I Stap na Wok Bilong Jisas

Kirap long dispela Wastaua, inap sampela mun, bai Wastaua i gat ol hap stori bilong i stap na wok bilong Jisas.

INAP 5-pela yia pinis long sampela Wastaua i gat dispela hap ol i kolim “Tok Bilong God i Gat Laip.” Ol i save putim piksa na ol tok i no hatwok long save long en, na ol i stori gut long planti as tok bilong Baibel na ol tok bilong Baibel long ol samting i bin kamap long bipo. Nau ol i laik senisim dispela na putim stori bilong i stap na wok bilong Jisas.

Long tupela pes i stap bihain long dispela yu ken lukim namba wan hap bilong dispela nupela samting bilong Wastaua. Inap sampela mun nau, long olgeta Wastaua, bai yu lukim dispela nupela samting. Ol bai putim ol tok long tupela pes na putim planti piksa olsem bilong “Tok Bilong God i Gat Laip.”

I stret ol i putim stori bilong Krais Jisas long Wastaua, long wanem Jisas i bin tanim tingting bilong planti man, winim olgeta narapela man. Na planti man, taim ol í save long ol samting Jisas i bin mekim na long ol tok bilong em, dispela i kirapim ol long senisim pasin bilong ol. Ol i kirap bihainim gutpela pasin na dispela samting i helpim ol.

Ating yu save pinis long planti samting bilong i stap bilong Jisas na wok bilong em. Tasol yu save wanem samting i bin kamap pastaim na wanem samting bihain? Olsem: Jisas i makim 12-pela aposel bilong em taim em i kirap mekim wok bilong em o bihain tru? Em i makim ol paslain long taim meri bilong Sameria i save em i Krais o bihain long dispela taim? Na em i stap we taim em i makim ol? Em i stap we taim em i givim kaikai long 5,000 manmeri o mekim tok bilong em long maunten? Dispela nupela hap long Wastaua bai stori gut long ol dispela kain samting. Na bai i gat ol piksa tu. Olsem na bai yu inap save gut long ol dispela bikpela samting i bin kamap.

Dispela nupela samting long Wastaua bai helpim ol man em longtaim pinis ol i save kaunim Baibel, na em bai helpim tu ol nupela man ol i laik lainim tok bilong Baibel, na em bai helpim ol papamama long stadi wantaim pikinini bilong ol na lainim ol long tok bilong Baibel. Olsem na i gat sampela askim tu i stap bilong helpim ol man long mekim stadi. Em gutpela samting tru bilong helpim yumi bambai yumi ken save long dispela man em i as bilong lotu Kristen na long ol tok bilong em! Ating bai yu inap mekim wok long ol dispela tok bilong Wastaua na helpim gut famili bilong yu na ol narapela man. Olgeta man i save laikim stori; na planti ol i save laikim stori i bruk long planti hap na ol i ken kaunim narapela hap pastaim na narapela hap bihain.

Olsem na nau yu ken wok long kirapim ol narapela man long kaunim stori bilong Jisas long dispela Wastaua na long ol narapela Wastaua bihain. Taim ol i laik kamapim sampela tok bilong Baibel ol i stori tasol long en bambai ol man i ken kisim kwik save long ol dispela tok. Na long pinis bilong stori, ol i makim wanem hap bilong Baibel ol í bin kisim ol dispela tok long en. Gutpela sapos yu mekim bikpela wok long dispela nupela samting long Wastaua bilong helpim yu long kamapim ol disaipel!