Long Bilip Bilong Em Ol i Kilim Em i Dai
MAMA i karim em long Tudela, long Spen, long yia 1511. Em i go long Paris, long Frans, bilong lain long kamap dokta, na bihain em i wok long narapela narapela hap bilong Frans. Em i kisim nem long ol save em i kisim long wok bilong blut long waitlewa bilong man.
Tasol inap planti yia em i mas ranawe i go long ol narapela narapela hap na senisim nem bilong em na hait. Long wanem, ol man i birua long em. Em i laik i go long Itali, tasol pastaim, long Ogas 13, 1553, em i go long Jeneva, long Swiselan. Wanpela man i luksave long em. Olsem na ol i holim em, na long Ogas 14 ol i bringim em i go long kot. Dispela Talatala, John Calvin em i putim em long kot na kot i tok em mas i dai! Olsem na long Oktoba 27, 1553, ol i kisim em i go ausait long taun Jeneva na pasim em long pos na kukim em long paia.
Dispela man em i husat? Em Maikel Sevetas. Em i bin mekim wanem rong? Ating em i bin kilim wanpela man i dai? O ating em i bin pulim mani bilong wanpela man? O em i bin mekim narapela bikpela rong? Nogat. Ol i kilim em i dai, long wanem, em i no bilipim wanpela tok bilong ol misin ol i kolim Kristen. Dispela tok i olsem: God em i tripela o God Triwan.
Long nau tu ol man i tok pait long dispela tok. Sampela ol i bilipim na sampela, nogat. Wanpela evanselis long Amerika, em Billy Graham, em i tok: “Baibel i tok Krais Jisas em i God na em i no liklik long God Papa.” Tasol sampela man i gat narapela tingting. Sampela yia i go pinis wanpela pasto bilong lotu Pentikostal em i raitim tok long wanpela nius (The Denver Post) na em i tok em bai givim 1 milion dola long man em inap painim tok bilong God Triwan long Baibel. Dispela pasto i tok ol man yet i bin kamapim dispela tok na “i no stret na ol man i no inap save long en.”
Tasol ating bai yu tok, ‘Maski, em i no bikpela samting. Ol samting yu bilip long en, em i no bikpela samting.’ Tasol em i bikpela samting. Bilong wanem em i bikpela samting? Long wanem Jisas i tok: “Na laip i stap gut oltaim em i olsem: Ol i save long yu, yu wanpela tasol yu God tru, na ol i save long Jisas Krais, em yu bin salim i kam.” (Jon 17:3) Sapos yumi laik kisim laip i stap oltaim yumi mas kisim stretpela save long dispela wanpela God em i “God tru.” Orait, yu tingting: Wanem tok i stret? Krais Jisas em i Pikinini bilong God o em i God Pikinini? Dispela tupela tok i narapela narapela kain tru!