No Ken “Pait long Bainat”—Na Dispela Bai Lukautim Yu
“PUTIM bek bainat bilong yu long ples bilong en”! Jisas i tok strong olsem. ‘Bikpela lain man ol i gat bainat na stik’ ol i kam bilong holim Jisas na mekim kot giaman long em na ating long kain taim olsem i gutpela sapos ol disaipel i mekim pait bilong helpim em? Wanpela disaipel i ting olsem na em i pulim bainat bilong em. Em i laik helpim Jisas. Yu ting i stret em i mekim olsem?
Tasol Jisas i no laik bai ol i mekim pait. Olsem na em i tok strong long Pita, olsem: “Putim bek bainat bilong yu long ples bilong en. Olgeta man i pait long bainat, bai i lus long bainat. Ating yu no save, mi inap askim Papa bilong mi, na em i ken givim mi planti ensel moa, i winim 12-pela lain ami?”—Matyu 26:47, 52, 53.
Ol Kristen long nau tu ol i no save mekim pait long gan o naip samting bilong lukautim skin bilong ol. Ol i stap long taim nogut bilong “planti hevi,” tasol ol i no bilip long ol gan o naip inap helpim ol. (2 Timoti 3:1) Ol i tingim gut tok bilong Baibel i tok ol i mas “wokim ol bainat bilong ol i kamap samting bilong mekim wok gaden.” Ol i no laik bagarapim narapela man. (Aisaia 2:4, NW) Ol i no save karim naip samting bilong sakim man nogut, olsem na sapos wanpela man i laik bagarapim ol bai ol i no mekim pait, ating bai ol i traim toktok wantaim dispela man bilong pasim em long mekim dispela pasin nogut. Ol i save bihainim tok bilong Baibel i tok: “Sapos i gat rot, orait yupela i mas i stap wanbel wantaim olgeta man.” (Rom 12:18) Tasol sampela taim i hatwok long sakim pasin bilong “pait long bainat.” Tru, Kristen i laik i “stap wanbel wantaim olgeta man,” tasol sampela taim i hatwok long Kristen i mekim olsem.
Kain traim olsem i bin kamap long wanpela kantri long Afrika sampela yia bipo. Ol lain bilong dispela kantri yet i pait. Narapela lain i laik daunim narapela lain na bai ol yet i kamap gavman. Bikpela pait i kamap. Gavman i singautim ol man i go insait long ami. Tasol ol lain i birua long gavman ol i strong long ol man i mas insait long lain bilong ol. Ol i subim ol wanples bilong ol long helpim ol, tasol ol soldia bilong gavman i save paitim nogut ol man i helpim ol birua bilong gavman.
Pasin bilong pait na bagarapim man i kamap bikpela long olgeta hap bilong dispela kantri. Tupela marit i mekim wok painia, tupela i save dispela pait inap bagarapim tupela tu. Olsem na taim ol i raun long ka bilong autim tok, ol i save putim paus bilong ol i gat buk long en namel long ol yet na dua bilong ka bilong sakim katres bilong gan. Tupela yet i no kisim bagarap, tasol tupela i bin i go lukim wanpela lapun man na meri bilong em, na birua i painim tupela lapun hia. Ol i sutim na kilim i dai dispela lapun man. Na wanpela famili tupela painia hia i save go lukim ol, wanpela apinun ol birua bilong gavman i kam kukim haus bilong dispela famili na olgeta samting i stap long en. (Bihain dispela famili i salim pas long Sosaiti Was Taua na ol i tok ol i laik kisim dispela buk Sosaiti i wokim, nem bilong en: Bel Isi na Gutpela Sindaun—Bai Kamap Olsem Wanem?)
Bikpela pait i kamap na planti man i pret na bel bilong ol i guria. Ol i tingting long mekim pait bambai ol i no ken bagarap. Ol i tingting olsem: “Ating i no stret sapos man i sanap nating na larim ol narapela man i kilim i dai em yet o famili bilong em.” Planti ol i kisim naip o gan samting na karim raun wantaim ol. Na ol Witnes Bilong Jehova long dispela ples i gat pait ol i tingting olsem: “Mipela mas mekim wanem?”
Ol Man i Laik Putim Ol long Kalabus
Ol Witnes Bilong Jehova i wanbel long tingting olsem: Ol i no ken insait long pait na helpim narapela lain na daunim narapela lain. Ol i mas stap namel tasol. Na ol i no ken holim gan samting. Tasol ating dispela tingting bilong ol i no stret na ol inap bagarap? Nogat. Ol samting i bin painim ol i soim yumi, tingting bilong ol i stret.
Wanpela yangpela man, nem bilong em Toni, bipo em i bin insait long ami. Tasol taim em i kamap Kristen, em i pilim olsem em i no ken ‘pait long bainat’ moa, em i no laik bagarapim ol narapela man. Olsem na taim ol i singautim em i go insait gen long ami, em i tok em i no laik, olsem na em i kot na em i baim kot. Bihain liklik ol i singautim em gen i go insait long ami, na long dispela taim ol i tok em i mas kalabus inap 6-pela mun. Na bihain, namba tri taim ol i singautim em na kot i tok em i mas kalabus inap 10-pela mun, em i apil bambai bikpela kot i ken kot bilong em. Inap tupela yia en planti taim, na olgeta taim em i kot em i ting em bai kalabus na inap 10-mun bai em i no inap lukim meri bílong em. Em i tok: “Insait long dispela yia mi gutbai long meri bilong mi inap 13 taim, tasol long olgeta taim mi go kot, sampela samting i bin kamap na mi no kalabus.”
