Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w85 7/1 p. 25-29
  • Ol i Laik Helpim Wok

No gat vidio bilong dispela seksen.

Sori, popaia kamap long lodim vidio.

  • Ol i Laik Helpim Wok
  • Wastaua i Tokaut Long Kingdom Bilong Jehova—1985
  • Ol Liklik Het Tok
  • Wankain Infomesen
  • ‘Givim long Ol Misineri’
  • Bel Bilong Ol i Kirapim Ol
  • Jehova i Bin Blesim Lain Bilong Em
  • Jehova Bai “Pinisim Dispela Wok”
  • Yu Save Mekim Wok Long Ol Nambawan Samting Bilong Yu Bilong Litimapim Nem Bilong Jehova?
    Wastaua i Tokaut Long Kingdom Bilong Jehova—1986
  • “Dispela Mani i Save Kam We?”
    Wastaua i Tokaut Long Kingdom Bilong Jehova—1995
  • Man Bilong Givim “Gutpela Samting”
    Wastaua i Tokaut Long Kingdom Bilong Jehova—1993
  • Pasin Bilong Givim Planti Samting i Save Kamapim Amamas
    Wastaua i Tokaut Long Kingdom Bilong Jehova—2000
Lukim Moa
Wastaua i Tokaut Long Kingdom Bilong Jehova—1985
w85 7/1 p. 25-29

Ol i Laik Helpim Wok

OL WITNES BILONG JEHOVA ol i autim tok long planti kantri, winim 200. Ol i autim tok long Surinem tu, em wanpela ples hat. Tupela marit i mekim wok misineri long Surinem, long dispela taim tupela i raun long ka i go inap 320 kilomita bilong lukim wanpela ples ol man i kisim wanpela kain ain (boksait) long en. Ol i laik toktok wantaim ol man i wok long dispela hap na tokim ol long ol samting God i laik mekim. Planti man i harim tok bilong ol.

Pastaim ol i go lukim bos bilong dispela lain, na em i tok: “Yupela i kam lukim mipela na mi amamas tru. Mipela mas harim kain tok olsem long hia.” Bihain em i raitim wanpela toksave, na pasim long banis bilong haus kaikai bilong tokim ol man, long dispela apinun, long 7:30, brata bai mekim wanpela tok bilong Baibel na soim sampela piksa long ol. Long 7 klok inap 70 manmeri i kam bung na ol i harim gut tok. Brata i stori long olsem wanem ol inap kisim save long God long rot bilong ol samting em i bin wokim na long rot bilong Baibel. Brata i mekim pinis tok, na bihain ol i lukim sampela piksa long wok autim tok ol Witnes i mekim long olgeta hap bilong graun.

Bihain, tupela misineri hia i soim sampela buk long ol dispela manmeri, em inap helpim ol long kisim sampela save moa. Wanpela lapun man i wokabaut i kam long tupela na em i tok: “Mi laik kisim wanpela buk.” Em nau, ol narapela man tu i kirap kisim buk. Wantu ol i kisim olgeta buk bilong ol misineri, na brata i ran i go long ka bilong kisim sampela buk moa. Meri bilong brata hia i wok long raitim nem na atres bilong ol man, em ol i laik bai sampela Witnes i go lukim ol.

Tupela marit hia ol i stap wanpela wik olgeta long dispela hap, na planti manmeri i laik harim tok. Ol samting i painim tupela i helpim yumi long save, planti manmeri ol i laik kisim save long tok i tru na save long laik bilong Jehova. Nau long “las taim” ol Witnes Bilong Jehova i laik helpim ol kain man olsem na ol i redi long i go long ol narapela hap, olsem Surinem, na helpim ol Witnes bilong dispela hap long lainim ol man. Long dispela rot ol i bin truim tok bilong man bilong raitim sam, em i tok: “Taim yu laik pait wantaim ol birua bai ol pipel bilong yu i go wantaim yu na helpim yu.” (Sam 110:3) Na Jehova i blesim tru ol wok ol i mekim.

