Musik Bilong Nau​—Em Inap Paulim Tingting Bilong Yu?

ORAIT, olsem wanem long ol musik na singsing bilong nau, ol i kolim rok na pank na fank na ritam-an-blus na kantri-an-westen na ol narapela kain kain musik bilong nau? Ol dispela musik na singsing inap paulim tingting bilong yu? o bagarapim yu long spirit?

Wanpela man bipo em i save wokim rok-musik (Bill Mullane bilong Nu Jesi long Amerika) em i tok: ‘Bipo mi man bilong paitim gita wantaim wanpela lain ol i save wokim rok-musik. Dispela musik i save kirapim skin olgeta. Mipela paitim strong gita na nek bilong musik i kirapim tru bel. Mi man bilong wokim dispela musik na mi pilim tru strong bilong en. Ol man i kam harim dispela musik, taim mi lukim ol tu i pilim strong bilong en na bel bilong ol i kirap, mi laik paitim strong moa bilong kirapim ol moa yet. Dispela kain musik i kirapim yu long mekim olsem. Em i paulim tingting bilong yu olgeta. Na long dispela taim bipo mi save kisim drak. Planti man i kam harim musik bilong mipela ol tu i save kisim drak. Drak wantaim musik i paulim tingting na mipela pilim olsem mipela i stap gutpela tru, no gat wanpela hevi. Musik i mekim na yu laik lusim olgeta tambu na bihainim tasol laik bilong skin. Yu kirap mekim nabaut na i go wail olgeta!

‘Em tasol na planti yangpela manmeri long nau ol i laikim ol dispela nupela kain musik. Dispela kain musik na tok bilong ol singsing bilong nau i stret long tingting bilong ol. Long wanem ol i no laik bihainim ol lo. Ol i laik bihainim laik bilong ol yet tasol. Olsem na ol i laikim ol dispela kain musik na singsing i kirapim ol long mekim olsem. Ol i save bikpela pait inap kamap na bai olgeta manmeri i bagarap. Ol i pilim olsem i no gat bikpela hap taim moa, olsem na ol i laik kisim amamas nau.”

Em i tok, ol manmeri bilong nau i laikim dispela kain musik na singsing, long wanem i stret long tingting bilong ol. (Lukim 1 Korin 15:32.) Tasol yu ting i stret long tingting bilong ol Kristen tru? Wanpela nius bilong Kanada (Toronto Star) i stori long wanpela lain bilong San Fransisko ol i wokim rok-musik (Tubes) na dispela nius i tok: ‘Singsing bilong ol i kamapim ol samting bilong maritpasin na pasin doti bilong givim pen bilong inapim laik bilong bel.’ Man bilong raitim dispela tok long nius, em i tok moa olsem: ‘Ating dispela lain i laik sutim tok long pasin nogut na pasin doti ol man i mekim long nau. Tasol ol i kamapim tasol ol dispela kain pasin doti nogut tru, olsem pasin bilong givim pen bilong inapim laik bilong bel, na bagarapim samting i holi, na pasin sem,’ Yu ting ol dispela pasin i stret long lotu Kristen? Nogat tru!

Wanpela nius bilong Amerika (New York Post) i stori long wanpela lain bilong wokim musik na singsing ol i kolim Rolling Stones. Dispela nius i putim het-tok, olsem: “Pasin Seten Bilong Rolling Stones” na i tok: Dispela lain ol i insait long pasin bilong kisim drak. Musik na singsing bilong dispela lain i kamapim ples klia tingting bilong ol long drak, na ol samting bilong maritpasin, na Seten. Yu ting yu inap wanbel wantaim dispela kain tingting na wanbel wantaim Krais tu?—2 Korin 6:14, 15.

