Tok Bilong God i Gat Laip
Husat i Ken Kisim?
LONG MAS 29, san i go daun pinis, long olgeta hap bilong graun bai ol i mekim planti miting olsem yu lukim long piksa long antap. Ol i bung bilong tingim Jisas, em i bin i dai long bipo. Ol i salim bret na wain i go long ol man. Yu lukim? Tasol husat i ken kisim dispela bret na dring dispela wain?
Ol tok Jisas i mekim long 11-pela gutpela aposel bilong em taim em i kirapim dispela bung i helpim yumi long bekim dispela askim. Em i givim kap wain long ol aposel na em i tok: “Dispela kap wain em i nupela kontrak long blut bilong mi, mi kapsaitim bilong helpim yupela.” (Luk 22:20) Taim Krais Jisas i dai, “nupela kontrak” i kamap. Dispela “nupela kontrak” i senisim wanem ‘olpela kontrak’?—Hibru 8:13.
Em kontrak bilong Lo. God Jehova i bin wokim dispela kontrak wantaim ol Isrel taim ol i laik lusim kalabus long Isip. Moses em i namelman bilong dispela kontrak (olsem Jisas “i stap namelman bilong strongim nupela kontrak”) Ol i bin kilim i dai sampela animal olsem sakrifais long Maunten Sainai bilong kamapim dispela kontrak bilong Lo. (Hibru 9:15-20) Tasol planti manmeri bilong ol narapela lain ol i stap wantaim lain Isrel long dispela taim. Ol i bin ranawe lusim Isip wantaim ol Isrel. Dispela kontrak bilong Lo i helpim ol, tasol ol i no insait long en.—Eksodas 12:38, 43-45, 48, 49.
I wankain tu long nupela kontrak. Ol Kristen i olsem “Isrel tru bilong God,” ol tasol i insait long dispela nupela kontrak God Jehova i wokim. (Galesia 6:16) Jisas i tok ol dispela Kristen ol i “liklik lain” tasol. (Luk 12:32) Tasol i gat narapela lain tu, ol i ‘bikpela lain,’ em ol Kristen Jisas i kolim olsem ol “arapela sipsip” bilong em. (Revelesen 7:9, 10, 14; Jon 10:16) Nupela kontrak i helpim ol tu, tasol ol i no insait long en.
Aposel Jon i stori gut long dispela tupela lain, em sakrifais o ofa bilong Krais i helpim ol, taim em i tok long Krais olsem: “Em yet i mekim wok bilong tekewe sin bilong yumi [sin bilong “liklik lain sipsip”]. Na em i no mekim dispela wok bilong helpim yumi tasol. Nogat. Bilong helpim olgeta man i stap long graun.”—1 Jon 2:2.
Olsem na long dispela bung bilong tingim Krais i bin i dai, ol manmeri bilong lain “Isrel tru bilong God,” ol tasol inap kisim dispela bret na dring dispela wain. Dispela lain bilong ol Isrel bilong spirit ol inap olsem 144,000, na ol bai stap king wantaim Krais long kingdom bilong heven. Revelesen 14:1) ‘Bikpela lain manmeri,’ ol “arapela sipsip” bilong olgeta lain bilong graun, ol i no kisim bret na dring dispela wain, tasol Kingdom bai helpim ol, na bai ol inap i stap oltaim long Paradais long graun.
[Piksa long pes 4, 5]
OL “ARAPELA SIPSIP” NA “LIKLIK LAIN SIPSIP”