Long Nau Planti Man i Pret—Tasol i No Bilong Oltaim!
OL MAN i skul gut long Baibel ol i no kirap nogut long lukim pasin pret i kamap planti. Ol Witnes Bilong Jehova i mekim bikpela wok bilong autim tok long ol planti samting i makim olsem yumi stap long wanpela bikpela taim. Yu save, long nau ol manmeri long olgeta hap ol i pret. Tasol longtaim bipo Jisas i bin mekim ol tok i makim taim bilong yumi. Em i bekim tok long ol aposel, em ol i askim em wanem taim bai em i kam bek i stap na “dispela graun i laik pinis,” olsem las de bai kamap.—Matyu 24:3.
Hap tok Jisas i bekim long ol em olsem:
“Ol man bilong sampela lain bai i kirapim pait long ol narapela narapela lain. Na ol lain bilong sampela king bai i kirapim pait long ol lain bilong ol narapela narapela king. Ol bikpela bikpela guria bai i kamap long graun. Na long sampela hap ol bai i gat taim bilong bikpela hangre na bikpela sik. Na long skai yupela bai i lukim ol bikpela bikpela mak na ol kain kain samting bilong mekim yupela i pret nogut tru.”—Luk 21:10, 11.
Yu lukim tok bilong em, em i tok, ol bai i lukim ‘kain kain samting bilong mekim ol i pret nogut tru’? Bihain liklik em i mekim narapela tok long pret em inap mekim sampela samting long yu yet na ol famili bilong yu. Tasol pastaim yumi ken stori long sampela samting moa i makim olsem yumi stap long taim bilong las de.—2 Timoti 3:1.
I Stret Ol i Pret Long Bikpela Pait
Ol bikpela pait i bin kamap na bagarapim planti hap bilong graun. Wanpela nius (Geo) i tok, taim pait bilong Midel-Is i pinis na ol soldia i kirapim paia long ol bikpela hul bilong kisim wel long en, “dispela em i wanpela samting nogut tru bilong bagarapim graun, na bipo ol man i no bin mekim kain samting nogut olsem long graun.” Ol pait i bin kilim i dai na bagarapim planti milion manmeri. Long Namba Wan Pait, sampela milion soldia na ol lain i no soldia ol i dai, na long Namba 2 Pait inap 55 milion ol i dai. Yu tingim tok bilong Jisas? Em i kolim wanpela samting bai makim las de i klostu, olsem: “Ol man bilong sampela lain bai i kirapim pait long ol narapela narapela lain. Na ol lain bilong sampela king bai i kirapim pait long ol lain bilong ol narapela narapela king.”
Na sampela man i bin wok long kilim i dai olgeta manmeri bilong wanpela lain o skin na pinisim dispela lain olgeta. Ol i bin kilim i dai planti milion Amenia, Kambodia, Juda, Ruanda, Yukren, na ol narapela lain—ol man bilong graun long taim bilong yumi ol i gat bikpela asua tru long kapsaitim blut bilong ol man. Na ol i wok yet long kilim i dai ol man long ol kantri i gat pasin birua i stap namel long narapela narapela lain bilong kantri, na ol man i strong tumas long lotu ol i kirapim dispela pasin birua. Tru tumas, ol bikpela pait i stap yet na blut bilong planti man i kapsait long graun.
Ol pait bilong nau i bagarapim ol man long taim pait i pinis tu. Olsem: Long taim bilong pait ol i haitim ol liklik bom nabaut insait long graun. Wanpela ripot (bilong Humans Rights Watch) i tok, “i gat inap olsem 100 milion liklik bom i hait insait long graun long planti kantri na ol inap bagarapim ol man nating.” Bihain bihain long taim pait i pinis ol dispela bom i bagarapim yet ol man meri pikinini i no gat asua. Ol man i tok, long olgeta mun ol dispela kain bom i kilim i dai o bagarapim planti tausen manmeri long 60 samting kantri. Bilong wanem ol i no wok long rausim ol dispela bom ol inap kilim i dai o bagarapim tru ol man? Nius The New York Times i tok: “Ol i planim planti bom moa long olgeta de, winim tru ol bom ol i wok long rausim, olsem na long olgeta taim planti manmeri moa i kisim bagarap long ol dispela bom.”