I gat sampela samting moa bilong musik na singsing bilong nau em Kristen i mas tingim bambai bel bilong em i ken i stap klin long ai bilong God. Aposel Pol i givim strongpela tok long ol Kristen, olsem: “Yupela i mas pasim olgeta klospait God i save givim long yumi, na bai yupela inap long sanap strong na sakim olgeta pasin hait [o pasin giaman] bilong Seten. Bilong wanem? … Yumi pait wantaim olgeta spirit nogut i stap antap. Yumi pait wantaim … ol strongpela het spirit bilong graun ol i save bosim dispela tudak.” (Efesas 6:11, 12) Yumi mas tingim gut dispela toksave. Ol spirit nogut i wok strong long paulim tingting bilong ol man, na ol i mekim olsem long rot bilong musik na singsing. Ol i giamanim ol man long rot bilong musik na singsing, na ol i giamanim tru ol yangpela manmeri long dispela rot.

Nau ol man i save, planti lain bilong singsing long nau ol i insait tru long wok bilong ol spirit nogut, olsem ol kain kain wok marila. Na sampela ol i wok long kamapim tingting bilong ol lotu haiden long rot bilong singsing bilong ol.

Olsem: Robert Palmer, em man bilong stori long jes-musik, em i raitim tok long wanpela nius bilong Amerika (The New York Times). Em i stori long wanpela lain blakskin bilong Sikago ol i lain bilong wokim jes-musik, ol i kolim nem bilong ol Art Ensemble of Chicago. Dispela nius i tok, pasin bilong Seten i stap insait long ol singsing long wanpela plet singsing bilong dispela lain. Dispela lain i laik kamapim tasol ol musik na singsing bilong ol blakskin bilong bipo na i go inap long bihain. Nius i tok, ‘Dispela lain ol i blakskin … na pasin bilong ol i tudak. Ol i insait long tudak bilong ol kain kain wok marila na posin bilong lotu vudu. Maski ol man i wokim pati nogut tru, tasol ol i no ken putim plet singsing bilong dispela lain na harim singsing bilong ol … Man i harim singsing bilong ol i olsem em i driman na em i go long ples tudak nogut tru.’ Yu wanpela disaipel bilong Krais? Orait, yu laik baim plet singsing o kaset i gat kain musik na singsing olsem long en?

Pol i tokim ol Kristen bilong Efesas ol i mas was gut, ol i gat pait wantaim ol spirit nogut. Olsem na sapos wanpela Kristen bilong nau i baim plet singsing o kaset i kamapim ol singsing i litimapim wok o pasin bilong ol spirit nogut, yu ting dispela Kristen i was gut? Yu ting em i bihainim gutpela tingting? Sapos Kristen i save sampela lain bilong singsing ol i insait tru long wok na pasin bilong ol spirit nogut, tasol em i kisim plet singsing o kaset bilong ol na em i ting ol spirit nogut i no ken paulim em long rot bilong nek bilong dispela musik, o long rot bilong ol tok bilong ol singsing, o long rot bilong karamap bilong plet singsing tu, orait, yu ting dispela Kristen i was gut?

Wanpela lain ol i save mekim wanpela singsing na ol i stori long “Mr. Crowley” (“Mista Krauli”). Dispela man ol i singsing long em, em i husat? Em wanpela man bilong dispela taim nau em i save lotuim Seten, na em i helpim ol kain kain wok marila bilong nau! Planti taim yu inap lukim karamap tasol bilong plet singsing o kaset na yu inap save, i no stret wanpela witnes Kristen bilong Jehova i baim dispela. Karamap bilong planti plet singsing long nau i gat ol mak bilong lotu haiden long en, na ol samting i makim wok bilong ol spirit nogut na marila na posin.

Wanpela man bipo em i save wokim jes-musik na bihain em i wokim rok-musik long ol nait-klap, nem bilong em Gordon Grant, em i tok: “Olgeta lain mi bin wok wantaim ol, ol i insait liklik o insait tru long ol wok na pasin bilong ol spirit nogut. Taim ol i bungim wanpela man long namba wan taim ol i save tok, ‘Wanem mak bilong yu?’ Ol i ting ol sta i bosim ol samting i painim yumi, olsem na ol i tingim tru ol mak bilong sta.” Tasol yu laik insait long pasin bilong lukluk long ol sta o narapela wok o pasin bilong ol spirit nogut?—Diuteronomi 18:10-13.