Olsem wanem? Yu tu yu laik kisim ol blesing olsem? Tasol ating yu bai tok: “Mi no inap kamap misineri!” Na ating tru yu no inap kamap misineri. Tasol, ating yu bin mekim sampela samting na yu helpim ol misineri long olgeta hap na ol i kisim ol dispela gutpela ekspiriens. Long wanem rot yu bin helpim ol?

‘Givim long Ol Misineri’

Ating yu bin helpim ol olsem wanpela yangpela meri, nem bilong em Epril i bin mekim. Epril em i no wanpela misineri, tasol ating bihain em i laik kamap misineri. Tasol nau em i yangpela tumas na em i no inap i go long wanpela longwe hap na kisim gutpela ekspiriens olsem mipela raitim antap. Tasol, em i laik helpim dispela wok, olsem na em i raitim pas long namba wan ofis bilong Sosaiti Wastaua long Bruklin. Em i tok: “Taim mi go long kibung sekit, wanpela man i givim wan dola long mi. Mi laik givim dispela mani long yupela na yupela i ken givim long ol misineri bilong helpim ol long mekim wok bilong lainim ol manmeri long Jehova.” Olsem na dispela yangpela meri, Epril, em i bin helpim gut wok bilong autim tok long olgeta hap bilong graun. Em i givim sampela mani bilong em yet bilong helpim wok bilong ol misineri.

Sosaiti i kisim narapela pas i kam long wanpela meri i gat bikpela krismas liklik, winim Epril, dispela pas i tok: “Mi salim 100 dola. Yupela mas mekim wok long dispela mani bilong helpim wok bilong autim tok bilong Kingdom. Nau tasol wanpela man i bin givim dispela mani long mi, na mi laik givim long yupela ․․․ Mi bin mekim wok painia inap 46 yia pinis. Tasol nau mi laik winim 90 krismas na mi no inap mekim bikpela wok olsem mi bin mekim bipo.” Dispela sista em i bin mekim wok bilong Jehova inap planti yia pinis em i no inap mekim wok misineri. Tasol em i laik helpim dispela wok, olsem na em i givim sampela mani.

Dispela tupela pas i makim narapela rot lain bilong God i bihainim bilong “helpim” wok bilong Jehova. Ol i bihainim tok bilong Baibel i tok: “Yu mas kisim ol namba wan hap kaikai i mau long gaden bilong yu na givim long Bikpela olsem ofa, na dispela bai i givim biknem long em.” (Provep 3:9) Sampela samting i pasim ol na ol i no inap mekim bikpela wok olsem sampela brata sista inap mekim. Tasol ol i givim mani samting bilong helpim ol narapela long mekim wok. Bipo tu ol wokboi bilong Jehova i amamas long givim samting bilong ol bilong helpim wok bilong Jehova. Sapos yumi skelim ol samting ol i bin mekim dispela bai lainim yumi long sampela gutpela pasin yumi ken bihainim, na bai yumi save yumi inap bihainim ol dispela pasin long nau o nogat.

Bel Bilong Ol i Kirapim Ol

Long taim bilong Moses, ol i mas mekim wanpela wok. Ol i mas wokim wanpela haus lotu sel na bai lain Isrel i ken lotuim Jehova. Ol i bin singautim ol manmeri namel long lain Isrel, em ol i save gut long mekim sampela wok, na ol i givim taim na save bilong ol bilong helpim dispela wok. (Eksodas 35:10) Na olgeta manmeri, sapos ol i laik, ol i ken givim mani samting bilong ol bilong helpim dispela wok. Orait, ol i bin mekim wanem? Ol i bringim planti samting tru, winim skel bilong ol samting ol i mas kisim. Bel bilong ol man i kirapim ol na ol i givim ol dispela samting. Baibel i tok “ol i laik mekim.” Ol i givim samting bilong ol na dispela i kamapim bel bilong ol, ol i bilip tru long Jehova na ol i laik wokim dispela haus lotu sel bambai ol i ken mekim lotu i tru.—Eksodas 35:20-29; 36:4-7.