Dispela stori bilong nius long 1993 i tok, ol man i mekim bikpela wok bisnis long baim ol dispela bom i go long ol man na long olgeta yia ol i kisim bikpela mani “inap 200 milion kina.” “Inap 100 kampani na lain bilong gavman long 48 kantri” ol i wokim “340 kain bom olsem” na baim i go long ol narapela kantri. Samting nogut tru em olsem: Ol i wokim sampela bom olsem samting bilong pilai bilong pulim ol pikinini i go holim! Olaman! Ol i laik bagarapim ol liklik pikinini i no gat asua! Edita bilong wanpela nius i raitim stori, het-tok bilong en: “100 Milion Masin Nogut.” Em i tok, ol dispela bom i hait insait long graun i bin “kilim i dai na bagarapim planti man moa, winim ol man i bagarap long ol bom i gat marasin nogut na ol bom nuklia.”
Ol bikpela bisnis long olgeta hap bilong graun i baim ol dispela bom i go long ol man na ol narapela samting tu bilong kilim i dai ol man. Ol i mangalim mani na ol i baim ol samting bilong pait i go long ol man, na ol i kisim bikpela winmani, inap planti bilion kina. Wanpela nius i tok: “Insait long 10-pela yia i go pinis, wanpela bikpela kantri i baim ol samting bilong pait i go long ol narapela kantri na kisim bikpela mani inap olsem 135 bilion kina.” (The Defense Monitor, bilong Center for Defense Information) Dispela strongpela kantri “i orait long baim planti samting bilong pait i go long 142 kantri, na ol i wokim ol haus samting bilong ami, na skulim ol soldia, na ol i kisim bikpela mani moa yet, inap 63 bilion kina.” Long rot bilong dispela wok bisnis planti pait moa bai kamap na planti man moa bai kisim pen na hevi. Dispela nius (The Defense Monitor) i tok, “long wanpela yia tasol, em yia 1990, i gat ol pait em 5 milion soldia i insait long en, na ol dispela pait i pinisim 50 bilion kina, na kilim i dai 250 tausen manmeri, em planti ol i no soldia. Na i wankain long ol narapela yia tu.” Yu inap tingim planti bikpela pait i bin kamap bihain long yia 1990, a? Ol dispela pait i mekim planti milion manmeri moa i pret na kilim ol i dai!
Bagarapim Moa Dispela Graun na Ol Samting i Stap Laip Long En
Profesa Barry Commoner i toksave olsem: “Mi ting sapos ol man i wok yet long bagarapim graun na i no gat samting bilong pasim ol, bihain bai yumi no inap i stap moa long graun.” Em i tok moa olsem, pasin mangal i as bilong dispela hevi; i no olsem ol man i no gat save. God bilong yumi em i gat stretpela pasin na em i laikim tru yumi, olsem na yu ting em bai larim dispela pasin nogut i stap oltaim, na oltaim bai yumi pret moa yet, nogut graun na win na wara i bagarap olgeta? Ol man i bagarapim graun na ol i mas kot long God na em bai stretim bek dispela graun. Em hap tok Jisas i mekim taim em i bekim tok long ol aposel long ‘las de bilong dispela graun.’
Bihain yumi ken stori long ol samting God bai mekim bilong stretim dispela hevi, tasol pastaim yumi ken stori moa long ol samting ol man i bin mekim. Sapos yumi tingim sampela samting tasol ol i bin mekim na ol i bagarapim graun, bai yumi bel hevi. Em ol samting olsem: ren i gat strongpela marasin long en na pasin bilong katim planti diwai tumas i pinisim ol bikpela hap bus; ol i no rausim gut pipia bilong marasin nuklia, na ol strongpela marasin, na pekpek samting; ol i bagarapim win oson long antap em bilong lukautim graun; ol i tromoi nabaut ol marasin bilong pinisim gras nogut na ol binatang nogut.