Musik na Pasin Pamuk

Aposel Pol i givim sampela tok moa long ol Kristen taim em i raitim pas long ol Efesas, na dispela tok i stret long nau long ol samting bilong musik. Em i tok: “Pasin pamuk na olgeta pasin doti na mangal nogut [pasin bilong mangal long meri tu], tok bilong ol dispela pasin em i no ken kamap liklik namel long yupela. I no inap yumi manmeri bilong God yumi toktok long dispela kain pasin. Yupela i no ken mekim … tok pilai nogut.”—Efesas 5:3-5.

Yupela ol papamama, na yupela ol yangpela manmeri: Yupela i bin skelim gut tok bilong sampela singsing bilong nau yu inap baim long stua o ating yu baim pinis na i stap long haus? Ating yu laikim nek bilong musik bilong wanpela singsing, tasol olsem wanem long ol tok bilong dispela singsing? Ating yu no tingim, tasol yu singsing na bihainim nek bilong dispela musik. Long sampela ples bilong amamas long raun long ais, ol i save putim ol dispela kain musik na singsing. Yu ting i stret sapos Ol Witnes Bilong Jehova i raun long ais bihainim dispela kain musik? Tasol ating bai yu tok, ‘Dispela samting inap bagarapim mi olsem wanem?’

Planti lain bilong singsing long nau, ol tok bilong singsing bilong ol i stori long pasin bilong pamuk na kisim drak. Singsing bilong ol i kamapim pasin ol yet i save bihainim. Sampela singsing long wanpela plet singsing bilong nau i tok, ‘Mi laik slip wantaim yu na traim amamas yu inap givim long man,’ na ‘Dispela meri i laikim tumas pasin pamuk, bel bilong em i kirap olsem paia.’ Em, ol i mekim singsing na tok olsem. Wanpela man em i gat biknem long mekim singsing, em i kamapim tingting bilong em long karamap bilong plet singsing, em i tok: “Olgeta manmeri i laik slip wantaim, sapos tupela wantaim i gat laik long mekim, mi ting i no gat rong long dispela. … Mi no bilip long ol tambu long pasin pamuk samting.” I no inap ol Kristen tru i wanbel wantaim ol man i gat kain tingting olsem, a? Na ol i no inap wanbel wantaim ol tok bilong ol dispela singsing bilong nau, a? Ol man i bihainim krais ol i no ken wanbel wantaim dispela kain tingting bilong ol man i ‘stap longwe long God.’—Efesas 4:18; lukim tu Jenesis 39:7-12.

Musik na Ol Lapun

Nogut ol lapun i ting ol dispela tok i bilong ol yangpela tasol. Nogat. Sampela singsing ol manmeri i bin laikim 20 o 30 yia bipo, ol dispela singsing tu i kamapim tok nogut. Wanpela (“Big Spender”) i stori long meri pamuk i laik pulim wanpela man long pamuk wantaim em na baim em. Na wanpela “Fever” i stori long bel i kirap olsem paia long mekim maritpasin. Na wanpela (“Never On Sunday”) em tu wanpela singsing bilong meri pamuk. Planti manmeri i harim ol dispela singsing long bipo, ating ol i no tingim as bilong tok bilong en.

Mipela inap kolim nem bilong planti singsing moa i kamapim pasin hait bilong Seten, em i laik giamanim yumi long rot bilong musik na singsing na pulim yumi long bihainim tingting na pasin nogut. Sapos yumi harim ol dispela tok na tingting nogut long narapela rot, kwiktaim bai yumi sakim. Orait, dispela samting i mas lainim yumi olsem wanem? Olsem: Yumi olgeta, ol yangpela wantaim ol lapun, yumi mas skelim ol musik na singsing yumi save amamas long harim. Nogut yumi kisim tingting wankain olsem bilong ol manmeri bilong dispela graun na bai yumi kirap bihainim “pasin nogut” bilong ol.—1 Pita 4:4.

