Stap Pren Bilong God—Em Rot Bilong i Stap Amamas

“WANPELA dok i stap laip yet em i winim wanpela laion i dai pinis.” (Eklisiastis 9:4, NW) Dispela sotpela tok King Solomon i mekim em i kamapim wanpela bikpela tok i tru, olsem: Laip i winim mani kago samting bilong man o ol samting em i tingting long mekim bilong kisim biknem samting. Sapos yumi no gat laip, ol samting yumi kisim i no inap helpim yumi. Tru tumas, yumi mas i gat laip bambai yumi ken painim rot bilong i stap amamas.

Samting i “Nambawan Tru,” Winim Laip

Laip em i gutpela samting, tasol i gat wanpela samting i nambawan tru na i winim laip. Ating yu kirap nogut long dispela tok na yu ting olsem i no gat wanpela samting inap winim laip. Orait, wanem samting i nambawan tru na i winim laip?

King Devit bilong lain Isrel long bipo em i bekim dispela askim. Em i toktok long Man bilong wokim olgeta samting, em God Jehova, na Devit i tok: “Laip bilong dispela graun i gutpela tasol marimari bilong yu i nambawan tru. Olsem na mi litimapim nem bilong yu.” (Sam 63:3) Devit i pilim tru marimari bilong God; em i save sapos God i marimari long yu, long wanem yu stap gut long Em, olsem pren bilong Em, dispela i nambawan samting tru, winim laip. Bilong wanem i olsem?

Wanem As Bilong Laip?

Sapos wanpela man i givim wanpela samting long yu, olsem presen, em wanpela samting yu laikim tru, bai yu amamas long dispela presen, a? Na ating bai yu amamas long mekim wok long en. Tasol sapos yu tingim presen tasol na yu no tingim dispela man em i bin givim dispela presen long yu, orait yu no pilim tru gutpela pasin em i bin mekim, a? Yu stap gutpela pren bilong dispela man na dispela samting i bin kirapim em long givim dispela presen long yu, a? Sapos yu no stap pren bilong em, bai i no gat presen na i no gat amamas bilong en.

Na i wankain tu long laip. Yumi amamas yumi kisim laip na yumi stap, tasol yumi tingim tu as bilong laip bilong yumi na olsem wanem yumi inap i stap laip. Yumi yet yumi no as bilong laip bilong yumi. Na sapos i no gat ol gutpela samting long graun, em Jehova i bin givim long yumi, bai yumi no inap i stap laip. (Sam 100:3; Aposel 14:17) Yumi gat laip na yumi stap na yumi amamas long dispela samting, a? Marimari bilong Bikpela Man bilong wokim yumi, em God Jehova, na yumi stap laip. Olsem na yumi save bilong wanem King Devit i tok “marimari” bilong God i “nambawan tru” na i winim laip, a?

Yumi mas i stap pren bilong God bambai yumi ken i stap laip long nau na long bihain tu. Olsem na pasin bilong i stap klostu long God, olsem pren bilong em, em i bikpela samting. Nau yumi ken stori long dispela samting.

Yumi save stap laip inap liklik taim tasol na yumi dai, a? Na kain kain samting inap kamap na wantu bai yumi dai, a? Olsem na maski man i wok strong long kisim bikpela mani kago o biknem, tasol dai i save katim wok bilong em na olgeta samting em i bin kisim i no inap helpim em. I olsem saveman King Solomon i tok: “Man i wok strong na em i givim bel long mekim bikpela wok hia long graun em i save kisim wanem gutpela samting long wok bilong em? Long olgeta de em i kisim pen na hevi, na long nait tu, bel bilong em i no i stap isi. Dispela samting tu em i giaman tasol.”—Eklisiastis 2:22, 23, NW; lukim tu 2:3-11.

Tasol maski, Man bilong wokim yumi em i gat sori long yumi na laik bilong em i olsem: Olgeta man i laikim tumas em na ol i bihainim tok bilong em, em i laik tekewe ol long kalabus nogut nau ol i stap long en bambai ol i ken lukim gutpela samting i kamap long wok bilong ol na ol i ken i stap belgut na amamas. Olsem na Jehova i tok promis olsem: “Ol i no ken wokim haus na narapela man i sindaun long en; ol i no ken planim kaikai na narapela man i kisim na kaikai. Lain bilong mi bai stap longtaim olsem diwai i save stap; lain bilong mi bai kisim gutpela samting long wok bilong han bilong ol.”—Aisaia 65:22, NW.

Dispela gutpela pasin sori na marimari bilong God i winim tru laip bilong yumi nau long dispela graun, a? Dispela laip bilong nau em i bilong liklik taim tasol na i gat kain kain hevi bilong en. Tasol God i marimari long yumi na em i laik givim gutpela laip long yumi long Nupela Taim bihain na bai yumi inap i stap amamas oltaim na wok bilong yumi i no ken lus nating. Gutpela sapos yumi wok strong long kisim dispela gutpela laip bilong bihain, a? Bilong kisim dispela gutpela laip yu mas wok long i stap gut long ai bilong Jehova long nau bambai em i ken orait long yu, na oltaim yu mas i stap klostu long Em wantaim lain bilong Em hia long graun.

