Tok Bilong God i Gat Laip

Ol Man i Dai Pinis Ol i Stap We?

DISPELA man i krai em Jekop. Em i bel hevi tru, long wanem em i ting pikinini bilong em Josep i dai pinis. Em i laikim tumas Josep. Saket em i holim na i gat blut long en em bilong Josep. Jekop i lukim na em i tok: “Wanpela wel abus i kilim em, na i pinisim em olgeta.”—Jenesis 37:33.

Ol lain hia i stap wantaim Jekop em ol narapela pikinini bilong em. Ol i laik strongim bel bilong papa. Tasol Baibel i tok, ol i no inap mekim bel bilong em i kamap gutpela gen. Em i tok: “Mi mas krai long em inap mi go i stap wantaim em long ples bilong ol daiman.” Na long wanpela Baibel Katolik (Douay) ol i tanim dispela tok, olsem: “Mi mas krai long em inap mi go i stap wantaim em long hel.”—Jenesis 37:35.

Taim Jekop i tok, pikinini bilong em i stap long “ples bilong ol daiman” o long “hel,” em i ting pikinini i stap we? Yu ting em i ting Josep i stap long wanpela ples nogut, olsem ples bilong kisim pen oltaim? Na yu ting Jekop i laik i go long kain ples olsem na stap wantaim Josep? Nogat, a? Jekop i ting pikinini i dai pinis na em i stap long matmat, na Jekop i laik bai em tu i dai na i go i stap long matmat.

Lukim dispela man i karim bikpela pen. Em gutpela man Jop. Em i gat bikpela hevi na em i beten long God na em i tok: “Plis, haitim mi long hel [ples bilong ol daiman] inap long taim kros bilong yu i pinis; na yu ken makim wanpela taim na bai yu tingim mi.”—Jop 14:13, Baibel Katolik Douay.

Jop i gat bikpela pen na em i laik bai em i dai na em i no inap pilim moa dispela pen. Em i ting em bai stap we taim em i dai? Ol man i dai pinis ol i stap we? Jop i no ting em bai go i stap long wanpela ples paia bilong kisim pen. Nogat. Jop i save, taim man i dai na em i go long dispela ples Baibel Katolik i kolim olsem “hel,” em i go long matmat tasol. Na bai em i no gat save o tingting na em i no inap pilim pen. (Eklisiastis 9:5, 10) Tok Hibru ol i tanim olsem “ples bilong ol daiman” o “hel,” em Sheol. Dispela tok Sheol i makim matmat, em ples olgeta man i dai ol i go long en. Olsem na sampela Baibel (olsem Authorized Version) i tanim dispela tok olsem “matmat.”

Ol man i dai pinis ol inap i stap laip gen? Tru tumas, long wanem Baibel i tok: “Dai wantaim Hel [matmat] i givim bek olgeta daiman i stap long dispela.” (Revelesen 20:13, 14) Em gutpela tok tru! God bai kirapim bek ol man i dai pinis. Na ol man, olsem Jop, em ol i bilip olsem God bai kirapim bek ol man i dai pinis, ol tu bai kirap bek.—Jop 14:14, 15.

[Piksa long pes 10]

Taim Jekop i tok pikinini bilong em i stap long ples bilong ol daiman o “hel,” em i ting pikinini i stap we?

[Piksa long pes 11]

Bilong wanem Jop i beten na tok em i laik i go long “hel”?