1914—Em Bikpela Yia

“MIPELA no save wanem samting tru bai kamap long yia 1914, tasol mipela i save, long 1914 bai taim bilong planti hevi i kirap, winim olgeta taim bipo; long wanem planti tok profet bilong Baibel i makim olsem. Bilip bilong mipela i strong na tingting bilong ol man i no as bilong ol samting mipela wetim i kamap.”

A. H. Macmillan i mekim dispela tok long wanpela buk em i raitim long 1957 (Faith on the March). Em i stori long bilip bilong em olsem Baibel i makim 1914 i bikpela yia. Em i raitim dispela tok 40 yia samting bihain long 1914 na dispela bilip bilong em i stap strong.

Ol Samting Bai Kamap

Olsem wanem? Tru 1914 i bikpela yia? Tru tumas! Orait, nau yumi ken skelim ol samting Macmillan na planti Witnes moa ol i wetim i kamap long dispela yia.

Wastaua (tok Inglis) bilong Mas 1880 i stori long tupela bikpela samting ol i wetim i kamap long 1914, em olsem: Taim bilong ol man bilong ol arapela lain bai pinis long 1914, na Kingdom bilong heven bai kirap mekim wok bilong en. Olsem na planti Witnes i wetim kingdom bilong God i kamap long heven long 1914. Na taim bilong Krais i mekim wok king ‘namel long ol birua,’ na taim bilong pinis bilong dispela pasin nogut bilong nau, i mas kirap.—Sam 110:1, 2; Matyu 24:3; Revelesen 12:10, 12.

Ol dispela man bilong lainim tok bilong Baibel ol i skelim gut ol de na yia Baibel i makim na ol i wetim ol dispela samting i kamap. Ol de na yia Baibel i makim em wanpela samting i tokaut long dispela bikpela yia 1914. Tasol Baibel i tok, Kingdom bilong God em i kamap long heven, olsem na ol manmeri bilong graun ol i no inap lukim. Orait, ol dispela man bilong lainim tok bilong Baibel, olsem wanem ol inap save ol samting ol i wetim i kamap em i bin kamap o nogat? I mas i gat sampela samting ol inap lukim, olsem wanpela mak.

Ol disaipel bilong Jisas i tokim em long kolim wanpela mak. Ol i tok: “Wanem mak bai i kamap pastaim, na mipela i ken save, yu laik i kam bek na [pasin bilong] dispela graun i laik pinis?” (Matyu 24:3) Taim Jisas i bekim tok long ol na kolim ol samting bai kamap olsem mak, em tu i makim 1914 i bikpela yia. Dispela i stret wantaim lo bilong Baibel i tok i mas i gat “tupela o tripela man bilong autim tok.”—Matyu 18:16.

Ol de na yia Baibel i kolim i makim yia 1914, na ol samting Jisas i kolim i makim ol samting i mas kamap long yia 1914 na bihain long en. Narapela kain taim i kirap long yia 1914. Tru tumas, dispela yia em i bikpela yia.

Olsem wanem? Ol samting i bin kamap kirap long yia 1914, ol dispela samting i olsem dispela mak Jisas i bin kolim? Gutpela sapos yu yet yu skelim dispela samting. Orait, nau yumi ken skelim.