Olgeta Kristen i mas tingim dispela samting—ol elda long kongrigesen, na ol papamama, na ol yangpela, na ol pikinini. No gat spes moa bilong kolim olgeta samting i soim yumi, planti musik na tok bilong ol singsing bilong bipo na bilong nau, em inap bagarapim gutpela tingting na pasin bilong yumi na pulim yumi long mekim pasin i no stret. Olsem na olgeta Kristen i laik bai bel bilong em i ken i stap stret na klin long ai bilong God, em i mas skelim gut ol musik na singsing em i save laikim, na em i mas skelim gut ol plet singsing na kaset samting em i holim pinis. Em i mas bihainim pasin i stret wantaim gutpela tingting Baibel i kamapim.

Kristen i Ken Mekim Wanem?

Taim Pol i autim tok long Efesas, wok bilong em i kamap gutpela na planti manmeri i bilip. Sampela bipo ol i save mekim kain kain wok marila na posin. Taim ol i kamap Kristen pinis, ol dispela nupela bilipman i mekim ol samting bambai ol inap i stap strong long spirit. Baibel i tok: “Planti manmeri i bin mekim posin na marila samting, ol i bungim buk bilong ol [i stori long wok marila na posin] na kukim long paia long ai bilong olgeta manmeri. Ol i kaunim pe bilong olgeta dispela buk, na em inap 50,000 mani Silva. Long dispela pasin tok bilong Bikpela i kamapim strong bilong en, na em i kamap bikpela na i win.”—Aposel 19:18-20.

Olsem wanem long yu? Yu bai larim “tok bilong Bikpela i kamapim strong bilong en” long yu? Sapos i gat sampela samting yu mas mekim bambai God inap tingim yu gutpela man inap long yu stap long lain ‘manmeri bilong Em,’ orait bai yu mekim ol dispela samting? (Efesas 5:3) Long dispela taim ol i bin toktok long dispela samting wantaim wanpela bikpela lain ol i save mekim wok bilong Jehova long olgeta de. Bihain ol dispela manmeri i tromoi planti plet singsing na kaset i kamapim pasin pamuk, o pasin bilong ol spirit nogut, o i litimapim pasin nogut bilong ol manmeri bilong dispela graun. Ol i no tingim pe bilong ol dispela plet singsing na kaset; nogat; ol i tingting long i stap gutpela long ol samting bilong spirit.

Ating sampela i laik bai mipela i makim wanem lain bilong singsing long nau o wanem kain musik i no gutpela long ol Kristen i harim. Tasol aposel Pol i tok: “Strongpela kaikai em i bilong ol man i kamap bikpela pinis. Kain man olsem ol i skulim tingting bilong ol yet planti taim, na ol inap pinis long skelim gutpela pasin na pasin nogut.” (Hibru 5:14) Olsem na Kristen i “bikpela pinis,” olsem em i strongpela Kristen, em i lainim pinis maus bilong bel long ol tok bilong Baibel, na em inap skelim wanem kain musik na singsing i gutpela na wanem kain musik na singsing i nogut. Yumi no ken putim planti tambu bilong bosim wokabaut bilong Ol Witnes Bilong Jehova, o wokim wanpela lista bilong ol musik na singsing ‘i tambu.’ No gat wok long yumi mekim olsem. Olgeta wan wan i ken bihainim gutpela tingting na mekim ol samting bambai Papa bilong em long heven i ken amamas long olgeta samting em i mekim, ol musik na singsing em i harim tu.—Efesas 5:18-20; Filipai 1:9-11.

[Piksa long pes 14]

Ol plet singsing bilong yu, ol i tokaut long pasin bilong ol spirit nogut, o pasin bilong kisim drak, o pasin pamuk?