Insait long dispela tupela yia, Toni wantaim meri bilong em i kirap mekim wok painia spesel, na long ai bilong gavman em i olsem wanpela pasto. Tasol lo i tok em i mas kalabus inap 10-pela mun. Bihain em i kisim pas, na dispela pas i tok, sapos em i tok em i gat rong, orait em i no ken kalabus. Toni i tok: “Mi tokim ol, mi no ken tok mi gat rong, long wanem mi save mi no gat rong.” Olsem na em i wet, em i ting bihain bai em i mas kalabus. Bihain moa em i kisim pas, na dispela pas i tok bikpela kot i bin skelim ol samting na ol i tok ol i no inap kotim em, em i no ken kalabus! Toni i pilim olsem Jehova i bin blesim em, long wanem em i no laik “pait long bainat.”
Tasol planti Kristen, ol i bin kalabus planti taim. Ol i lusim kalabus, na wantu gavman i singautim ol gen i go insait long ami, na ol i mas kot gen na kalabus gen. Dispela samting i givim bikpela hevi long ol brata i marit na i gat pikinini! Tasol ol dispela brata i no insait long pait, ol i no kisim bagarap long dispela pait na bel bilong ol i stap stret long ai bilong Jehova.—1 Pita 3:16.
Lukautim Famili—Tasol No Gat Gan Samting!
Wanpela man, nem bilong em Wil, em i no laik mekim pasin pait, na dispela samting i bin lukautim em. Em wantaim meri bilong em na faipela pikinini bilong tupela i gat wanpela liklik fam i stap longwe long taun inap 64 kilomita. Taim ol i raun long rot bilong i go long ol miting o bilong mekim narapela wok long taun, bagarap inap painim ol, olsem na ating sampela man i ting i stret Wil i mas kisim gan samting bilong lukautim famili bilong em. Tasol Wil i pilim pinis gutpela samting inap painim man sapos em i wetim Jehova i helpim em. Sampela yia bipo, Wil i bin mekim wok bisnis long tabak, na em i kisim bikpela mani long dispela rot. Tasol taim em i kaunim Wastaua i tok i no stret long Kristen i wok bisnis long dispela samting, em i kamautim tabak long gaden bilong em na planim ol narapela samting bilong baim i go long ol man. Ol manmeri long hap bilong em ol i kirap nogut long dispela samting em i mekim. Ol i ting em i mekim longlong pasin. Tasol i gat gutpela ren samting, na maski i gat sampela taim nogut tu, tasol nupela wok bisnis bilong em i kamap gutpela! Ol manmeri long dispela hap ol i kirap nogut! Wil wantaim famili bilong em i pilim tru tok promis bilong Jehova. Em i tok em i no inap lusim ol wokboi bilong Em.—Hibru 13:5.
Taim pait i kirap long hap bilong Wil, nau narapela traim i painim em. Bai em i bihainim yet gutpela pasin Kristen o nogat? Tasol em i tingim ol samting i bin kamap long namba wan traim, na em i no kisim gan samting bilong lukautim famili bilong em. Em i baim wanpela haus long taun, na bai meri pikinini inap i go long ol miting na i go long skul samting na ol i no ken i go i kam long longwe rot (177 kilomita) na bagarap i painim ol.
Wanpela nait, ol i stap long taun na sampela man i pait long gavman ol i brukim haus bilong ol long fam na stilim sampela samting bilong ol. Tasol ol i no kukim haus bilong Wil na bagarapim ol samting long haus olsem ol i save mekim long haus bilong planti man. Bilong wanem ol i no bin mekim olsem? Ol dispela man i pait long gavman ol i tokim ol wokboi bilong Wil, ol i save long “Bos Wil” na ol i save em i wanpela Witnes Bilong Jehova, ol i tok ol i save em i gutpela man na em i save mekim gut long ol wokboi bilong em! Em nau gutpela pasin Kristen bilong Wil i helpim em, gan nogat!
Wanpela Samting Em Inap Tru long Lukautim Yumi
Ol dispela stori nau yumi kaunim, em inap helpim yumi long save, Jehova i save blesim ol man i no save insait long wok politik na ol man i no save “pait long bainat.” Tru, sampela taim, Jehova i larim ol man i kilim wanpela wokboi bilong em. Ol i bin kilim i dai wanpela wasman sekit long dispela hap. Tasol pasin bilong wetim Jehova i helpim yumi, dispela i winim tru pasin bilong pret long man. (Matyu 10:28) Nau yumi stap long taim nogut bilong pait na bagarapim man, tasol dispela samting i no ken kirapim yumi long mekim pait long gan samting bilong lukautim skin bilong yumi. Nogat. Yumi no ken pret na kisim gan samting bilong lukautim yumi. Yumi mas bilip long Jehova. Baibel i tok: “Sapos man i pret long arapela man, dispela i olsem wanpela umben em i taitim pinis na i pasim em yet. Tasol sapos man i bilip strong long [Jehova], bai em i stap gut.”—Provep 29:25.
[Rait long pes 15]
Ol Kristen long nau tu ol i tingim tok bilong Baibel i tok ol i mas “wokim bainat bilong ol i kamap samting bilong mekim wok gaden”
[Rait long pes 16]
“Sapos i gat rot, orait yupela i mas i stap wanbel wantaim olgeta man”