Sapos Olgeta Lain i Stap Wanbel, Wanem Samting Inap Kamap?
‘MASKI yumi Hindu o Katolik o Juda o Luteran o Kweka o Muslim o Budis o Amis o Momon, tasol sapos yumi wok strong long mekim graun i kamap gutpela ples, olsem yumi save wok strong long i go long heven, bai graun i kamap wanpela gutpela klinpela ples tru.’
Wanpela man bilong Amerika, nem bilong em Mel Ellis, em i kamapim tingting bilong planti man long nau na em i tok olsem. Na yumi tu yumi laik bai graun i kamap gutpela ples, a? Tasol ol man i stap birua birua. Ol i strong long bihainim lotu bilong ol yet na litimapim ples bilong ol yet, na dispela pasin i kirapim ol man long bel nogut long narapela man na i kamapim planti pait long graun.
Tasol sapos olgeta manmeri i gat wankain tingting na wankain laik, dispela graun inap kamap gutpela ples. Bai ol pait i pinis. Na bai ol man i no resis moa long hipim planti samting bilong pait. Bai ol i no bagarapim moa skin o tingting bilong ol man long ol pait. Bai ol famili i no bel hevi moa long wanpela famili bilong ol i dai long pait.
Long nau ol i save tromoi bikpela mani tru, inap olsem 800 bilion kina, long olgeta yia long wokim ol bom samting bilong redi long pait. Bikpela mani na strong nau ol i putim bilong redim ol samting bilong pait, sapos ol i putim dispela bilong wokim ol haus na hausik, na bilong helpim ol man bambai ol i gat klinpela wara na gutpela skul samting, maski nau ol samting i no gutpela olgeta, tasol bai graun i kamap gutpela ples! Na sapos ol i mekim olsem, orait bai olgeta man i gat wok na bai ol inap wokim planti gutpela samting bilong helpim olgeta man. Sapos olgeta manmeri i wok gut wantaim bai olgeta i gat planti kaikai. Wanpela edita bilong Frans, em André Fontaine, em i tok: “I gat planti samting inap long olgeta man, tasol yumi no save mekim wok long ol dispela samting bilong helpim ol.”
Sapos olgeta manmeri i stap wanbel na wok gut wantaim, bai yumi stap gutpela tru! Bai narapela i sori long narapela na i no ken resis long winim em o bel nogut long em. Bai gutaim i stap; narapela man i no ken bagarapim nating narapela man. Bai olgeta manmeri i stap wanbel na ol i no ken tingim ples na lain bilong ol yet tasol na i stap birua birua.
Tasol olsem wanem kain bikpela senis olsem inap kamap? Pastaim tingting bilong ol man i mas senis. Ol i no ken lain moa long ol samting i save brukim ol i stap narapela narapela lain. Ol i mas lain long bihainim stretpela pasin na bihainim ol lo bilong God. Tasol husat i lainim ol man olsem bambai ol i ken i stap wanbel? Yu ting ol man bilong politik o bisnis i lainim ol olsem? o ol misin?
Baibel i bekim gut tok long maus bilong Jeremaia: “O Jehova, mi save tru, man bilong graun i no inap bosim wokabaut bilong em. I no wok bilong man long bosim wokabaut bilong em.”—Jeremaia 10:23, NW.
Wanpela man bilong Nowe (em dairekta bilong International Peace Research Institute), nem bilong em Mark Thee, em i wanbel long dispela tok bilong Baibel, na em i tok: ‘Long nau, long olgeta hap bilong graun bikpela hevi i kamap long wok bisnis na wok gavman na wok ami na wok misin samting. Ol man i stap birua birua. Pasin bilong pait na bagarapim man, dispela pasin i kamap bikpela. Ol man i ting pait tasol i rot bilong stretim hevi. Ating ol i no inap i stap sekan.’
Yumi skelim ol samting i bin kamap na yumi save, ol man i no inap bosim wokabaut bilong ol, a? Ol i no save long ol samting ol i mas mekim bambai ol i ken sindaun gut wantaim na i stap wanbel. Tasol sampela man i pilim olsem bihain bai gutaim i kamap na bai olgeta lain man i stap wanbel. Tasol yumi skelim ol samting i kamap pinis na olsem wanem? Yu ting yumi ken wetim ol man i kamapim gutaim? Na sapos nogat, orait, i gat wanem rot bilong kamapim gutaim?
[Piksa long pes 4]
Tingim ol gutpela samting ol man inap mekim sapos ol i mekim gutpela wok long mani nau ol i tromoi bilong wokim ol samting bilong pait