Bilong kisim winmani ol i mekim ol wok bisnis i bagarapim graun long ol narapela rot tu. Long olgeta de ol i tromoi planti milion ton pipia i go insait long ol bikpela na liklik wara, na solwara, na win, na graun. Ol saveman bilong saiens i salim planti roket samting i go long antap na taim ol i kamap olpela pinis ol i no rausim. Ol dispela pipia i raun raun long antap na ples antap i kamap olsem ples pipia. God i wokim planti samting long graun na bai graun inap stretim bek em yet; sapos nogat, bai ol samting i no inap i stap laip moa long en, na longtaim pinis ol pipia ol man i kamapim i bagarapim pinis ol yet.
Ol man i save bagarapim tu skin bilong ol. Tingim pasin bilong smok na kisim ol drak. Long Amerika pasin bilong kisim ol drak na dring em “nambawan samting i givim sik long ol man.” Dispela kantri i save tromoi 238 bilion kina long olgeta yia bilong stretim ol sik i kamap long dispela rot, na 34 bilion kina bilong en i bilong “stretim ol sik ol inap abrusim.” Olsem wanem long kantri yu stap long en? Pasin bilong smok i pinisim hamas mani na i bagarapim hamas man?
Planti man i orait long kain kain pasin na ol i mekim ol narakain pasin pamuk na ol i tok, i stret ol i ken mekim; em laik bilong wan wan. Dispela i mekim na olkain sik nogut bilong pamuk i kamap na i kilim i dai planti man taim ol i no lapun yet, na ol man i pret. Long ol nius long ol biktaun ol i putim lista bilong ol man i dai pinis, na sapos yu skelim ol dispela lista bai yu lukim olsem long nau planti man i dai taim ol i gat 30 o 40 krismas tasol. Wanem as bilong dispela? Pasin ol yet i mekim i bagarapim ol. Olkain sik bilong pamuk na ol narapela sik i kamap bikpela na dispela tu i stret long tok profet bilong Jisas, long wanem, em i tok, “Long sampela hap ol bai i gat . . . bikpela sik.”
Tasol wanpela bagarap nogut i painim ol man, em olsem: Tingting na pasin bilong ol i bagarap. Sapos yu tingim gen olkain bagarap yumi bin stori long en, as bilong planti i olsem: Tingting bilong ol man i paul na i nogut. Tingting bilong planti man i nogut na i olsem i gat sik na ol i kirap kilim man i dai, reipim meri, stil, bagarapim nabaut ol man. Planti manmeri i save, long olgeta yia ol meri na ol dokta i kilim i dai planti pikinini long rot bilong rausim bel, na dispela i makim olsem tingting bilong ol manmeri i bagarap na ol i bagarap long ol samting bilong spirit.
Yumi lukim kain kain tingting na pasin bilong ol yangpela. Planti ol i bikhet long papamama na ol narapela man i gat wok long bosim ol, olsem na planti famili i bruk, na ol yangpela i sakim ol lo na mekim nabaut. Ol i no pret na daun long ol man i gat wok long bosim ol, na ol i no tingim ol samting bilong spirit. Olsem na ol man i skulim ol yangpela long tok bilong evolusen, na i no gat God, na ol narapela tok i save bagarapim bilip bilong man, ol dispela man i gat bikpela asua. Narapela lain i gat bikpela asua em ol tisa bilong lotu. Ol i laik bai ol man bilong nau i laikim ol na ol i kamapim ol tok i stret long tingting bilong ol man bilong nau, na ol i givim baksait long Baibel, em Tok Bilong God. Save bilong graun i paulim tingting bilong ol na ol i autim tok na tingting bilong ol man, em narapela tok i pait long narapela tok.
Ol samting i kamap long dispela rot i stap ples klia. Ol manmeri i no laikim tru God na ol man; ol i mangalim mani na bel nogut long ol narapela na dispela i kirapim ol long mekim ol samting ol i mekim. Kaikai nogut i kamap—pasin pamuk na pasin sem na pait i pulap long olgeta hap, na planti man i pilim olsem i no gat wanpela gutpela samting ol i ken wetim i kamap. Sori tru, dispela i mekim na ol man i gat gutpela bel ol i tingting planti, nogut ol man i bagarapim olgeta manmeri na dispela graun tu.