Tingting long Nau Tasol o long Ol Samting Em Inap Helpim Yu long Olgeta Taim Bihain?

Yumi tingim ol dispela samting yumi stori pinis long en na yumi save, sapos yumi wok tasol long kisim biknem o bikpela mani kago o bikpela wok o bikpela skul o ol amamas bilong bodi o yumi wok strong long kisim sampela narapela samting ol man bilong dispela graun i ting em i bikpela samting, orait, yumi no bihainim gutpela tingting. Ating i no gat rong long ol dispela samting yet, tasol sapos yumi wok strong long kisim na yumi tingim ol dispela samting i nambawan bikpela samting, ating bai yumi no tingim ol wok bilong God yumi mas mekim. Na bai em i no ken orait long yumi na yumi lus long kisim “laip tru.”—1 Timoti 6:19; Luk 9:24.

Man i wok strong long kisim ol dispela samting, em i olsem wanpela manki em i lusim skul na em i go wok leba nating bambai em inap kisim sampela mani. Ating em i amamas, long wanem em i no kalabus moa long skul, tasol em i no tingting gut, a? Em i tingting long nau tasol; em i no tingting long mekim ol samting bilong helpim em long bihain tu. Na i olsem tasol long man i wok strong long mekim ol samting em yet i laik mekim na em i no tingim God na ol samting em i mas mekim bambai em i ken i stap wanbel wantaim God.

Yumi olgeta yumi gat planti wok yumi mas mekim, tasol yumi save putim hap taim na strong bilong yumi bilong mekim ol samting yumi ting em i bikpela samting, a? Yumi save mekim ol samting yumi laik tru long mekim, a? Jisas i save long dispela pasin bilong yumi ol man na em i tok stret olsem: “Long ples ol gutpela samting bilong yu i stap long en, long dispela ples bai laik [bel] bilong yu tu i stap.”—Matyu 6:21.

Yu givim bel long kisim wanem “ol gutpela samting”? Ating ol samting bilong dispela graun i pulim ai bilong yu na bel bilong yu, tasol yu mas tingting gut: Ol dispela samting inap helpim yu long olgeta taim bihain o nogat? Ol inap helpim yu long i stap amamas tru? O ol i olsem drak samting, em man i kisim na inap liklik taim em i amamas, tasol bihain em i karim bikpela pen na hevi long dispela?

Tingting Gut

Ol samting ol manmeri long taim bilong Lot i mekim em inap givim save long yumi na helpim yumi long tingting gut. Jisas i tok: “Ol i kaikai i stap, ol i dring, ol i baim samting, ol i givim samting long arapela man i baim, ol i planim gaden, ol i wokim haus.” Em nau, ol i mekim ol samting ol yet i laik mekim na ol i no tingim laik bilong God. Na wanem samting i bin kamap? “Lot i lusim Sodom na i go, na long dispela de tasol paia wantaim ston salfa i pundaun long skai olsem ren, na i bagarapim olgeta manmeri.” Na bilong helpim yumi, Jisas i tok moa olsem: “Na bai i olsem tasol long de Pikinini Bilong Man i kamap ples klia.”—Luk 17:28-30.

Long nau olgeta samting i kamap i makim olsem dispela “de” i klostu. God Jehova i laik helpim yumi bambai yumi inap i stap gutpela oltaim oltaim, olsem na long rot bilong Baibel wantaim lain bilong em hia long graun em i givim planti toksave long olgeta lain man. Em i singautim ol man long lusim ol samting ol yet i laik mekim na tanim bel na kamap wanbel wantaim em. Sapos yumi sakim dispela samting na yumi givim olgeta hap taim na strong bilong yumi long mekim ol samting yumi laik mekim, yumi no bihainim gutpela tingting. Yumi mas save i no gat bikpela hap taim moa; dispela “de” i klostu. I olsem aposel Pol i tok: “Harim! Nau tasol i gutpela taim. Harim! Nau em i de bilong God i kisim bek yumi.”—2 Korin 5:20; 6:2.

Olsem wanem? Bai yu stap wantaim ol manmeri ol i winim taim bilong pinis bilong dispela pasin nogut bilong nau na i stap oltaim long Nupela Taim God i tok promis long kamapim? Sapos yu laik kisim dispela blesing, yu mas skelim gut ol samting nau yu tingim em i bikpela samting na yu mas mekim ol samting bambai yu ken i stap wanbel wantaim God na em i ken orait long yu. Sapos yu laik i stap long dispela gutpela taim bihain, yu inap. Em samting bilong yu!

[Ol Piksa long pes 5]

Sapos yu save tenkyu long man i givim presen long yu . . .

. . . orait, olsem wanem long Man i givim planti gutpela gutpela samting long yumi, em God Jehova?