Long taim bilong Hesekaia i gat narapela wok ol i mas mekim. Inap planti yia ol i no bin lukautim haus lotu bilong Jehova, olsem na ol i mas klinim na stretim na lainim ol manmeri long bihainim lo bilong Jehova. Hesekaia i tokim ol Isrel ol i mas helpim ol pris na Livai long ol samting bilong skin bambai ol inap “bihainim tru lo bilong Jehova.” (2 Kronikel 31:4, NW) Ol manmeri i amamas tru long helpim dispela wok, olsem na hetpris Asaraia em i tok: “Jehova yet i bin mekim gut long lain bilong em.”—2 Kronikel 31:10, NW.

Ol Isrel i redi long givim samting bilong ol; ol i laik givim. Dispela i makim ol i gat gutpela bel na ol i laik helpim lotu i tru, na i makim tu olsem Jehova i blesim ol. Orait, olsem wanem long nau?

Jehova i Bin Blesim Lain Bilong Em

Long nau i gat narapela bikpela wok lain bilong Jehova i mas mekim. Jisas i tok profet long en olsem: “Bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Baibel i tok bai ol i autim tok na bai ol i lainim ol man tu na ol man i lotu tru long God bai ol i kam bung wantaim. (Aisaia 2:3, 4; 54:13; Sekaraia 8:23; Matyu 28:19, 20; Revelesen 7:9) Olsem wanem? Mani ol brata i givim i save helpim dispela wok?

Tru tumas, mani ol brata i givim i save helpim tru dispela wok. Olsem: Bilong salim wanpela misineri i go long Skul Giliat, na lukautim em taim em i skul, na salim em i go long wanpela kantri olsem Surinem na lukautim em inap planti yia long dispela hap, orait Sosaiti i mas tromoi planti tausen kina. Tasol Sosaiti Wastaua i bin salim inap olsem 6,000 misineri i go long Skul Giliat na i go mekim wok.

I gat planti narapela samting tu Sosaiti i mas tromoi mani long en bilong helpim wok bilong autim tok. I gat ol wasman sekit na wasman distrik wantaim meri bilong ol, na ol brata sista i wok long Brens-ofis. Ol dispela brata sista i mekim bikpela wok long wok bilong autim tok na ol i no inap mekim wok mani tu bilong lukautim skin bilong ol yet. Na i gat ol painia spesel tu, em Sosaiti i save helpim ol long liklik mani bambai ol i ken autim tok long ol hap i hatwok long autim tok long en. Ol dispela mani i bilong helpim tasol ol man i mekim wok.

Tasol Sosaiti i mas baim tu ol nupela masin bilong wokim ol buk na magasin, na ol i wokim ol nupela Haus Brens long planti hap, na ol Haus Kibung na planti handet Haus Kingdom. Na i mas i gat mani bilong baim stem bilong salim ol pas i go long ol 46,000 kongrigesen, na bilong wokim ol pepa na fom samting bilong Sosaiti. Sapos yu tingim ol dispela samting Sosaiti i save tromoi mani long en, orait bai yu save Sosaiti i save tromoi bikpela mani tru long olgeta yia bilong helpim wok bilong autim tok bilong Kingdom, na bilong lukautim ol “sipsip” bambai ol i gat ples bilong bung long en na ol i no ken sot long kaikai bilong spirit.