Bai Kamap Gutpela o Go Nogut Moa Yet?
Olsem wanem long pasin pret bihain? Em bai kamap bikpela, o bai i no gat pret moa? Orait, yumi ken tingim gen ol tok Jisas i mekim long ol aposel.
Em i stori long samting bai kamap klostu nau—em taim bilong bikpela hevi tru. Em i tok olsem: “Taim bilong ol dispela bikpela hevi i pinis, orait kwiktaim san bai i kamap tudak, na mun bai i no moa lait, na ol sta bai i lusim skai na pundaun, na ol strongpela samting i stap long skai bai i guria. Long dispela taim mak bilong Pikinini Bilong Man bai i kamap long skai na olgeta lain manmeri bilong graun bai i krai. Na ol bai i lukim Pikinini Bilong Man i stap antap long ol klaut bilong heven na i kam wantaim bikpela strong na bikpela lait bilong en.”—Matyu 24:29, 30.
Olsem na yumi save, klostu nau bai dispela bikpela hevi tru i kirap. Ol narapela tok profet bilong Baibel i makim olsem ol lotu giaman long olgeta hap bilong graun bai bagarap pastaim. Na ol samting Baibel i kolim na i mekim ol man i pret, bihain ol dispela samting bai kamap, na sampela samting bai kamap long skai. Dispela bai mekim wanem long planti milion manmeri?
Orait, tingim wankain stori long narapela hap bilong Baibel i kamapim ol tok Jisas i bekim long ol aposel na i tok profet olsem:
“Long dispela taim ol kain kain mak bai i kamap long san na long mun na long ol sta. Na long graun tingting bilong olgeta lain man bai i bagarap tru na ol bai i harim pairap bilong bikpela si i bruk bruk long solwara, na ol bai i tingting planti na pret moa yet. Planti manmeri bai i tingting long ol samting i laik kamap long graun, na ol bai i pret tru na ai bilong ol bai i raun, long wanem, ol strongpela samting bilong skai bai i guria.”—Luk 21:25, 26.
Dispela i no kamap yet. Tasol i no olgeta manmeri bai pret na airaun long dispela taim. Nogat. Jisas i tok: “Taim ol dispela samting i stat long kamap, orait yupela i mas sanap na litimapim het bilong yupela, long wanem, taim bilong God i kisim bek yupela em i kam klostu pinis.”—Luk 21:28.
Em i mekim dispela gutpela tok long ol disaipel bilong em. Ol i no ken pret na airaun. I gat as na ol i ken litimapim het, maski laspela samting bilong taim bilong bikpela hevi klostu bai kamap. Bilong wanem ol i no ken pret?
Long wanem, Baibel i tok klia olsem sampela manmeri bai winim taim bilong “bikpela hevi.” (KTH 7:14) Baibel i tok promis olsem na i tok, sapos yumi abrusim bagarap long dispela taim, bai yumi kisim ol gutpela blesing tru long han bilong God. Na bihain Baibel i tok promis olsem Jisas bai “i stap wasman bilong ol. Em bai i bringim ol i go long ol hul i gat wara i kamap, em wara bilong givim laip. Na God bai i mekim drai wara bilong ai bilong ol, na ol bai i no krai moa.”—KTH 7:16, 17.
Ol manmeri i kisim ol dispela blesing—em yumi inap insait long lain bilong ol—bai ol i no pret moa long ol samting ol man i pret long en long nau. Tasol i no olsem ol i no gat tru pasin bilong pret—Baibel i tok i gat gutpela kain pasin pret. Tok i kamap bihain long dispela bai stori long dispela kain pasin pret na em i mas mekim wanem long yumi.
[Piksa long pes 8]
Ol manmeri i lotu long Jehova ol i amamas na wetim nupela taim klostu nau bai kamap
[Piksa Kredit Lain long pes 7]
Pollution: Photo: Godo-Foto; rocket: U.S. Army photo; trees burning: Richard Bierregaard, Smithsonian Institution