Ol Liklik Bom—Kamapim Bagarap Long Olgeta Hap
LONG olgeta mun ol liklik bom ol i planim nabaut long graun i bagarapim o kilim i dai nating planti tausen man meri pikinini long 60 samting kantri. Ol i tok dispela kain bom i bin kilim i dai o bagarapim planti man moa, winim tru ol bom i gat marasin nogut o sik long en na ol bom nuklia. Wanpela lain (Human Rights Watch) i skelim dispela samting na ol i tok, long Kambodia ol liklik bom i bin bagarapim han lek samting bilong 30,000 manmeri, na i wankain long ol narapela kantri tu.
Long planti ples i gat pait ol i bin haitim ol dispela liklik bom insait long graun, na planti ol i stap yet. Ol man i ting inap 100 milion i stap yet long 60 samting kantri. Taim man i wokabaut klostu long bom, bom i pairap. Ol ami i laikim dispela kain bom, long wanem, i no gat bikpela pe na i wok gut. Pe bilong wanpela kain bom olsem em K3 tasol, na pe bilong narapela em K27—em i save pairap na sutim 700 liklik bal ain i go nabaut na em inap kilim i dai man i stap longwe inap 50 mita. Ol man bilong pait i laik kisim planti moa, olsem na nius The New York Times i tok, long nau 48 kantri i save wokim 340 kain bom olsem na baim i go long ol narapela kantri. Ol man i haitim planti moa insait long graun long olgeta de, winim ol bom ol i rausim bilong stretim ples.
Wok bilong painim na rausim ol liklik bom em hatwok na i pulim bikpela mani, long wanem, ami i no wokim mep na makim ol bom i stap we, na nau ol i wokim planti bom long diwai o plastik, na masin bilong painim ain insait long graun i no inap painim bom. Wanpela memba bilong gavman long Amerika (Patrick Leahy) i laik tambuim pasin bilong baim i go ol dispela bom long narapela kantri, na em i tok: “Ol liklik bom ol Jemani i bin putim long Namba 2 Pait i kilim i dai yet planti man long Netelan. Dispela samting i moa nogut long Afganistan, Kambodia, Angola, Bosnia, na olgeta narapela kantri ol i bin putim planti liklik bom moa yet long en.”
Nupela taim God i laik kamapim, em tasol inap stretim ol dispela hevi. Baibel i tok promis olsem: “Em [God] i save mekim i dai pait long olgeta hap graun. Em i save brukim olgeta banara na spia, na i save kukim ol hap plang long paia.”—Song 46:9.