaikaim skin bilong em. Taim dispela liklik meri Isrel i stap yet long ples, em i bin harim tok long ol strongpela wok o mirakel God Jehova i wokim long rot bilong, profet Ilaisa. Em i bin kirapim bek man i dai pinis tu—em i kirapim bek pikinini man bilong wanpela meri. (2 King 4:8-37) Dispela liklik meri i bilip tru long ol mirakel bilong God na em i no pret long tokim ol man long en.

Wanpela taim em i tokim meri bilong Neman long ol dispela mirakel God i bin wokim, olsem yu lukim long piksa hia. Em i tok: ‘Sapos bikpela bilong mi i go long Sameria bai profet bilong Jehova i oraitim sik bilong em.’ Bihain wanpela man i tokim Neman long ol tok bilong dispela liklik meri. Ating Neman i kirap nogut!

Lukim piksa hia—ating Neman i singautim dispela liklik meri na tokim em: ‘Mi bikpela kepten bilong ami bilong Siria, tasol yu no pret long tok mi mas i go long kantri bilong yu na lukim profet bilong God bilong yu bambai em i ken oraitim sik bilong mi! Yu gat strongpela bilip na yu no pret, nogut mi kros long yu. Yu no tingim skin bilong yu yet, yu laik helpim mi na yu tokaut long dispela samting. Bai mi go lukim king bilong Siria na kisim orait na bai mi go long Isrel.’—2 King 5:1-5.

Olsem wanem sapos kain samting olsem i painim yu? Yu save long ol gutpela wok Jehova i bin mekim na long laik bilong em long kamapim nupela taim bambai olgeta manmeri i ken i stap gutpela olgeta na i stap oltaim, a? (2 Pita 3:13; Revelesen 21:3, 4) Planti man long nau ol i no save long ol dispela samting o ol i save liklik tasol!

Sapos yu yangpela man o yangpela meri, ating kain samting olsem yu lukim long piksa hia em inap painim yu. Tisa na ol wanskul bilong dispela yangpela meri ol i no save long Jehova na taim i gat rot em i no pret long tokaut long ol. Orait, olsem wanem long yu? Yu bilip na yu no pret na taim i gat rot yu laik helpim ol narapela man bambai ol i ken save long rot bilong kamap gutpela long spirit?

Tasol olsem wanem long Neman? Skin bilong em i orait bek? Em narapela stori na narapela Wastaua bihain bai kamapim.