Bikpela samting em olsem: Jehova yet i mekim na i gat mani bilong helpim dispela wok. Olsem wanem em i mekim? Em i kirapim bel bilong ol man na long laik bilong ol yet ol i givim mani bilong helpim dispela wok. Olsem na ol Kristen wan wan ol i save givim mani, na ol i save givim taim na strong bilong ol long helpim wok bilong ol kongrigesen, olsem wok bilong sanapim nupela Haus Kingdom o Haus Kibung samting. Planti kongrigesen i save salim sampela mani i go long Sosaiti long Bruklin o long Brens-ofis long hap bilong ol. Na sampela i mekim ol narapela samting bilong helpim Sosaiti, olsem mipela raitim long antap. (Lukim blok antap.) Na wanem samting i kamap? Maski i gat hevi long mani long taim bilong yumi, tasol Jehova i kirapim bel bilong lain bilong em, na ol i givim ol samting bilong mekim dispela wok em i bin givim long yumi.

Orait, ol dispela samting i helpim yumi long save long wanem samting? Taim bilong yumi i wankain long taim bilong Hesekaia. “Jehova yet i bin mekim gut long lain bilong em.” Em i blesim ol wok lain bilong em i mekim. Long taim bilong Moses, lain bilong Jehova i givim bel long mekim wok bilong Em, na long nau tu lain bilong Jehova i givim bel tru long mekim wok bilong autim dispela gutpela tok bilong Kingdom na bungim ol man i laik harim tok. Ol man i no subim ol long givim mani samting; nogat. Bel bilong ol i kirapim ol na ol i “laik” givim samting.

Jehova Bai “Pinisim Dispela Wok”

Long namba wan senseri, aposel Pol i mekim wok misineri na planti gutpela samting i painim em, wankain olsem ol samting i bin painim dispela tupela misineri long Surinem. Ol kongrigesen long bipo ol i bin givim mani samting bilong helpim aposel Pol. Kongrigesen bilong Filipai i bin helpim tru em. Olsem na taim Pol i raitim pas i go long ol, em i tok: “Long olgeta taim mi tingting long yupela, mi save tenkyu long God bilong mi. Long olgeta prea mi mekim bilong helpim yupela, oltaim mi save amamas na prea. Mi amamas long yupela i stat long namba wan de, na yupela i poroman wantaim mipela long gutnius inap long nau. Na mi save pinis olsem: God i statim gutpela wok long yupela, em bai i wok i go i go na i pinisim dispela wok long De bilong Krais Jisas.”—Filipai 1:3-6; 4:16.

Dispela samting i strongim ol Kristen long nau tu. Jehova i truim tok promis bilong em na kirapim lain bilong em long mekim kain kain samting bilong “helpim” wok bilong em. Olsem na ol Witnes Bilong Jehova i save ‘tenkyu long God bilong ol,’ na ol i bilip tru olsem Jehova yet i bin kirapim lain bilong em na ol i laik long helpim wok bilong em, olsem na em bai i wok i go i go na i pinisim dispela wok bilong em.

[Blok long pes 28]

Sampela Samting Ol i Mekim Bilong Helpim Wok Bilong Kingdom

Givim Mani Olsem Presen: Sampela man i save givim mani olsem presen long Sosaiti Was Taua bilong Pitsbeg o long brens-ofis long hap bilong ol. Taim ol i givim mani olsem presen, gutpela sapos ol i raitim wanpela liklik pas na putim wantaim dispela mani na tokim Sosaiti ol i laik givim nating dispela mani long Sosaiti olsem presen.

Givim Mani Olsem Dinau: Taim ol i givim mani olsem long Sosaiti, orait, taim ol i stap laip yet, sapos ol i sot na ol i laik kisim bek olgeta dispela mani o hap tasol, ol i ken kisim; Sosaiti bai bekim long ol.

Sapos yu laik save moa long dispela samting, orait yu ken raitim pas long Brens-ofis long hap bilong yumi. Atres em olsem: International Bible Students Association of Papua New Guinea, Inc., Box 636, Boroko, P.N.G.

[Piksa long pes 27]

Lain bilong Jehova i helpim wok bilong Kingdom i go bikpela

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim