Ripot long Wok Bilong Kingdom
Autim Tok Long Brasil
TAIM Jisas i tokim lain bilong em: “Yupela i go mekim olgeta lain manmeri i kamap disaipel bilong mi,” em i laik bai ol i autim tok long Brasil tu. (Matyu 28:19) Inap 158,000 Witnes Bilong Jehova ol i autim tok long Brasil, na planti gutpela samting i bin kamap.
Wanpela Witnes meri long Sobradinho, em i laik helpim famili bilong em long kisim save long tok i tru i stap long Baibel. Pastaim em i bin helpim tupela susa bilong em na meri bilong susa bilong em, em ol i stap long Brasilia, na ol i kisim save long tok i tru na kisim baptais. Bihain em i go lukim famili bilong em long Teresina, Piaui. Dispela ples i stap longwe inap 1,800 kilomita. Famili bilong em long dispela hap ol i bilong lotu Katolik na ol i no save amamas long harim tok bilong Baibel ol Witnes Bilong Jehova i save autim. Sista hia i beten askim Jehova long helpim em, na em i kamapim sampela tok bilong Baibel bilong helpim mama bilong em long save pasin bilong kaikai blut i no stret. Mama bilong em i pilim dispela tok na askim sista olsem: “Bilong wanem pris i no bin tokim mi long dispela samting?”
Mama bilong em i laik kisim save moa long tok bilong Baibel, olsem na em i stretim tok long toktok wantaim em long dispela nait. Mama bilong sista i singautim ol manmeri i stap klostu na famili tu long i kam harim tok bilong dispela sista. Ol i amamas tru long ol tok ol i harim. Sista i stap wantaim famili bilong em inap 15 de, na long olgeta apinun em i toktok wantaim 17 manmeri long tok bilong Baibel. Wanem samting i bin kamap? Em i kirapim 12-pela Baibel-stadi na askim ol Witnes long dispela hap long lukautim. Tripela i dediket na kisim baptais pinis, tupela bai kisim baptais long kibung sekit, na tupela moa i wok long kamap strong.
Wanpela lapun sista long Rio de Janeiro em i save kirap long moningtaim tru na autim tok long ol manmeri i wokabaut i go i kam long Nambis Kopakabana na ol narapela nambis na long ples planti man i save wokabaut i go i kam long en. Em i save autim tok long ol mankimasta, na meri i lukautim pikinini bilong narapela man, na man i wok long beng na sampela manimeri em ol i wokabaut long rot. Em i save mekim Baibel-stadi wantaim sampela long dispela hap. Em i bin helpim planti man long kisim save long tok i tru na nau ol tu i kamap Witnes Bilong Jehova.—Provep 1:20.
Yumi ol Witnes yumi laik painim rot bilong helpim ol narapela man long kisim save long tok i tru. Olsem na yumi mas autim tok long kain kain taim na ples. Wanpela brata long Makapa, long hap bilong Amason, em i bin mekim olsem.
Em i autim tok pinis na i laik i go long haus, na em i lukim wanpela man i sindaun long dua bilong wanpela stua. Dispela man i kaunim wanpela buk i stori long Baibel. Brata i tokim dispela man ‘Yu amamas long kaunim Baibel?’ Na dispela man i tok, ‘Yes’ Olsem na brata i askim em: “Yu laik stadi na kisim save long Baibel?” Dispela man i tok: “Mi mas baim hamas?” Brata i tok i no gat pe na wantu dispela man i tok em i laik stadi. Liklik taim na dispela man wantaim famili bilong em ol i kirap long i kam long ol miting long Haus Kingdom. Em i stretim sindaun bilong em bambai i stret wantaim tok bilong Baibel na em i insait long Skul Bilong Wok Autim Tok, na em i kirap long autim tok. Wanpela yia bihain em i kisim baptais bilong makim dediket bilong em. Ol dispela samting i kamap, long wanem dispela brata i bin autim tok long kain kain taim na ples.
Tru tumas, nau Jehova i wok long bungim ol “arapela sipsip.” (Jon 10:16) Na sapos yumi insait long dispela wok bai yumi amamas.