Mirakel Long Solwara Retsi

Taim Fero i harim olsem ol Israel i lusim pinis Isip, em i senisim tingting long em i bin salim ol i go. Em i givim oda long ol soldia bilong em: ‘Redim ol karis bilong mi bilong pait, na yumi go ronim ol! Wai na yumi larim ol i go.’ Fero na ol soldia bilong em i kirap ron bihainim ol Israel.

Jehova i go pas long ol manmeri bilong em, em i yusim klaut long san na paia long nait. Em i bringim ol i go long Solwara Retsi, na em i tokim ol long wokim kem.

Bihain ol Israel i lukim Fero na lain ami bilong em i ron bihainim ol. Ol i trap namel long solwara na lain ami bilong Isip. Ol i krai long Moses: ‘Mipela bai i dai! Yu no laik larim mipela long Isip.’ Tasol Moses i tok: ‘No ken pret. Wet na lukim olsem wanem Jehova bai seivim yumi.’ Moses i trastim tru Jehova, a?

Jehova i tokim ol Israel long rausim kem. Long dispela nait, Jehova i muvim klaut na putim namel long ol Isip na ol Israel. Long sait bilong ol Isip, ples i tudak. Tasol long sait bilong ol Israel ples i lait.

Jehova i tokim Moses long apim han bilong em na makim solwara. Bihain Jehova i mekim strongpela win i kamap long nait olgeta. Solwara i bruk i go tupela hap, na i gat rot long namel. Planti milion Israel i wokabaut long graun i drai, namel long tupela wol bilong wara, i go long narapela sait.

Ami bilong Fero i bihainim ol Israel i go long graun i drai namel long solwara. Na nau Jehova i mekim na ami i longlong nabaut. Ol wil bilong ol karis i lus na kamaut long ol karis. Ol soldia i singaut: ‘Yumi lusim dispela hap! Jehova i pait bilong helpim ol.’

Jehova i tokim Moses: ‘Stretim han bilong yu na makim solwara.’ Kwiktaim, tupela wol bilong wara i pundaun na karamapim ami bilong Isip. Fero na olgeta ami bilong em i dai. I no gat wanpela i abrusim bagarap.

Long narapela sait bilong solwara, bikpela lain manmeri i mekim singsing bilong preisim God: “Singim song long Jehova, long wanem, em i winim pait. Em i tromoi hos wantaim man i sindaun long hos i go insait long solwara.” Taim ol manmeri i singsing, ol meri i danis na paitim ol tambarin. Olgeta i amamas tru bikos nau ol i stap fri.