Yu Save Pret?

“I GAT PLANTI bikpela bagarap i painim ol man bilong nau. Em wanpela saveman bilong saiens, nem bilong em René Dubos, i tok olsem long wanpela buk bilong em (Celebrations of Life). Na em i tok: “Long nau ol man i stap bel hevi tru, tasol ol hevi i kamap long nau i no as bilong dispela bel hevi bilong ol; as bilong en, em ol bikpela bagarap ol i ting em bai kamap bihain—na ol bai kamap o nogat, em yumi no save.” Em nau, ol man save pret long ol samting bilong bihain, long wanem, ol i tingting long ol samting inap kamap long graun na ol man i no inap pasim.

Dubos i kolim wanem ol bikpela bagarap inap painim ol man long bihain? Em i tok: “Yumi tingting planti long bikpela pait nogut bai kamap na ol lain bai tromoi ol bom nuklia, na yumi tingim samting (nuklia riakta) bilong wokim nuklia, sapos ol i popaia long wanpela wok bai bikpela bagarap tru inap kamap . . . Yumi olgeta wantaim i tingting planti, long wanem yumi ting sapos ol manmeri bilong graun i wok long kamap planti tumas, na ol saveman i wokim ol kain kain samting moa, ol hevi bilong graun bai go bikpela tru. Liklik taim bai ol manmeri i pulap olgeta long graun na i pas pas, na ol kaikai wara na ol narapela samting bilong graun bai pinis, na bikpela hangre nogut bai kamap long graun.” René Dubos i save, nau pasin bilong pret na bel hevi i kisim planti man.

Alvin Toffler em wanpela saveman na man bilong raitim buk, na em i wok inap faipela yia long toktok wantaim ol kain kain man na bai em i ken save long tingting bilong ol long ol senis i wok long kamap na long ol samting bilong bihain. Em i tok, ol bikpela saveman, na ol man nating i no gat nem, na ol man bilong bisnis, ol kain kain man, ol i tingim ol senis i wok long kamap, na ol i bel hevi na tingting planti long ol samting dispela bai mekim long sindaun bilong ol, na ol i pret long ol samting bai kamap bihain. Em nau, taim dispela man i skelim tingting bilong ol dispela kain kain man, em i save, pasin bilong bel hevi na tingting planti na pret long ol samting bai kamap bihain em i go bikpela tru long olgeta hap.

Inap olsem 2,000 yia bipo Krais Jisas i tokaut stret long dispela pasin bilong pret bai painim ol manmeri bilong graun. Em i bin tok profet long haus lotu bilong Jerusalem bai bagarap, olsem na ol disaipel bilong em i laik save, “wanem taim bambai dispela i kamap? Wanem mak bai kamap pastaim, na mipela i ken save, ol dispela samting i klostu i laik kamap?”—Luk 21:7.

Taim Jisas i bekim dispela askim long ol em i kolim ol samting bai kamap insait long taim bilong ol yet, na planti man long dispela taim bipo ol i mas lukim ol dispela samting i kamap. Tasol Jisas i kolim tu ol samting bai kamap long olgeta hap graun, na i no ol Juda i bin lotu long haus lotu bilong Jerusalem i mas lukim ol dispela samting. Nogat. Ol manmeri i stap long las taim. ol yet i mas lukim ol dispela samting. Jisas i tok: “Bambai kain kain mak i kamap long san na mun na sta. Na long graun bel bilong olgeta lain man bai i bagarap tru na ol i pret long pairap long bikpela si em i bruk bruk long solwara. Planti manmeri bai ol i tingting long ol samting i laik kamap long graun, na bai bel bilong ol i pret tru, na ai bilong ol i raun. Long wanem ol sta samting bilong skai bai i guria.”—Luk 21:25, 26, 32.

Tru yumi save, ol man bilong bipo tu i bin pret long sampela samting, olsem ol i pret long ol pait i save kamap long hap bilong ol yet, o ol bikpela sik, o sampela bikpela bagarap, o sampela kain senis i painim sindaun bilong ol. Tasol olsem wanem long ol lain man ol i stap laip long 1914? Ol i bin lukim ol narapela kain samting i kamap? Em, ol i lukim. Long nem, ol manmeri bilong olgeta hap graun, em olgeta lain bilong graun, ol i pilim pinis ol dispela samting i bin kirap long 1914 na i wok long kamap inap long nau. (Luk 21:25, 26) Olsem na insait long dispela sotpela taim bilong 70 yia, planti samting i bin kamap na ol lapun i lukim pinis na ol i tingting planti na bel bilong ol i pret. Na nau long dispela taim, ol i tok long kamapim bikpela pait na tromoi ol bom nogut, na ol lapun, ol yangpela, ol pikinini tu, olgeta i pret na tingting planti long i stap bilong ol long bihain. Olsem na ol saveman i tok stret taim ol i tok, nau long dispela taim, namba wan bikpela tingting i stap long bel bilong ol manmeri em PRET.

Tasol ating yu ting ol man i no save pret tumas olsem mipela i tok. Tasol olsem wanem? Dispela pasin bilong pret long ol hevi bilong nau na bilong bihain em i kisim pinis planti lain man bilong nau na yumi inap tok dispela pret i truim tok profet bilong Jisas? Em i wanpela mak tru bilong yumi ken save yumi stap nau long las taim? Na taim Jisas i tok, “Planti manmeri bai ol i tingting long ol samting i laik kamap long graun, na bai bel bilong ol i pret tru, na ai bilong ol i raun,” dispela tok bilong Jisas i makim taim bilong yumi yet, o olsem wanem?