Famili Namel Long Ol Manmeri i No Bilip

[Blok long pes 30]

Baibel i mekim bikpela tok long famili. Baibel i tok, man na meri marit i mas pas gut wantaim na pas gut wantaim ol pikinini na narapela i mas sori long narapela. (Matyu 19:4-6) Ol manmeri i no save long Baibel na ol i no bihainim ol lo bilong en, ol i lukim ol samting i bin painim ol manmeri inap 6,000 yia pinis na ol tu i save, marit na famili i bikpela samting.

Tasol planti yangpela manmeri long nau ol i save lukim ol nius na buk na televisen na ol i pilim olsem marit i no gutpela samting. Ol i ting sapos ol i marit bai ol i “kalabus.” Ol i no laik pas wantaim wanpela poroman tasol na stap gut long em. Ol i sakim olpela lo long stretpela pasin man na meri i mas bihainim na ol i kirap bihainim nupela lo o tingting na ol i mekim pasin i no stret. Man na meri i save sindaun nating wantaim na ol i no marit tru. Ol i no pas tru wantaim na narapela i no givim bel tru long narapela.

Ol i stap olsem i go i go na bihain ol i kamap lapun. Taim ol i lapun liklik na ol i mas i gat man bilong sambai long ol na helpim ol, nau poroman i lusim ol. Tupela i no bin mekim tok promis long narapela i mas i stap gut long narapela. Tupela i no marit tru. Olsem na i no gat samting bilong pasim tupela wantaim na poroman i go. Poroman i lusim ol i go na ol i stap wanpis na belhevi. Nau ol i pilim, sapos ol i bin marit tru, nau bai ol i gat poroman bilong stap gut long ol na sambai long ol. Tasol nogat.

God i bin wokim yumi na em i save long ol samting yumi mas mekim bambai yumi inap i stap gutpela na i stap amamas. Sapos yumi sakim ol lo bilong em bai hevi i painim yumi. Dispela tok i stret maski ol manmeri bilong nau i no bilip olsem.